سوچا آپ سے صلاح لے لوں کیا کیا جائے ۔ ۔
آپ کی سماعت کی نذر
اس شہرِبے اماں میں تماشا دکھائ دے
ہر شخص ہی مجھے تو خدا سا دکھائ دے
کل تک جو ماہتاب تھا چہرہ، مگر وہ آج
محرومیوں کی دھوپ سے جھلسا دکھائ دے
یہ دل کہ ڈوبنے کو ہے بےتاب اس قدر
اس کو ہر ایک آنکھ میں دریا دکھائ دے
جامِ جہاں نما ہےمری چشم دوستو
دیکھو جو میری آنکھ سے کیا کیا دکھائ دے
کہتا پھرے ہے حال دلِ بےقرار کا
اس کو توہر شخص مسیحا دکھائ دے
خیرہ ہوئیں ہیں آنکھیں چکاچوند سے مری
دنیا میں چاروں اور اندھیرا دکھائ دے
پربت ضرورتوں کا ہے، ہر بندہء بشر
فکرِ معاش میں میں مجھے ڈوبا دکھائ دے
خوش فہمیوں کا پیڑ تناور جو ہو گیا
بس اپنا آپ ہی مجھے یکتا دکھائ دے
انسانیت ہو جس میں بشر ہے وہی عظیم
اخلاص کے ثمر سے جو جھکتا دکھائ دے
آپ کی شاعری میں وزن اور بحر کے مسائل نہیں ہیں جو کہ بہت خوش آئند بات ہے ۔ وزن پر عبور حاصل ہوجائے تو پھر شعر کے دیگر فنی پہلوؤں پر محنت کرنا اور شعر کو سنوارنا نسبتاً آسان ہوتا ہے ۔ آپ کے اشعار پر نقد و نظر کے توسط سے کچھ عمومی نکات عرض کرتا ہوں ۔ اپنے تجربے اور مشاہدے کی روشنی میں یہ میری ناقص رائے ہے ۔ اسے ایک سینئر کی طرف سے جونیئرز کے لئے مشورہ سمجھئے ۔ شاید کوئی نکتہ آپ کے یا کسی اور کے کام آجائے ۔
۱۔ سب سے پہلا اور سب سے اہم نکتہ یہ ہے کہ شعر "صاف ستھری اور نفیس زبان" کا نام ہے۔ شعری خیال یا مضمون کتنا ہی اعلیٰ کیوں نہ ہو اگر زبان و بیان درست نہیں تو وہ شعر ناکام اور بیکار ہے ۔ ایسا شعر ذوق پر گراں گزرےگا۔ اس کے برعکس بہت سارے اشعار ایسے ہوتے ہیں کہ جن کا مضمون تو معمولی اور سامنے کا ہوتا ہے لیکن وہ مضمون کچھ ایسی زبان اور پیرائے میں بیان کیا گیا ہوتا ہے کہ لوگ اس پر سر دھنتے ہیں ۔ اس بات کو یوں سمجھئے کہ مشروب خواہ کتنا ہی اعلیٰ و عمدہ کیوں نہ ہو اگر اسے ٹوٹے پھوٹے بغیر دُھلے پیالے میں پیش کیا جائے تو کوئی بھی منہ سے نہیں لگائے گا۔ اس کے برعکس سادہ پانی بھی اگر بلوریں اور چمکتے دمکتے منقش خوبصورت پیالے میں پیش کیا جائے تو ہاتھوں ہاتھ لیا جائے گا ۔ یعنی نفیس اور خوبصورت زبان ہی بذاتِ خود بدرجۂ شاعری ہوتی ہے ۔ الفاظ کا درست اور برمحل استعمال ، محاورے اور روزمرہ کی پابندی ، درست گرامر اور معیاری اسلوب وہ بنیادی عناصر ہیں کہ جن سے زبان و بیان میں صفائی اور شستگی پیدا ہوتی ہے جبکہ تشبیہات ، استعارے ، تلمیحات ، علامات (یعنی صنائع بدائع) کے استعمال سے زبان میں نفاست اور خوبصورتی آتی ہے حاصلِ کلام یہ کہ ہر لکھاری کو مسلسل زبان سیکھتے رہنا چاہئے ۔ ادب عالیہ کا مطالعہ ، اساتذہ کے کلام کا تجزیہ اور حسبِ ضرورت لغات اور دیگر لسانی مآخذات سے رجوع کرتے رہنا چاہئے ۔زبان لکھاری کا اوزار ہے سو اس اوزار کو صیقل کرتے بہت رہنا ضروری ہے ۔ زبان و بیان پر عبور ہو تو مدعا بیان کرنا بہت آسان ہوجاتا ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۲۔ شعر کے دونوں مصرع مربوط ہونے چاہئیں یعنی دونوں مصرع مل کر ایک بات یا مضمون کو مکمل کریں ۔ کوشش کیجئے کہ ایک شعر میں ایک ہی مضمون باندھا جائے ۔ شعرگوئی کی ابتدا میں پیچیدہ مضامین باندھنے سے پرہیز کیجئے ۔ یہ بھی یاد رکھئے کہ بڑی بات کہنے کے لئے زیادہ الفاظ اور چھوٹی بات کہنے کے لئے کم الفاظ کی ضرورت ہوتی ہے ۔ چنانچہ چھوٹی بحر میں بڑے مضامین کی سمائی بہت مشکل ہوتی ہے ۔
اس شہرِ بے اماں میں تماشا دکھائی دے
ہر شخص ہی مجھے تو خدا سا دکھائی دے
خدا سا کیا معنی؟! کیا خدا سا بھی کوئی ہے؟! سیدھا سیدھا خدا کہئے ۔ عموماً یہی کہا جاتا ہے کہ فلاں شخص خدا بنا ہوا ہے یہ نہیں کہا جاتا کہ خدا سا بنا ہوا ہے ۔ دوسری بات یہ کہ شہر کے بے اماں ہونے کی کیا معنویت اور غایت ہے؟ کس چیز کو تماشا کہا جارہا ہے؟ دونوں مصرعوں میں دو مختلف باتیں ہیں جو کھینچ تان کر بھی باہم مربوط نہیں ہو رہیں ۔ اگر اس طرح کی کوئی بات کی جائے کہ شہر میں ہر شخص اپنی منوانے اور اپنی چلانے پر تلا ہوا ہے ، ہر ایک پر اپنا فیصلہ تھوپتا ہے ، مجھے تو ہر شخص خدا نظر آتا ہے تو پھربات مکمل اور بامعنی ہوگی ۔ یعنی ہر شخص کے خدا نظر آنے کی کوئی نہ کوئی توجیہہ تو دینا ہوگی شعر میں ۔
یہ دل کہ ڈوبنے کو ہے بےتاب اس قدر
اس کو ہر ایک آنکھ میں دریا دکھائی دے
یعنی یہ دل (کسی کی آنکھوں کے) دریا میں ڈوبنے کے لئے بیتاب ہے اور اس دل کو ہر ایک آنکھ میں دریا دکھائی دے رہا ہے۔ یہ مکمل بات تو نہ ہوئی۔ اس میں معنویت کہاں ہے؟ یہ تو سپاٹ سا ایک بیان ہوگیا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۳۔ شاعری میں مدعا کی مناسبت سے الفاظ کا انتخاب ضروری ہے ۔ الفاظ کا درست محلِ استعمال ادب عالیہ اور اساتذہ کا کلام پڑھنے سے معلوم ہوتا ہے ۔ یہ بات یاد رکھنے کی ہے کہ شعر میں الفاظ کے معنی کے بجائے ان کے مفہوم سے کام لیا جاتا ہے ۔ ذرا تصور کیجئے کہ غالب کا یہ مشہور شعر اگر یوں لکھا جائے:
مرگ کا ایک دن معین ہے
نیند کیوں رات بھر نہیں آتی
