عہد پُختہ کیا رِندوں نے یہ پیمانے سے ۔ نصیر الدین نصیر

فرخ منظور

لائبریرین
عہد پُختہ کیا رِندوں نے یہ پیمانے سے
خاک ہو جائیں گے نِکلیں گے نہ میخانے سے

میرے ساقی ہو عطا مُجھ کو بھی پیمانے سے
فیض پاتا ہے زمانہ ترے میخانے سے

یک بہ یک اور بھڑک اُٹھتا ہے سمجھانے سے
کوئی کیا بات کرے آپ کے دیوانے سے

رِند مِل مِل کے گلے روئے تھے پیمانے سے
جب مری لاش اُٹھائی گئی میخانے سے

مُجھ سے پُوچھے کوئی کیا مُجھ پہ جُنوں میں گُزری
قیس و فرہاد کے قِصّے تو ہیں افسانے سے

واعظِ شہر کی توبہ نہ کہیں ٹوٹی ہو
آج "ہُو حق" کی صدا آتی ہے مے خانے سے

كون يہ آگ لگا ديتا ہے، معلوم نہيں
روز اٹھتا ہے دھواں سا مرے كاشانے سے

ترکِ ثابت قدمی ایک قیامت ہو گی
اور گھِر جاؤ گے آلام میں گھبرانے سے

پا لیا آپ کو اِقرارِ مُحبت نہ کریں
بن گئی بات مری آپ کے شرمانے سے

رِند کے ظرف پہ ساقی کی نظر رہتی ہے
اِسے چُلّو سے پلا دی، اُسے پیمانے سے

شیخ کے ساتھ یہ رِندوں پہ قیامت ٹُوٹی
پینے والے بھی نِکالے گئے میخانے سے

باغباں پھونک، مگر شرط يہ ہے گلُشن ميں
آگ پھولوں پہ نہ برسے ميرے خَس خانے سے

اس سے بہتر نہ ملے فرشِ سكينت شايد
ہم پُكاريں گے اُنہيں بيٹھ كے ويرانے سے

بات سُنتے جو نصیرؔ آپ تو اِک بات بھی تھی
بات سُنتے نہیں کیا فائدہ سمجھانے سے

بے سہارا ہوں بُڑھاپے میں کہاں جاؤں نصیرؔ
اب جنازہ ہی اُٹھے گا مرا میخانے سے

(نصیر الدین نصیرؔ)
 
آخری تدوین:

الف نظامی

لائبریرین
پختہ عہد کیا تھا کہ لاگ ان نہیں کرنا لیکن آپ کے اِس تھریڈ نے مجبور کر دیا۔

رِند کے ظرف پہ ساقی کی نظر رہتی ہے
اِسے چُلّو سے پلا دی، اُسے پیمانے سے

بہت خوب!
 

فرخ منظور

لائبریرین
پختہ عہد کیا تھا کہ لاگ ان نہیں کرنا لیکن آپ کے اِس تھریڈ نے مجبور کر دیا۔

رِند کے ظرف پہ ساقی کی نظر رہتی ہے
اِسے چُلّو سے پلا دی، اُسے پیمانے سے

بہت خوب!

آتے رہا کیجیے زیادہ دل پر نہ لیا کریں۔ ہمیشہ خوش رہیں۔
 
Top