غزل ۔ ہر اک منظر بھگونا چاہتی ہے ۔ عزیز نبیل

[محمداحمد]

غزل

ہر اک منظر بھگونا چاہتی ہے
اداسی خوب رونا چاہتی ہے

مجھے اک پل کی یکسوئی عطا ہو
غزل تخلیق ہونا چاہتی ہے

ان آنکھوں کی کہانی ہے بس اتنی
نظر آواز ہونا چاہتی ہے

تمہارے حسن کے حیرت کدے میں
مری بینائی کھونا چاہتی ہے

کسی کی یاد کی خاموش بارش
مرے سب زخم دھونا چاہتی ہے

وہی معصوم سی بچپن کی حسرت
بہلنے کو کھلونا چاہتی ہے

مری آنکھوں کی یہ بے خواب دنیا
کوئی سپنا سلونا چاہتی ہے

اداسی تھک چکی ہے روتے روتے
ذرا سی دیر سونا چاہتی ہے

عزیز نبیل​

بشکریہ سید انور جاوید ہاشمی

 

[کاشفی]

عمدہ شراکت۔ بہت شکریہ شریکِ محفل کرنے کے لیئے۔۔۔خوش رہیں