احمد ندیم قاسمی قطعات

[Umair Maqsood]

آنسوؤں میں بھگو کے آنکھوں کو
دیکھتے ہو تو خاک دیکھو گے
آئینے کو ذرا سا نم کر دو
پیرہن چاک چاک دیکھو گے​

 

[Umair Maqsood]

آنکھ کھل جاتی ہے جب رات کو سوتے سوتے
کتنی سونی نظر آتی ہے گزر گاہ حیات
ذہن و وجدان میں یوں فاصلے تن جاتے ہیں
شام کی بات بھی لگتی ہے بہت دور کی بات​

 

[Umair Maqsood]

بات کہنے کا جو ڈھب ہو تو ہزاروں باتیں
ایک ہی بات میں کہہ جاتے ہیں کہنے والے
لیکن اِن کے لئے ہر لفظ کا مفہوم ہے ایک
کتنے بے درد ہیں اس شہر کے رہنے والے​

 

[Umair Maqsood]

باجرے کی فصل سے چڑیاں اڑانے کے لئے
ایک دوشیزہ کھڑی ہے کنکروں کے ڈھیر پر
وہ جھکی وہ ایک پتھر سنسنایا، وہ گِرا
کٹ گئے ہیں اس کے جھٹکے سے مرے قلب و جگر​

 

[Umair Maqsood]

برس کے چھٹ گئے بادل ہوائیں گاتی ہیں
گرجتے نالوں میں چرواہیاں نہاتی ہیں
وہ نیلی دھوئی ہوئی گھاٹیوں سے دو گونجیں
کسی کو دکھ بھری آواز میں بلاتی ہیں​

 

[Umair Maqsood]

بوڑھے ماں باپ بلکتے ہوئے گھر کو پلٹے
چونک اٹھے ہیں وہ شہنائی بجانے والے
اف بچھڑتی ہوئی دوشیزہ کے نالوں کا اثر
ڈولتے جاتے ہیں ڈولی کے اٹھانے والے​

 

[Umair Maqsood]

وہ پانی بھرنے چلی اک جوان پنساری
وہ گورے ٹخنوں پہ پازیب چھنچھناتی ہے
غضب غضب کہ مرے دل کی سرد راکھ سے پھر
کسی کی تپتی جوانی کی آنچ آتی ہے​

 

[Umair Maqsood]

وہ دور جھیل کے پانی میں تیرتا ہے چاند
پہاڑیوں کے اندھیروں پہ نور چھانے لگا
وہ ایک کھوہ میں اک بد نصیب چرواہا
بھگو کے آنسوؤں میں ایک گیت گانے لگا​

 

[Umair Maqsood]

وہ سبز کھیت کے اس پار ایک چٹان کے پاس
کڑکتی دھوپ میں بیٹھی ہے ایک چرواہی
پرے چٹان سے پگڈنڈیوں کے جالوں میں
بھٹکتا پھرتا ہے وہ ایک نوجوان راہی​

 

[Umair Maqsood]

یہ بھی کیا چال ہے ہر گام پہ محشر کا گماں
پائلیں بجتی ہیں لہنگے کی کماں تنتی ہے
یوں چلو جیسے اترتی ہے کہستاں سے ہوا
جیسے رنگوں کے تموج سے کرن بنتی ہے​

 

[Umair Maqsood]

ایک مدت کے بعد آج مجھے
ہم زباں ماننے لگے ہیں لوگ
پہلے روتے تھے، چونکتے ہیں اب
مجھ کو پہچاننے لگے ہیں لوگ​