دھرنا دوسری اننگز
ستمبر ۱۳, ۲۰۱۴ — 1 تبصرہ
سید طلعت حسین
کل رات ایک قابل اعتماد شخص نے مجھے دو گھنٹے سامنے بیٹھا کر لمبا چوڑا لیکچر دیا ۔ اس کا کہنا تھا کہ ہمارے تجزیئے اسلام آباد کے حالات کا حقیقی انداز سے احاطہ نہیں کر رہے ۔ انہوں نے کہا کہ جو بھی یہ سمجھ رہا ہے کہ یہ معاملہ بات چیت کے ساتھ طے ہو جائے گا وہ احمق بھی ہے اور نئی معلومات سے نا آشنا بھی ۔ انہوں نے کہا کہ آپ خود یہ سوچیے کہ عمران خان اپنے تمام سیاسی کیریر کو داﺅ پر کیسے لگا سکتا ہے کہ استعفے حاصل کیے بغیر اس کی سیاست مکمل طور پر ختم ہو جائے ، کیا وہ اتنا ہی بے وقوف اور سادہ لوح ہے ہے ۔ آخر کیا وجہ ہے کہ پارٹی کی حالیہ تمام میٹنگز میں وہ حکومت کے ساتھ بات چیت کے عمل کو تحقیر آمیز انداز سے غیر ضروری قرار دیتا اور اصرار کرتا ہے کہ نواز شریف اور شہباز شریف دونوں کے استعفے عیدالاضحی سے پہلے حاصل کر لیے جائیں گے ۔ میں نے جوابا اپنی نا کافی معلومات کا رونا پیٹا اور کہا کہ عمران خان کا اعتماد معروضی حالات کے ساتھ مطابقت نہیں رکھتا مگر میں اس سے اتفاق کرتا ہوں کہ وہ یہ سب کچھ ضد میں نہیں کر رہا ۔
اس پر انہوں نے فرمایا کہ ڈاکٹر طاہر القادری کے کنٹینرز میں جا کر دیکھیں وہاں پر خود اعتمادی کی فضا عمران خان کے کنٹینر سے بھی کہیں زیادہ ہے ۔ قادری صاحب اپنے قریبی ساتھیوں جن میں ریٹائرڈ فوجی افسران قابل ذکر حد تک نمایاں نظر آتے ہیں کے ساتھ مل کر روزانہ نواز شریف کے بعد کے حالات پر لمبی چوڑی گفتگو کرتے ہیں ۔ ان کے کنٹینر سے کان لگا کر سنیں تو یوں محسوس ہو گا جیسے موجودہ حکومت کے خاتمے کے بعد کے زمانے میں ابھی سے موجود ہوں ۔
میں نے ان صاحب سے جب یہ استفسار کیا کہ عمران قادری ٹیگ ٹیم کیا کر سکتی ہے تو اس پر مسکرا کر انہوں نے نیم طنزیہ انداز اپنایا اور بولے ” ارے بھائی کرنا کیا ہے ، پہلی اننگز کے بعد دوسری اننگز کھیلیں گے ۔ اس مرتبہ پہلے سے زیادہ جم کر بیٹنگ کریں گے ۔ پنجاب بالخصوص راولپنڈی ، اسلام آباد کے گردو نواح سے افرادی قوت لانے کا بندوبست ہو چکا ہے ۔ کسی ایک دن یہ سب اکٹھے ہو کر کئی گنا زیادہ طاقت میں پر جوش ہجوم کی شکل اختیار کر جائے گا ۔ طاہر القادری مذاکرات کی ناکامی کو جواز بنا کر اپنے کارکنان کے جذبہ قربانی کو اجاگر کریں گے اور پھر پارلیمان اور وزیر اعظم ہاﺅس پر چڑھ دوڑیں گے ۔ چوں کہ حکومت کے تعلقات فوج کے ساتھ انتہائی سرد مہری کا شکار ہو چکے ہیں ، لہذا اس مرتبہ واجبی سی مدد بھی موصول نہیں ہو گی ۔ حکومت کی طرف سے پولیس پہ انحصار بڑھے گا ، گولی چلے گی یا چلوائی جائے گی ، دونوں صورتوں میں لاشیں گریں گیں ۔ شاہراہ دستور پر بہتا ہوا یہ خون آئینی اور قانونی نظام پر چھینٹے ڈال کر اس کو مفلوج کر دے گا۔ غیر معمولی حالات اور عوامی انقلاب کے پیش نظر ریاستی ادارے سرخ بتی جلا کر سب کچھ روک دیں گے ۔ بالکل ویسے جیسے فلموں میں نازک اور اہم موقعوں پر تمام کردار ساکت کر دیئے جاتے ہیں ۔ پھر کہانی کوتھوڑاسا تبدیل کر کے ان میں جان ڈال دی جاتی ہے اور زندگی کا آغاز کچھ تبدیلی کے ساتھ دوبارہ سے ہو جاتا “۔
