دامنوں کو باندھ لیتے کیوں گریبانوں کے پاس - احسن مارہروی

[کاشفی]

غزل​

(شاگرد خصوصی بلبل ہند فصیح الملک حضرت داغ دہلوی مرحوم و مغفور رحمتہ اللہ علیہ جناب حضرت احسن مارہروی مرحوم و مغفور رحمتہ اللہ علیہ)​

​

مرحوم کی آخری غزل جو انہوں نے جولائی 1940ء میں لکھی تھی​

​

دامنوں کو باندھ لیتے کیوں گریبانوں کے پاس​

عقل اگر ہوتی گرہ کی تیرے دیوانوں کے پاس​

​

بے تکلف برہمن آئیں مسلمانوں کے پاس​

مسجدیں تعمیر ہوتی ہیں صنم خانوں کے پاس​

​

وصل میں بھی سوزِ فرقت کا اثر جاتا نہیں​

شمع رو رو کر جلاکرتی ہے پروانوں کے پاس​

​

دب سکی پستی بلندی کی زبردستی سے کب​

جھونپڑے اکثر نظر آتے ہیں ایوانوں کے پاس​

​

خاک مرقد نے شہیدوں کی بکھیرا ہے جنہیں​

ہیں وہیں درے دُر غلطاں بیابانوں کے پاس​

​

اُٹھ گئے دنیا سے بیچارے یہی حسرت لئے​

تم کبھی آکر نہ بیٹھے اپنے مہمانوں کے پاس​

​

تیرے دیوانوں کا آبادی میں جی لگتا نہیں​

بستیاں اُن کی بسا کرتی ہیں ویرانوں کے پاس​

​

محفلِ پیرمغاں جمتے ہی دیکھا یہ جماؤ!​

خم کے پہلو میں سبو ہیں، شیشے پیمانوں کے پاس​

​

آج کل احسن دروغ و رشک و غیبت کے سوا​

رہ گئی ہیں اور کیاباتیں سخندانوں کے پاس​

 

[فرخ منظور]

واہ! کیا خوبصورت غزل ہے۔ شکریہ کاشفی صاحب۔ اور ایوارڈ حاصل کرنے کی بہت مبارک باد۔

 

[کاشفی]

واہ! کیا خوبصورت غزل ہے۔ شکریہ کاشفی صاحب۔ اور ایوارڈ حاصل کرنے کی بہت مبارک باد۔

غزل پسند آئی۔۔ بیحد شکریہ جناب سخنورصاحب! ۔۔ ایوارڈ کی مبارکباد کے لیئے بھی بیحد شکریہ۔۔۔ خوش رہیں۔۔ کچھ سوالات پوچھ رہا ہوں تہنیتی پیغام والی لڑی میں۔۔ جواب دیجئے گا۔۔۔