محسن نقوی نوکِ نیزہ پہ جو سَر رکھتے ہیں - محسن نقوی شہید

[کاشفی]

ہم بھی خُورشید و قمر رکھتے ہیں​

(محسن نقوی شہید)​

نوکِ نیزہ پہ جو سَر رکھتے ہیں​

وہ زمانوں کی خبر رکھتے ہیں​

​

ہم کو مت خانماں برباد سمجھ​

ہم تو فردوس میں گھر رکھتے ہیں​

​

ہو محبت جنہیں زندانوں سے​

سانس لینے کا ہُنر رکھتے ہیں​

​

بُخلِ دریا سے ہمیں کیا مطلب؟​

ہم تو کوثر پہ نظر رکھتے ہیں​

​

زور پر شامِ غریباں ہے تو کیا​

ہم ابھی دیدہء تر رکھتے ہیں​

​

خاک آلود قباؤں والے​

آنکھ میں لعل و گُہر رکھتے ہیں​

​

عرش والوں سے ہے نسبت ہم کو​

ہم بھی جبرئیل کے پَر رکھتے ہیں​

​

ہنس کے مٹّی سے بہلنے والے​

سلطنت زیرِ اثر رکھتے ہیں​

​

اپنے سینے پہ ہیں ماتم کے نشاں​

ہم بھی سامانِ سفر رکھتے ہیں​

​

زیرِ خنجر بھی حسین علیہ السلام ابنِ علی علیہ السلام​

ہم غریبوں کی خبر رکھتے ہیں​

​

میرے بچّوں پہ کرم ہو مولاعلیہ السلام!​

آپ اکبر سا پسر رکھتے ہیں​

​

دیکھ یہ زخم ، یہ آنسو محسن ​

ہم بھی خورشید و قمر رکھتے ہیں​