تو یہ شعر پاتال میں گرجائے گا کیونکہ یہاں مرگ یا انتقال یا وفات کا محل نہیں ہے بلکہ موت کا محل ہے اگرچہ مذکورہ بالا تمام الفاظ ہم معنی ہیں لیکن ان کا مفہوم اور محلِ استعمال الگ الگ ہے۔ اسی كو انگریزی میں connotationکہتے ہیں۔ مرگ کا لفظ اردو میں صرف تراکیب میں استعمال ہوتا ہے ، مفرد نہیں بولا جاتا۔ اسی طرح قابل اجمیری کا یہ مشہور شعر دیکھئے: وقت کرتا ہے پرورش برسوں ۔ حادثہ ایک دم نہیں ہوتا ۔ اس شعر میں برسوں کی جگہ دن رات کہہ کر دیکھئے ۔ شعر غلط ہوجائے گا۔ یہاں پرورش کی شدت کے بجائے پرورش کی مدت دکھانا مقصود ہے اس لئے رات دن کے بجائے برسوں یا صدیوں کا لفظ مناسب ترین ہے ۔
خوش فہمیوں کا پیڑ تناور جو ہو گیا
بس اپنا آپ ہی مجھے یکتا دکھائی دے
یکتا کا لفظ کسی شے کے لئے کسی پس منظر میں استعمال ہوتا ہے ۔ مثلاً پوری محفل میں یکتا ، کائنات میں یکتا ، گلشن میں یکتا وغیرہ ۔ اگر یکتا استعمال کرنا ہے تو اس کا پس منظر بنائیے ۔ ورنہ کوئی اور مناسب متبادل استعمال کیجئے ۔
انسانیت ہو جس میں بشر ہے وہی عظیم
اخلاص کے ثمر سے جو جھکتا دکھائی دے
انسانیت اور عظمتِ بشر کا تعلق تو سمجھ میں آتا ہے لیکن اخلاص کی یہاں کیا معنویت ہے ؟ کس چیز میں اخلاص ؟! بے غرضی اور ایثار بہتر الفاظ ہیں اس مقام پر ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۴۔ جہاں تک ممکن ہو شعر میں الفاظ کی ترتیب کو نثر کی طرح رکھنا چاہئے ۔ نثری صورت زبان کی فطری صورت ہوتی ہے ۔ وزن کی پابندی کی وجہ سے شعر میں لفظی ترتیب کا کچھ نہ کچھ آگے پیچھے ہونا ( یعنی تعقید) تو لازمی سی بات ہے لیکن تعقید جتنی کم ہو اتنا اچھا ہے ۔ شعر اگر الجھا ہوا ہو ، لفظی تعقید زیادہ ہو تو شعر کی نثر بنا کر پرکھ لینا چاہئے کہ گرامر کی کوئی غلطی تو نہیں ۔ شعر میں لسانی اغلاط کی ذرہ برابر گنجائش نہیں ہے ۔
کل تک جو ماہتاب تھا چہرہ، مگر وہ آج
محرومیوں کی دھوپ سے جھلسا دکھائی دے
اس شعر کی نثر بنا کر دیکھئے تو معلوم ہوگا کہ گرامر (نحو) کی غلطی ہے۔" جو چہرہ کل تک ماہتاب تھا وہ آج محرومیوں کی دھوپ سے جھلسا دکھائی دیتا ہے "۔ اس میں "مگر" کی کہاں ضرورت ہے؟! اس جملے میں مگر کا کوئی محل نہیں ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۵ ۔ نظم اور نثر میں کسی بات کو بیان کرنے کے لئے کئی الفاظ اور فقرے استعمال کئے جاتے ہیں لیکن ان میں چند الفاظ کلیدی نوعیت کے ہوتے ہیں کہ جنہیں استعمال کئے بغیر بات مکمل نہیں ہوتی ۔ ان الفاظ کو حذف نہیں کیا جاسکتا ۔ ان کا استعمال ضروری ہے کہ انہیں کہے بغیر ابلاغ نہیں ہوتا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۶۔ جہاں تک ممکن ہو سکے شعر میں بات مکمل ہونی چاہئے ۔ شعر پڑھنے کے فوراً بعد قاری کے ذہن میں کیا ، کون ، کسے ، کدھر وغیرہ قسم کا سوال نہیں اٹھنا چاہئے ۔
کہتا پھرے ہے حال دلِ بےقرار کا
اس کو توہر شخص مسیحا دکھائی دے
