اردو رباعیات

[کاشفی]

دل جن کا ہے آہن کی طرح سخت و سیاہ
وہ لطفِ سخن سے نہیں ہوتے آگاہ

بد اصل کو کیا نامِ خدا کوئی بتائے
بندوق کا طوطہ نہ کہے حق اللہ
(ذوق رحمتہ اللہ علیہ)

 

[کاشفی]

اے زاہدو تم سے کیا جھگڑ کر لوں میں
غصہ سے کروں کس لئے دل کو خوں میں

میخوار و صنم پرست کہتے ہو مجھے
تم ہو تم ہو ، جو کچھ کہ ہوں میں ہوں میں
(ذوق رحمتہ اللہ علیہ)

 

[کاشفی]

اے ذوق کرے گا کوئی دنیا کیا ترک
دنیا ہے بری بلا ارے کیسا ترک

کیا دخل کہ ہو ترک کسی سے دنیا
جب تک نہ کرے آپ اُسے دنیا ترک
(ذوق رحمتہ اللہ علیہ)

 

[کاشفی]

پُتلی کی طرح نظر سے مستور ہے تو
آنکھیں جسے ڈھونڈھتی ہیں وہ نور ہے تو

نزدیک رگِ جاں سے ہے اُس پر یہ بُعد
اللہ اللہ کس قدر دور ہے تو
(میرببر انیس اعلی اللہ مقامہ)

 

[کاشفی]

خالی ہے مکاں، مکیں پیدا کردے
دل میں میرے دل نشیں پیدا کردے

اے مردہ دلوں کو زندہ کرنے والے
شکی دل میں یقیں پیدا کردے
(ابولاعظم سید احمد حسین امجد حیدرآبادی)

 

[کاشفی]

اب روح قدم قدم پہ اتراتی ہے
ہر سانس میں تازہ زندگی پاتی ہے

اک روز قدم حضور کے چومے تھے
اب تک میرے منہ سے بوئے عطر آتی ہے
(ابولاعظم سید احمد حسین امجد حیدرآبادی)

 

[کاشفی]

لے لے کے خدا کا نام چلّاتے ہیں
پھر بھی اثر دعا نہیں پاتے ہیں

کھاتے ہیں حرام لقمہ پڑھتے ہیں نماز
کرتے نہیں پرہیز دوا کھاتے ہیں
(ابولاعظم سید احمد حسین امجد حیدرآبادی)

 

[کاشفی]

بحر متلاطم میں بہا جاتا ہوں
ہر دم طرف لحد کھینچا جاتا ہوں

بازار فنا میں کیا ٹھہرتا ہے مجھے
میں صرف کفن لے کے چلا جاتا ہوں
(ابولاعظم سید احمد حسین امجد حیدرآبادی)

 

[کاشفی]

غم میں ترے زندگی بسر کرتا ہوں
زندہ ہوں، مگر تیرے لئے مرتا ہوں

تیری ہی طرف ہر اک قدم اُٹھتا ہے
ہر سانس کے ساتھ تیرا دم بھرتا ہوں
(ابولاعظم سید احمد حسین امجد حیدرآبادی)

 

[کاشفی]

اس سینہ میں کائنات رکھ لی میں نے
کیا ذکر صفات، ذات رکھ لی میں نے

ظالم سہی، جاہل سہی، نادان سہی،
سب کچھ سہی، تیری بات رکھ لی میں نے
(ابولاعظم سید احمد حسین امجد حیدرآبادی)

 

[کاشفی]

ہیں مستِ مے شہود تو بھی میں بھی
ہیں مدّعی نمود، تو بھی میں بھی

یا تو ہی نہیں جہاں میں یا میں ہی نہیں
ممکن نہیں دو وجود، تو بھی میں بھی
(ابولاعظم سید احمد حسین امجد حیدرآبادی)

 

[کاشفی]

خالق ہے کوئی ارض و سما شاہد ہے
اَنتَ کے لئے اپنا اَنا شاہد ہے

اس پر بھی اگر کوئی نہ مانے نہ سہی
خود، اپنے وجود پر، خدا شاہد ہے
(ابولاعظم سید احمد حسین امجد حیدرآبادی)

 

[mgkr11]

ہر خواہش و عرض و التجا سے توبہ
ہر فکر سے ذکر سے دُعا سے توبہ
از بس کہ محال ہے سمجھنا اُس کا
جو آئے سمجھ میں اُس خدا سے توبہ
(اسمٰعیل میرٹھی)

 

[mgkr11]

یارب کوئی نقشِ مدعا بھی نہ رہے
اور دل میں خیالِ ماسوا بھی نہ رہے
رہ جائے تو صرف بے نشانی باقی
جو وہم میں خدا ہے سو وہ خدا بھی نہ رہے
(اسمٰعیل میرٹھی)

 

[mgkr11]

نقاش سے ممکن ہے کہ ہو نقش خلاف
ہیں نقش میں جلوہ گر اُسی کے اوصاف
ہر شے میں عیاں ہے آفتابِ وحدت
گر وہمِ دوئی نہ ہو تو ہے مطلع صاف
(اسمٰعیل میرٹھی)

 

[کاشفی]

اگر کسی کو یاد ہے مکمل کریں۔۔

دنیا سے عدم کو جانے والا ہوں میں
(دوسرا مصرعہ یاد نہیں)
یارب ترا نام پاک جپنے کے لئے
گویا اک ہڈیوں کی مالا ہوں میں
(میرانیس)

 

[کاشفی]

جب مایوسی دلوں پہ چھا جاتی ہے​

دشمن سے بھی نام تیرا جپواتی ہے​

​

ممکن ہے کہ سکھ میں بھول جائیں اطفال​

لیکن انہیں دکھ میں ماں ہی یاد آتی ہے​

(مولانا الطاف حسین حالی رحمتہ اللہ علیہ)​

​

 

[کاشفی]

ہندو سے لڑیں نہ گبر سے بیر کریں
شر سے بچیں اور شر کے عوض خیر کریں

جو کہتے ہیں یہ کہ ہے جہنم دنیا
وہ آئیں اور اس بہشت کی سیر کریں
(مولانا الطاف حسین حالی رحمتہ اللہ علیہ)

 

[کاشفی]

دنیائے دنی کو نقشِ فانی سمجھو
روداد جہاں کو اک کہانی سمجھو

پر جب کرو آغاز کوئی کام بڑا
ہر سانس کو عمرِ جاودانی سمجھو
(مولانا الطاف حسین حالی رحمتہ اللہ علیہ)

 

[محمد وارث]

ہندو سے لڑیں نہ گبر سے بیر کریں
شر سے بچیں اور شر کے عوض خیر کریں

جو کہتے ہیں یہ کہ ہے جہنم دنیا
وہ آئیں اور اس بہشت کی سیر کریں
(مولانا الطاف حسین حالی رحمتہ اللہ علیہ)

لاجواب۔ بہت شکریہ کاشفی صاحب