احمد ندیم قاسمی قطعات

[Umair Maqsood]

کنج زنداں میں پڑا سوچتا ہوں
کتنا دلچسپ نظارہ ہوگا
یہ سلاخوں میں چمکتا ہوا چاند
تیرے آنگن میں بھی نکلا ہوگا​

 

[Umair Maqsood]

کبھی نہ پلٹے گی بیتی ہوئی گھڑی لیکن
تصورات سے دل خوش ہیں نوع انساں کے
وہ کس کے ہاتھ کے ہیں منتظر خدا جانے
لرزتے رہتے ہیں پردے حریم جان کے​

 

[Umair Maqsood]

عید کا دن ہے فضا میں گونجتے ہیں قہقہے
جھولتی ہیں لڑکیاں جھولوں پہ گاتی ہیں ملہار
میرا جھولا جس سے ہیں لپٹے ہوئے سرسوں کے پھول
دیکھتا ہے ایک نکڑ کو لپک کر بار بار​

 

[Umair Maqsood]

ساون کی یہ رت اور یہ جھولوں کی قطاریں
اڑتی ہوئی زلفوں پہ مچلتی ہیں پھواریں
میں صبح سے ندی کے کنارے پہ کھڑا ہوں
ملاح کہاں ہیں جو مجھے پار اُتاریں​

 

[Umair Maqsood]

ریشۂ گل کو رگ سنگ بنانے والو
بوئے گل سنگ سے ٹپکے گی شرارے بن کر
تم کو معلوم تو ہوگا کہ اُجالا دن کا
سینۂ شب میں دھڑکتا ہے ستارے بن کر​

 

[Umair Maqsood]

رنگ حرف صدا کی دنیا میں
زندگی قتل ہو گئی ہے کہیں
مر گیا لفظ اڑ گیا مفہوم
اور آواز کھو گئی ہے کہیں​

 

[Umair Maqsood]

رنگ جب اپنی حقیقت سے شناسا ہو جائے
لالہ زاروں میں بھڑکتا ہے الاؤ بن کر
رقص جب دائرۂ فن سے اُبل پڑتا ہے
دندناتا ہے سمندر کا بہاؤ بن کر​

 

[Umair Maqsood]

رخسار ہیں یا عکس ہے برگِ گل تر کا
چاندی کا یہ جھومر ہے کہ تارا ہے سحر کا
یہ آپ ہیں یا شعبدۂ خواب جوانی
یہ رات حقیقت ہے کہ دھوکا ہے نظر کا​

 

[Umair Maqsood]

ذکر مریخ و مشتری کے ساتھ
اپنی دھرتی کی بات بھی تو کرو
موت کا احترام برحق ہے
احترام حیات بھی تو کرو​

 

[Umair Maqsood]

داور حشر مجھے تیری قسم
عمر بھر میں نے عبادت کی ہے
تو مرا نامۂ اعمال تو دیکھ
میں نے انساں سے محبت کی ہے​

 

[Umair Maqsood]

خموش جھیل پہ کیوں ڈولنے لگا بجرا
ہوائیں تند نہیں ہیں کنارہ دور نہیں
بھنور کا ذکر نہ کر زندگی کا لطف نہ چھین
مجھے ابھی کسی انجام کا شعور نہیں​

 

[Umair Maqsood]

حکمت اہل مدرسہ کا غرور
میری وحشت سے دب کے ہار گیا
تیرا گھبرا کے مسکرا دینا
زندگی کے نقاب اتار گیا​

 

[Umair Maqsood]

جسے ہر شعر پر دیتے تھے تم داد
وہی رنگیں نوا خونیں نوا ہے
اب ان رنگوں کے نیچے دھیرے دھیرے
لہو کا ایک دریا بہہ رہا ہے​

 

[Umair Maqsood]

جب چٹانوں سے لپٹتا ہے سمندر کا شباب
دور تک موج کے رونے کی صدا آتی ہے
یک بیک پھر یہی ٹوٹی ہوئی بکھری ہوئی موج
اک نئی موج میں ڈھلنے کو پلٹ جاتی ہے​

 

[Umair Maqsood]

تمتماتے ہیں سلگتے ہوئے رخسار ترے
آنکھ بھر کر کوئی دیکھے گا تو جل جائے گا
اتنا سیال ہے یہ پَل کہ گُماں ہوتا ہے
میں ترے جسم کو چھو لوں تو پگھل جائے گا​

 

[Umair Maqsood]

تری زلفیں ہیں کہ ساون کی گھٹا چھائی ہے
تیرے عارض ہیں کہ پھولوں کو ہنسی آئی ہے
یہ تیرا جسم ہے یا صبح کی شہزادی ہے
ظلمتِ شب سے الجھتی ہوئی انگڑائی ہے​

 

[Umair Maqsood]

پو پھٹے رینگتے جھرنے پہ یہ کون آیا ہے
بال بکھرے ہوئے لپٹے ہوئے خواب آنکھوں سے
لوٹ لیں تشنگئ زیست نے نیندیں ورنہ
یوں پیاپے نہ برستی مئے ناب آنکھوں سے​

 

[Umair Maqsood]

اپنی آواز کی لرزش پہ تو قابو پا لو
پیار کے بول تو ہونٹوں سے نکل جاتے ہیں
اپنے تیور بھی سنبھالو کہ کوئی یہ نہ کہے
دل بدلتے ہیں تو چہرے بھی بدل جاتے ہیں​

 

[Umair Maqsood]

آج پنگھٹ پہ یہ گاتا ہوا کون آ نکلا
لڑکیاں گاگریں بھرتی ہوئی گھبرا سی گئیں
اوڑھنی سر پہ جما کر وہ صبوحی اٹھی
انکھڑیاں چار ہوئیں جھک گئیں شرما سی گئیں​

 

[Umair Maqsood]

اداس چاند نے بدلی کی آڑ میں ہو کر
کنارے ملگجے بادل کے کر دیئے روشن
شب فراق میں جیسے تصور رخ دوست
دل حزیں کے اندھیرے میں روشنی کی کرن​