عباس تابش انتخاب ِعباس تابش

[فلک شیر]

جانے والے نے کہا جی کو برا مت کیجے
اس سے بہتر ہے کوئی اور محبت کیجے

تو جو ہر بات پہ دیتا ہے پرندوں کی مثال
اس کا مطلب ہے، ترے شہر سے ہجرت کیجے​

 

[فلک شیر]

سکوتِ دہر رگوں تک اتر گیا ہوتا
اگر میں شعر نہ کہتا تو مر گیا ہوتا​

 

[فلک شیر]

ہم کو دل نے نہیں حالات نے نزدیک کیا
دھوپ میں دور سے ہر شخص شجر لگتا ہے​

 

[فلک شیر]

ایک مدت سے مری ماں نہیں سوئی تابش
میں نے اک بار کہا تھا مجھے ڈر لگتا ہے​

 

[فلک شیر]

عشق ہی کارِ مسلسل ہو گیا
زندگی کا مسئلہ حل ہو گیا

میرے آنسو میرے اندر ہی گرے
رونےسے جی اور بوجھل ہو گیا

آسماں پہلے نہیں تھا بے ستوں
لیکن اب دستِ دعا شل ہو گیا

گھومتا پھرتا ہے تنہا رات کو
سردیوں کا چاند پاگل ہو گیا​

 

[فلک شیر]

ضرورت ہی نہیں دشمن کی تابش
مجھے میری تن آسانی بہت ہے​

 

[فلک شیر]

بچھڑ گیا وہ جدائی کے موڑ سے پہلے
کہ اس کے بعد محبت میں صرف خواری تھی​

 

[فلک شیر]

وہی کہ جس نے عطا کی گلاب کو خوشبو
مجھے بھی شوقِ اذیت سے بھر دیا اس نے
​

 

[فلک شیر]

یہ جو اس سے مجھے محبت ہے
اک ضرورت بلا ضرورت ہے

اپنی تعریف سن نہیں سکتا
خود سے مجھ کو بلا کی وحشت ہے

یہ مرا یوں ہی بولتے رہنا
ان کہی بات کی وضاحت ہے

اپنی تلوار تیز رکھتا ہوں
جانے کس سے مجھے عداوت ہے

دکھ ہوا آج دیکھ کر اس کو
وہ تو ویسا ہی خوبصورت ہے

بات ابھی کی ابھی نہیں ہے یاد
ایک لمحے میں کتنی وسعت ہے​

 

[فلک شیر]

کیسے کہوں کی اپنی زباں بولتے ہیں ہم
الفاظ لاکھ اپنے ہوں لہجہ کسی کا ہے​

 

[فلک شیر]

اس کا مطلب ہے یہاں اب کوئی آئے گا ضرور
دم نکلنا چاہتاہے خیر مقدم کے لیے

اس خزاں میں بھی وہی کاغذ کے پرزے جوڑ کر
اک شجر میں نے بنایا اپنے موسم کے لیے​

 

[فلک شیر]

کوئی اندر کی گھٹن کا بھی علاج
گالیاں کاغذ پہ لکھ کر پھینک دے​

 

[فلک شیر]

یہ تیرا دھیان کسی وقت کام آئے گا
ابھی لپیٹ کے رکھا ہے بادباں کی طرح​

 

[فلک شیر]

یہ جان کر کہ بالآخر تو مجھ کو گرنا ہے
میں خستگی کو چھپاتا رہا مکاں کی طرح

مرے ہی گھر میں مرا معتبر حوالہ ہے
کہیں نہیں ہے کوئی سچ بھی میری ماں کی طرح​

 

[فلک شیر]

تہمت اتا ر پھینکی لبادہ بدل لیا
خود کو ضرورتوں سے زیادہ بدل لیا

جب دیکھا رہزنوں کی توجہ نہیں ادھر
شہزادگی سے خرقہ سادہ بدل لیا​

 

[فلک شیر]

اب کون سیرِ ماہ کرے رات رات بھر
ہر خانماں خراب کو گھر دے دیا گیا​

 

[فلک شیر]

ابھی سادہ ورق پر نام تیرا لکھ کے بیٹھا ہوں
ابھی اس میں مہک آنی ہے تتلی نے اترنا ہے​

 

[فلک شیر]

اک دربدری ہم کو بھی لاحق ہے مگر ہم
کونجون کی طرح شور مچایا نہیں کرتے

یہ لوگ بھی قامت میں صنوبر کی طرح ہیں
اُگتے ہیں جہاں، وہاں سایہ نہیں کرتے​

 

[فلک شیر]

دیکھا نہ جائے دھوپ میں جلتا ہوا کوئی
میرا جو بس چلے کروں سایہ درخت پر

سب چھوڑے جا رہے تھے سفر کی نشانیاں
میں نے بھی ایک نقش بنایا درخت پر​

 

[فلک شیر]

آڑے آتی ہے یہ حساس طبیعت ورنہ
جی تو کرتا ہے یہاں روز تباہی آئے

راستہ اتنابھی ویراں نہیں دیکھا جاتا
کوئی خوشبو، کوئی جھونکا ، کوئی راہی آئے​