اللہ آپ کے ابو کو سلامت رکھے، تابش بھائی۔ اللہ آپ کو ان کی آنکھوں کی ٹھنڈک بنائے۔ ماں جی کو سکھی اور خوش رکھے۔ آمین۔
ہمارے ہاں ایک کہاوت ہے کہ ہر کوئی اپنے مردوں کو روتا ہے۔ میرا المیہ کم و بیش
محمد وارث بھائی جیسا ہے۔ ابو جان کی وفات کے وقت میں انیس برس کا تھا۔
انیس برس کا ایک جذباتی اور گاؤدی لڑکا۔ جسے یہ بھی معلوم نہیں تھا کہ اس کا باپ کس درجے اور رتبے کا آدمی ہے۔ ابو جان کے کردار کا اندازہ فقط اسی بات سے ہو سکتا ہے کہ انھوں نے کبھی اپنی اولاد کو اپنے خیالات و افکار پر تنقید سے نہیں روکا۔ وہ ایک دانائے راز اور حکیم انسان تھے۔ مجھے خدا جانے رازدار سمجھتے تھے یا اندھوں میں کانا راجا۔ روز رات کو باتیں ہوتیں۔ لمبی لمبی۔ باقی سب سو جاتے۔ ابو اور میں بحثتے رہتے۔ میں ادھر ادھر کی ہانکتا۔ ابو مسکراتے اور تصحیح کرتے۔ میں لڑتا۔ وہ ہنس کے کہتے، "ایہہ کنجر ساہ نئیں لین دیندا مینوں!"
وفات سے کوئی ایک ماہ قبل اپنے انیس سالہ بیٹے کو انگلی پکڑ کے سڑک عبور کرائی اور جوتا خرید کے دیا۔ اور خدا کی قسم میں نے آج تک خود جوتا نہیں خریدا۔ امی جائیں گی۔ بھائی جائے گا۔ بیگم لا دیں گی۔ میرا جی نہیں چاہتا شاید کہ میں بڑا ہو جاؤں۔ کیا کروں گا بڑا ہو کر؟
ابو نے میرے ہاتھوں میں جان دی۔ ان کی آنکھ اس دنیا میں جس آخری شخص پر اٹھی وہ میں تھا۔ میں اس کی تاب کہاں لا سکتا تھا؟ نیم دیوانگی کی حالت میں چند سال گزرے۔ پاگل پن کے اندھیاروں میں کبھی ہوش کی کرن چمکتی تو میں ان عورتوں کو دیکھتا جو لپک کر اپنے بچوں کو پکڑتیں اور مجھ سے بھاگتے ہوئے کہتیں، "ایہہ کملا اے پتر۔تو ارانہہ آ جا۔"
زمانے کی گرد زخموں پر عطائی کے دیے ہوئے مرہم کی طرح جم گئی تو نئے زخموں کا موسم آیا۔ اب لوگ ملتے ہیں۔ کہتے ہیں تمھارا باپ ولی تھا۔ فقیر ملتے ہیں۔ کہتے ہیں اس کی پرواز بہت اونچی تھی۔ دانشور ملتے ہیں۔ کہتے ہیں وہ سرتاپا دماغ تھا۔ غریب ملتے ہیں۔ کہتے ہیں وہ مسیحا تھا۔ لیکن کوئی کمبخت ایسا نہیں ملتا جو بتائے وہ شخص کہاں گیا؟
مجھے آج بھی لگتا ہے ابو اسی دنیا میں کہیں ہیں۔ کراچی میں۔ لاہور میں۔ کہیں اور۔ مگر یہیں کہیں۔ ہمارے حال سے واقف ہیں۔ خواب میں اکثر دیکھتا ہوں کہ وہ آ گئے ہیں۔ دل کہتا ہے خواب پورا ہونا چاہیے۔ دماغ کہتا ہے وہ زمین کے نیچے ہیں۔ گیارہ برسوں میں نہیں آئے تو اب کہاں سے آئیں گے؟ لیکن دماغ کی کون سنتا ہے؟
اللہ ماں جی کو سلامت رکھے۔ انھوں نے ایک ایسے شخص کی فرقت برداشت کی جس کی عظمتوں کا انھیں مجھ سے زیادہ اندازہ ہے۔ اور پھر مجھ جیسے بیٹے کو بھی سنبھالا۔ اللہ سب کے ماں باپ کو سکھ دے۔ دونوں جہانوں میں سرفراز کرے۔ آمین۔
