طارق شاہ
محفلین
غزل
تیری نظروں سے اُلجھ جانے کو جی چاہتا ہے
پِھر وہ اُلفت بھرے پیمانے کو جی چاہتا ہے
تیرے پہلُو میں دَبک جانے کو جی چاہتا ہے
غم سے کُچھ دیر نِکل آنے کو جی چاہتا ہے
دِل میں ڈر سے دَبی اِک پیار کی چنگاری کو
دے ہَوا، شعلہ سا بھڑکانے کو جی چاہتا ہے
جاں بچانے ہی ہم محفوظ مقام آئے تھے!
پھر مُصیبت میں کہاں جانے کو جی چاہتا ہے
اُن کو ہم سے تو کبھی پیار رہا تھا ہی نہیں!
یہ حقیقت سہی جھٹلانے کو جی چاہتا ہے
لوگ جاتے ہیں جہاں مانگنے دُنیا بھر سے!
جاکے دامن وہیں پھیلانے کو جی چاہتا ہے
مُلتَمس اُن سےپھر اِک بار رہوں جاکے خلشؔ
دل پھر اِنکار پہ تڑپانے کو جی چاہتا ہے
شفیق خلشؔ