کون کہتا پھرے ہے؟ اس کو کس کو؟ اس شعر میں فاعل کا ذکر کئے بغیربس ایک بیان دے دیا گیا ہے ۔ اب قاری اس سے کیا سمجھے؟
خیرہ ہوئیں ہیں آنکھیں چکاچوند سے مری
دنیا میں چاروں اور اندھیرا دکھائی دے
کس چیز کی چکا چوند؟ یہ بتائے بغیر تو بات نامکمل ہے اور معنی سے خالی ہے ۔ دوسری بات یہ کہ چاروں طرف ، چاروں جانب یا چار سمت معیاری زبان ہے اور معروف اسلوب ہے ۔ "چاروں اور" ساڑھے تیرہ ہزار سال پرانی زبان ہے ۔ چاروں اور اسی صورت میں اچھا لگے گا جب نظم میں ہندی لفظیات غالب ہوں مثلاً کوئی گیت یا دوہا وغیرہ ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۷۔ شعر میں رعایات کا التزام ابلاغ کو بڑھاتا ہے اور قاری کے دل و دماغ پر ایک تصویر سی نقش کردیتا ہے ۔ رعایات کا التزام جتنا مربوط ہوگا شعر اتنا ہی موثر اور بلیغ ہوگا ۔
پربت ضرورتوں کا ہے، ہر بندۂ بشر
فکرِ معاش میں میں مجھے ڈوبا دکھائی دے
بندۂ بشر کی ترکیب سے قطع نطر اس شعر میں رعایات کا لحاظ نہیں ہے ۔ بندہ بشر کو ضرورتوں کا پہاڑ کہنے کے بعد دوسرے مصرع میں کوئی ایسی رعایت لانا ضروری ہے کہ جس سے خیال مربوط اور لفظی تصویر مکمل ہوجائے ۔ مثلاً یہ کہ فکرِ معاش کی جھیل میں یا دریا میں یا سمندر میں ڈوبا دکھائی دیتا ہے ۔ تواس طرح پہاڑ اور دریا میں ایک ربط پیدا ہوجاتا ہے ۔ اگرایسی کوئی رعایت استعمال نہ کی جائے تو پھر بندہ بشر کو پہاڑ کہنے کی کیا معنویت رہ جاتی ہے؟! بندہ بشر کو ضرورتوں کا جنگل بھی کہا جاسکتا ہے۔ یعنی کچھ بھی کہا جاسکتا ہے ، پہاڑ کی کیا قید؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۸۔ شعر میں تشبیہ ، استعارے ، تلمیح ، علامت وغیرہ کے استعمال سے ابلاغ بڑھ جاتا ہے اور شعر میں زور پیدا ہوتا ہے۔ اس لئے شاعر کو تشبیہ اور استعارے کی بنیادی شرائط کا بخوبی علم ہونا ضروری ہے ۔ تشبیہہ اور استعارے کے لئے معقولیت اولین شرط ہے ۔
جامِ جہاں نما ہےمری چشم دوستو
دیکھو جو میری آنکھ سے کیا کیا دکھائی دے
جامِ جہاں نما میں جھانک کر جہان بھر کو دیکھا جاتا ہے ۔ جام خود کچھ نہیں دیکھتا ۔ سو شاعر اپنی آنکھ کو اگر جامِ جہاں نما کہہ رہا ہے تو مطلب یہ ہوگا کہ میری آنکھ کے جام میں جھانک کر دیکھو تو سب کچھ نظر آئے گا ۔ چنانچہ دوسرے مصرع میں یہ کہنا کہ میری آنکھ سے دیکھو تو سب کچھ نظر آئے گا بے معنی ہے ۔ جہاں نما اور جہاں بین کا فرق ملحوظ رہے ۔ میری آنکھ کے بجائے اگر یوں کہا جائے کہ "محبوب کی آنکھ جامِ جہاں نما ہے ، اُس کی آنکھ میں دیکھو تو کیا کیا منظر دکھائی دیتا ہے" تو تشبیہ معقول اور منطقی لحاظ سے درست ہوجائے گی ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
