اردو میں تذکیر و تانیث کو سمجھنا

محترم محفلین

میرے ساتھ مسئلہ یہ ہے کہ لکھنے اور بولنے میں تذکیر و تانیث کی غلطی کر جاتا ہوں۔میں کئی مہینوں سے اس کا آسان حل تلاش کر رہا ہوں کہ کس طرح میں اپنی اردو درست کروں۔ تذکیر و تانیث کو سمجھنے کے لیے کلیدی اصول کیا ہو سکتا ہے؟ اور وہ کیا طریقۂ کار ہے جس کے ذریعہ ہم کسی لفظ کی جنس کی شناخت بآسانی کر سکیں؟

ماہرین اردو ادب سے رہنمائی مطلوب ہے۔

 

آپ موقع کی مناسبت سے اس کا خود ہی تعین کر سکتے ہیں‘ مثلاً اگر آپ ایک کبوتر دیکھیں تو اس کے سامنے دانہ پھینک دیں‘ اب آپ کے سامنے درج ذیل دو صورتیں ہوں گی :-
(1) اگر وہ دانہ چگتا ہے تو مذکر ہوگا۔
(2) اگر وہ دانہ چگتی ہے تو مؤنث ہوگی۔

 

اور اگر وہ دانہ چونچ میں لے کر اُڑ جائے تو؟

 

ایک کام تو یہ کریں کہ اپنی غلطیوں سے سیکھنا شروع کریں ۔ جب کوئی آپ کو کسی لفظ پر ٹوکے تو آپ لغات سے اس بات کی تحقیق کریں اور پھر اگر ضرورت ہو تو اپنی اصلاح کر لیں۔اور اس اصلاح کو یاد رکھنے اور عادت میں ڈالنے کے لئے دانستہ اُس الفاظ کا درست استعمال روا رکھیے۔

کچھ الفاظ علاقوں کے اعتبار سے الگ الگ برتے جاتے ہیں لیکن ایسے الفاظ بہت کم ہیں۔

 

شاید یہ کتابیں مفید ثابت ہوں

نامعلوم مصنف | ریختہ

جلالؔ لکھنوی | ریختہ

 

مذکر اورمونث کے بنیادی اصول

1. تمام دنوں اور مہینوں کے نام مذکر ہیں لیکن جمعرات مونث ہے۔
2. تمام آوازیں مونث ہیں جیسے سائیں، سائیں، کائیں، کائیں اورمَیں، مَیں وغیرہ۔
3. زبانوں کے نام ہمیشہ مونث بولے جاتے ہیں جیسے اردو، عربی، فارسی، انگریزی، فرانسیسی، پنجابی، سندھی، پشتو، بلوچی، سرائیکی اورہندکو وغیرہ۔
4. تمام نمازوں کے نام مونث ہیں جیسے فجر، ظہر، عصر، مغرب، عشاء، نماز جنازہ اور نماز قضا وغیرہ۔
5. دھاتوں اور جواہرات کے نام مذکر ہیں جیسے سونا، لوہا، تانبا، پیتل اور ہیرا لیکن چاندی اور قلعی مونث ہیں۔
6. تمام سیاروں کے نام مذکر ہیں جیسے مریخ، عطارد، زحل اورمشتری، لیکن زمین مونث ہے۔
7. تمام پہاڑوں، سمندروں اوردریائوں کے نام مذکر لیکن گنگا اور جمنا مونث ہیں۔
8. تمام ملکوں، شہروں اور براعظموں کے نام مذکر ہیں جیسے پاکستان، لاہوراورایشیا البتہ دلی کو مونث بولا جاتا ہے لیکن دہلی کو مذکرہی بولتے ہیں۔

ربط

 

محترم عدنان عمر صاحب ! کئی بار ایسا بھی ہوتا ہے کہ صرف نام سے کسی کی تذکیر و تانیث کا اندازہ لگانے اور بعدہٗ اصل فرد کے سامنے آنے پر ہمیشہ نتیجہ اُلٹ نکلتا ہے۔ اگر یہ بھی واضح کردیں کہ درج ذیل نام مذکر ہیں یا مؤنث تو کم از کم پاکستان میں اُردو بولنے والوں کی ایک بہت بڑی مشکل حل ہو جائے گی اور خفت سے بچ جائیں گے جو کہ اکثر افراد کا مقدر ہوتی ہے۔
(1) امتیاز (2) خورشید (3) فرحت (4) تحسین (5) ممتاز (6) کوثر وغیرہ

 

جناب ٹاپنگ ماسٹر صاحب! بعض نام واقعی ایسے ہوتے ہیں جنھیں پڑھ کر صاحبِ نام کی جنس کا تعین نہیں کیا جاسکتا۔ اس لیے آپ کی دی ہوئی ناموں کی فہرست میں ہم اضافہ تو کرسکتے ہیں کوئی کمی نہیں کرسکتے۔
ویسے اس قسم کے ناموں کا چکر پاکستان میں ہی نہیں شاید دنیا بھر میں ہے۔ پڑوسی ملک ہندوستان میں گگن، سمرن، دلجیت وغیرہ بھی اسی "ٹائپ" کے نام ہیں۔

 

ایمن؟

 

آپ پیچھے سے پٹھان تو نہیں؟

 

جزاک اللہ خیرا
ان تمام افراد کا ممنون و مشکور ہوں جنہوں نے میری رہنمائی فرمائی۔

 

نہیں محترم میں پٹھان نہیں۔ میں جس علاقہ میں رہتا ہوں اس کے حساب سے تو میری اردو الحمد للہ اچھی ورنہ یہاں کے افراد
آیا کو -- آیس
گیا کو -- گئیس
آئے گا کو -- آبے گا
کہتے ہیں
اور مذکر مؤنث کی بات تو چھوڑ دیں۔

یہی وجہ سے کہ تذکیر و تانیث کے معاملہ میں کچھ علاقائی اثر ہے۔
وہ تو غنیمت ہے کہ کتابوں کا مطالعہ کر کے اور اردو والوں کے ساتھ گفتگو کر کے تھوڑی بہت سدھار ہو گئی۔

 

کئی پختون احباب تذکیر و تانیث کے حوالے سے اُردو زبان سے کچھ زیادہ متاثر معلوم نہیں ہوتے ہیں۔ ایک صاحب نے ہمیں لاجواب کر دیا۔ فرمانے لگے، بتاؤ، چاند اور سورج میں سے مذکر کون معلوم ہوتا ہے۔ ہم نے کہا، سورج کو ہم کم از کم مونث نہیں کہہ سکتے۔چاند رعنائی اور دلکشی کے باعث اس کا زیادہ سزاوار ہے تو فرمایا، پشتو زبان میں چاند مونث اور سورج مذکر ہے۔ اب آپ ذرا اُردو زبان پر غور کر لیں جس میں سورج بھی مذکر ہے اور چاند بھی مذکر ہے اور الزام ایک پختون پر ہے کہ اسے اردو زبان کے مذکر و مونث کی سمجھ نہیں ہے۔ کیا انصاف ہے!

 

ایک نگاہ اِدھر بھی، جناب سرفراز احمد

 

شاہ صاحب سیریس ہو گئے!