آپ کا زر تار دامن کاروانِ رنگ ہے - عابد لاہوری

[کاشفی]

غزل
(عابد لاہوری)

آپ کا زر تار دامن کاروانِ رنگ ہے
لہر یا آنچل غبارِ کہکشانِ رنگ ہے

پاؤں پر نقشِ حِنا، ماتھے پہ ٹیکا صندلی
یہ زمینِ رنگ ہے، وہ آسمانِ رنگ ہے

نیلو فر نیلم ہے گویا موتیا الماس ہے
آج ہر جنسِ چمن جنسِ دُکانِ رنگ ہے

کیا تماشا ہے کہ نغموں پر ہے دھوکا نُور کا
کیا تماشا ہے کہ نکہت پر گمانِ رنگ ہے

داستانِ رنگ ہے صحنِ چمن میں کشتِ گُل
بلبلوں کا شور شرح داستانِ رنگ ہے

اور کیا ہے رنگ و نغمہ کے سوا عابد کے پاس
رازدانِ نغمہ ہے، افسانہ خوانِ رنگ ہے​

 

[فرخ منظور]

بہت عمدہ کاشفی صاحب! کیا عابد صاحب کا تعلق لاہور سے ہے؟

 

[کاشفی]

بہت عمدہ کاشفی صاحب! کیا عابد صاحب کا تعلق لاہور سے ہے؟

شکریہ سخنور صاحب۔۔۔ جی لاہور پاکستان سے ہی تعلق ہے۔۔۔ لیکن ان کا انتقال شاید پاکستان بننے سے پہلے ہوگیا تھا۔۔