آنکھ، چشم، نین، دیدہ، نگاہ، نظر پر اشعار

[اوینہ]

عشق میں خواب کا خیال کسے
نہ لگی آنکھ جب سے آنکھ لگی

حسرتؔ عظیم آبادی

 

[جاسمن]

ہمارے ہونٹوں پہ پر لطف قہقہے بکھرے
ہماری آنکھوں نے کتنے مزے سے باتیں کیں
(عدنان محسن)

 

[جاسمن]

ایک سے دیوار و در کو دیکھنا تھا عمر بھر
اپنی آنکھوں کے مقدر میں جہاں بانی نہ تھی
(عدنان محسن)

 

[جاسمن]

ہر آنکھ میں نجیبؔ ہیں سپنے بسے ہوئے
اس جاگتے دیار میں بے دار کون ہے
نجیب احمد

 

[لاريب اخلاص]

اک حسیں آنکھ کے اشارے پر
قافلے راہ بھول جاتے ہیں
عبد الحمید عدم

 

[شمشاد]

جو دل میں تھی نگاہ سی نگاہ میں کرن سی تھی
وہ داستاں الجھ گئی وضاحتوں کے درمیاں
ادا جعفری

 

[مومن فرحین]

اس کی آنکھیں بلا کی تاجر ہیں
جس کو دیکھیں خرید لیتی ہیں

 

[سیما علی]

نہیں بجھتی ہے پیاس آنسو سیں لیکن
کریں کیا اب تو یاں پانی یہی ہے
سراج اورنگ آبادی

 

[سیما علی]

تجھ لب کی صفت لعل بدخشاں سوکہوں گا
جادو ہیں تیرے نین، غزالاں سو کہوں گا

ولی دکنی

 

[سیما علی]

تم ناحق ناراض ہوئے ہو ورنہ مے خانے کا پتہ
ہم نے ہر اس شخص سے پوچھا جس کے نین نشیلے تھے

(غلام ‌محمد ‌قاصر)

 

[گُلِ یاسمیں]

آنکھیں کھلیں تو جاگ اٹھیں حسرتیں تمام
اس کو بھی کھو دیا جسے پایا تھا خواب میں

 

[جاسمن]

یہ کس کا چہرہ دمکتا ہے میری آنکھوں میں
یہ کس کی یاد مجھے کہکشاں سے آتی ہے
عبید صدیقی

 

[سیما علی]

اے خدا جو بھی مجھے پندِ شکیبائی دے
اس کی آنکھوں کو مرے زخم کی گہرائی دے

اتنا بے صرفہ نہ جائے مرے گھر کا جلنا
چشمِ گریاں نہ سہی چشمِ تماشائی دے

فراز

 

[سیما علی]

یہ دشتِ ہجر، یہ وحشت یہ شام کے سائے
خدا یہ وقت تری آنکھ کو نہ دکھلائے

اسی کے نام سے لفظوں میں چاند اترے ہیں
وہ ایک شخص کہ دیکھوں تو آنکھ بھر آئے

امجد اسلام امجد

 

[سیما علی]

ٹھہرتی ہی نہیں آنکھیں جاناں
تیری تصویر کی زیبائی پر

سطح کے دیکھ کے اندازے لگیں
آنکھ جاتی نہیں گہرائی پر

پروین شاکر

 

[سیما علی]

کیا میں بھی پریشانیِ خاطر سے قریں تھا
آنکھیں تو کہیں تھیں دلِ غم دیدہ کہیں تھا

کس رات نظر کی ہے سوئے چشمکِ انجم
آنکھوں کے تلے اپنے تو وہ ماہ جبیں تھا

نام آج کوئی یاں نہیں لیتا ہے انہوں کا
جن لوگوں کے کل ملک یہ سب زیرِ نگیں تھا

میر

 

[سیما علی]

اس ایک خواب کی حسرت میں جل بجھیں آنکھیں
وہ ایک خواب کہ اب تک نظر نہیں آیا

افتخار عارف

 

[سیما علی]

انہیں کبھی نہ بتانا میں ان کی آنکھیں ھوں
وہ لوگ پھول سمجھ کر مجھے مسلتے ھیں

کئ ستاروں کو میں جانتا ھوں بچپن سے
جہاں بھی جائوں میرے ساتھ ساتھ چلتے ھیں

(بشیر بدر)

 

[سیما علی]

کوئے قاتل میں چلے جیسے شہیدوں کا جلوس
خواب یوں بھیگتی آنکھوں کو سجانے نکلے

(امجد اسلام امجد)

 

[سیما علی]

آنکھوں سے میری ، کون مرے خواب لے گیا
چشمِ صدف سے گو ہر نایاب لے گیا
پروین شاکر