طارق شاہ
محفلین
غزلِ
شفیق خلِش
جب گیا شوقِ نظارہ تِری زیبائی کا
کوئی مصرف ہی نہیں اب مِری بینائی کا
دِل سے جب مِٹ ہی گیا تیرا تصوّر جاناں
کچھ گِلہ بھی نہیں باقی رہا تنہائی کا
کی زباں بند، تو رکھّا ہے نظر پر پہرا !
دِل کو احساس ہے ہر دم تِری رُسوائی کا
ساتھ ہے یاس بھی لمحوں میں تِری قُربت کے
کُچھ عجب رختِ سفر ہے تِرے شیدائی کا
آنکھ اوجھل جو ہُوا دِل میں رہُوں گا کب تک
ذکر کیا خاک اب ہوگا تِرے سودائی کا
رات آنے کو ہے، رہتی ہے یہی دِل کو خلِش
دِن جو ڈھلنے کو ہے اب تیرے تمنّائی کا
شفیق خلش