محترمہ
صائمہ شاہ ۔ ۔ حقیقت اور صاف گوئی کو تو پہلے ایک سائیڈ پر رکھتے ہیں کہ اعتراض اس پر نہیں ہے لیکن یہ حقیقت اور صاف گوئی کس طرح سے کی گئی میرا اعتراض اس پر ہے۔ کیا آپ سمجھتی ہیں کہ اتنا شدید ردعمل دے کر آپ نے صاحب مراسلہ کا کچھ بھلا کر دیا!!
میرے خیال میں ایسا نہیں ہے۔ اور اس پر مستزاد کہ بقول آپ کے تعصب ، فرضی کہانیاں اور فتووں کے معاشرہ میں سے نکلا ہوا کوئی بھی شخص آپ کا مراسلہ پڑھ کر راہ راست پر آنے کی کوشش کرے گا یا مزید سخت ہو جائے گا؟؟۔ میں اسی پاکستانی معاشرے میں رہتا ہوں اور یہاں کی عمومی سوچ سے خوب آگاہ ہوں سو اس لئے آپ کو بتائے دیتا ہوں کہ شدید رد عمل سے اصلاح کی توقع محال ہے یہاں۔
جہادی ذہن تو سختی نرمی کسی بھی طرح سے اصلاح کی طرف نہ آئیں گے لیکن کئی نوجوان متجسس ذہن ایسی سختی سے دور بھاگ جائیں گے اور آپ کا مقصد یعنی پاکستان کو نفرت انگیز رویوں سے بچانا وہیں فوت ہو جائے گا۔ ایک انتہا سے بچانے کیلئے دوسری انتہا پر چلے جانا مناسب رویہ نہیں ہے۔
میں خود اپنی مثال دیے دیتا ہوں کہ جب میں اردو محفل پر نیا نیا آیا تھا تو کئی مراسلے پڑھ کر میں حیران ہو جاتا تھا۔ یہ جو باتیں میں آپ سے کر رہا ہوں ان میں سے زیادہ تر میں نے آپ اور آپ جیسے کئی دوسرے معزز محفلین سے سیکھی ہیں۔ اور ان کے سیکھنے کی وجہ صرف یہ کہ خوش قسمتی سے مجھے پیار ہی سے سمجھایا بجھایا گیا۔ اگر آغاز میں ہی کوئی ایسا سرزنش بھرا مراسلہ سامنے آتا تو عین ممکن ہے کہ میں بھی باغی ہو کر سمجھنے سمجھانے کی حدوں سے باہر ہو جاتا۔
دوسری بات یہ کہ اردو محفل ایک فورم ہے اور یہاں ہر بندہ اپنے رائے کا اظہار کر سکتا ہے اور اختلاف رائے بھی کیا جا سکتا ہے لیکن جب بات اخلاقیات کے دائرے سے باہر ہونے لگے تو کہاں کی محفل اور کہاں کا فورم۔ آپ مجھے دوسرے کئی محفلین کی طرح بہت عزیز ہیں اور اس کی زیادہ وجہ آپ کا محفل میں مثبت رویہ ہے۔ اسی وجہ سے مجھے آپ کے مراسلے کے انداز پر حیرت بھی ہوئی اور دکھ بھی ۔ ۔جس کا میں نے فوراً اظہار بھی کر دیا۔
امید یہی ہے کہ آپ اور دوسرے محفلین احقر کی رائے کی قدر کرتے ہوئے مثبت رویہ اپنانے ہی کو ترجیح دیں گے اور ایک دوسرے سے مخاطب ہوتے وقت اخلاقیات کا خیال رکھیں گے۔ کہ یہی رویہ محفل میں نفرتوں کے قلع قمع کا ضامن ہے۔
