کسی سے بھی نہ کبھی بستہ لب کی بات کرو

عنایتوں کی نہ غیض و غضب کی بات کرو
شکستِ رنگ کی، بزمِ طرب کی بات کرو

مری سنو تو ترانہ ہے خامشی کا بہت
کسی سے بھی نہ کبھی بستہ لب کی بات کرو

وہ عہدِ رفتہ بھی ترکیبِ شادی و غم تھا
وہ وقت بیت گیا ہے تم اب کی بات کرو

مری خطا کے نہ ہو جاؤ مرتکب تم بھی
کرو ادب سے جو مجھ بے ادب کی بات کرو

کوئی گھڑی ہے کہ ہے ماورائے وجہ و سبب
کسی گھڑی بھی نہ وجہ و سبب کی بات کرو

فسانے روزِ سیہ کے بہت ہوئے ریحان
بس آج کو کسی رخشندہ شب کی بات کرو

 

سبحان اللہ، سبحان اللہ! بہت شاندار غزل ریحان بھائی۔ ایک ایک شعر لاجواب۔ کیا ہی کہنے!
اس شعر کی تو کیا ہی بات ہے

 

بہت نوازش سر! قائم و دائم رہیں.

 

ہمیشہ کی طرح بہت خوب!

 

زبردست ریحان بھائی

 

ان دو اشعار کا مطلب سمجھ میں نہیں آیا۔

 

واہ، خوب اشعار ہیں۔

مری خطا کے نہ ہو جاؤ مرتکب تم بھی
کرو ادب سے جو مجھ بے ادب کی بات کرو

کیا کہنے!! بہت سی داد قبول کریں۔

 

خوب غزل ہے قریشی صاحب، لاجواب!

 

پلیز مجھے بھی یہ دو اشعار سمجھا دیجیے

 

معذرت خواہ ہوں دراصل ابلاغ کے مسائل ہمیشہ سے رہے ہیں اور ویسے بھی اکثر شعر کم اور الفاظ کی کھیر زیادہ کہتا ہوں. اگر شعر کے ساتھ نوٹ آویزاں کرنے کی ضرورت پڑے تو شعر کا مقصد ختم ہو جاتا ہے. مختصر یہ کہ ادب والے شعر میں صرف یہ کہنے کی کوشش کی ہے کہ کمالِ ادب تو یہ ہے کہ کسی بے ادب کے ذکر میں بھی بے ادبی شامل نہ ہو. دوسرے شعر میں یہ کہا ہے کہ کسی وقت بھی کوئی ایسا واقعہ ہو سکتا ہے جس کہ وجہ سمجھ نہ آئے اس لیے تمام وقت اسی گفتگو میں صرف نہ کرنا چاہیے. ظہیراحمدظہیر صاحب کرم فرمائی کریں تو شاید کوئی بہتری کی صورت نظر آئے.

 

مجھے لگا جیسے کسی عرفانیات کے مسائل پر گفتگو کی گئی ہے

 

یقینا ًمسئلہ میرے سمجھنے میں ہو گا اگر اشعار میں ہوتا تو اساتذہ نشاندہی کرتے، مگر انہوں نے تو اسے پسند کیا ہے۔

 

بہت خوب شاباش! مطلب سمجھ میں آنا بھی تو نہیں چاہیے کہ آخر شنید ہے " شعر خوب معنی ندارد " {بیدل}

 

بہت خوب ! بہت زبردست

 

بہت عمدہ غزل جناب۔۔

 

بہت خوب بھئی... اچھی غزل ہوئی ہے... بڑے دنوں بعد کوئی مراسلہ دیکھنے کو ملا...!

 

بہت نوازش شکیب بھائی. ویسے ہم سے زیادہ تو آپ غائب رہنے لگے ہیں آج کل.

 

خوبصورت۔۔۔۔۔ تہہ در تہہ معانی، شعریت کی انتہا، سطحی مزاج و مذاق سے بالا عمدہ خیالات اور الفاظ۔۔۔۔ ابلاغ کے مسائل اس لئے کہ یہ تخیل، طرزِ بیان اور لفاظی خال خال ہی ملتی ہے آج کل کے شعراء میں۔ تو اکثر احبابِ ذوق سہل پسند ہو چکے۔ ڈھیروں داد

 

بہت عنایت امان بھائی۔