میں نے ان صاحب سے گزارش کی کہ ان کی اس ناقابل یقین کہانی کا آخری حصہ میرے سر کے اوپر سے گزر گیا ہے ۔ لہذا مہربانی سمجھ کر اس کی تفصیل بیان کریں تو نا سمجھ تھوڑا بہت جان پائے گا ۔ اس پر انہوں نے فرمایا ” اس میں نہ سمجھنے کی کیا بات ہے ، دھرنے کے ٹی ٹونٹی میچ میںتو یہی کچھ ہونا تھا ۔ زیادہ تماشائی نہ آنے کی وجہ سے اس کو ٹیسٹ میچ میں تبدیل کرنا پڑا ۔ ایمپائر کی قلعی کھل گئی وہ ہڑ بڑا کر کچھ دنوں کے لیے خاموش ہو گیا ۔ اب سٹیڈیم میں لوگ پھر جائیں گے ۔ ٹی ٹونٹی کا میچ پہلی اننگز اور اب کھیلے جانے والا کھیل دوسری اننگزتصورہو گا۔ اس مرتبہ حکومت اور پارلیمنٹ کو سانس لینے کا موقع نہیں ملے گا ۔ پہلا دوسرا اور تیسرا امپائر مل کر اس میچ کا فیصلہ کریں گے ۔ کیوں کہ اگر انہوں نے دیر کر دی تو دو ہفتے کے بعد ان کی ذمہ داریاں تبدیل ہو جائیں گی۔ انہوں نے یہ کھیل ہر حال میں جیتنا ہے ۔ آپ کے اس بڑے سرمیں کیوں نہیں آ رہی اسلام آباد میں کیا ایساہو رہا ہے کہ جس سے آپ یہ نتیجہ اخذ کر رہے ہیں کہ اب یہ میچ دوستانہ انداز اختیار کر گیا ہے “۔
طنز کے ان تیروں سے بچتے ہوئے میں نے ان سے ایک اور سوال کیا کہ پارلیمان کے اندر اعتماد اور عدالت کی طرف سے کسی غیر آئینی اقدام کی مکمل مخالفت کے بعد نظام کو مکمل ساکت کرنے کی عملیت پر مجھے شدید شک ہے ۔ یہ آئینی اور قانونی طور پر نہیں ہو پائے گا ، اس پر وہ فرمانے لگے ”کیوں کہ آپ کو آئین و قانون پر عبور حاصل نہیں ہے لہذا آپ اس ڈھنگ سے واقف نہیں جس کے امکا نات ہر وقت موجود رہتے ہیں ۔ اگر آپ کے پاس حفیظ پیر زادہ کی عقل و دانش کا خزانہ موجود ہو جس نے اس آئین کو اپنے سامنے بنتے دیکھا بلکہ اس میں حصہ بھی ڈالا توآپ کوئی نہ کوئی راستہ نکال ہی لیتے ۔ اور اگر آپ کو عبوری وزیر اعظم بننے کا خواب بھی مل جاتا تو آپ دن رات کی عرق ریزی کو ایسے تیل میں تبدیل کر دیتے جس سے زنگ آلود بندوقیںچستی کے ساتھ حملہ کرنے کی کھوئی ہوئی صلاحیت پالیتی ہیں۔ پاکستان میں اس وقت ایک خاموش مگر بہت بڑے سیاسی زلزلے کے تمام امکانات موجود ہیں ۔ نواز شریف اور موجودہ پارلیمان شاید اس ارتعاش کو محسوس نہیں کر رہے جس کی سن گن مجھے ہے ۔۔ آپ جیسے لوگوں کے تجزیئے آسمان پر کٹی پتنگ کی طرح ہیں ۔ خیالات کی ہواﺅں کو ادھر ادھر گھما رہے ہیں ۔ آپ کو علم ہی نہیں ہے کہ ہم تبدیلی کے کتنے قریب کھڑے ہیں ۔ عمران کو اور قادری کو سر خرو ہونے کی خبر مل چکی ہے ۔ شیخ رشید خورشید شاہ کے چھبتے ہوئے جملوں سے وقتی طور پر پریشان تو ہو سکتے ہیں مگر ان کا ستارہ بلند ہو کر رہے گا “
چوں کہ میں اپنے تجزیئے کے بارے میں ڈھیٹ ہونے کی حد تک مستقل مزاج ہوں ۔ لہذا میں نے اس صاحب کی بہت سی باتوں کو دیوانہ کی بڑ سمجھ کر ذہن سے نکالنے کی بڑی کوشش کی۔ مگر سچی بات ہے کہ میں ان کے اس افسانے میں حقائق کے عنصر کو یکسر نظر انداز کرنے میں کامیاب نہیں ہو سکا۔ عمران خان ، طاہر القادری ، چوہدری شجاعت ، پرویز الہی ، شیخ رشید، ذرائع ابلاغ میں ان سب کی تشہیر اور تعریف پر مامور پرو پیگنڈا گروپ یہ سب لوگ ایسے ہی اڑی نہیں کر سکتے ۔ پارلیمان کے اندر کا غصہ اور وہاں کی یگانگت کے باوجود جس عزم کے ساتھ یہ سب لوگ موجودہ حکومت کے ’فارغ ‘ ہونے سے متعلق بات کرتے ہیں وہ مکمل طور پر مصنوعی نہیں ہو سکتا ۔ مجھے یہ ماننا پڑے گا کہ جس کھیل کو کھیلنے کے لیے عمران خان اور طاہر القادری کے کنٹینر کھڑے کیے ہیں وہ پانچ نکاتی اصلاحاتی ایجنڈے سے کہیں بڑا ہے ۔
یہ اتنی جلدی ختم نہیں ہو گا ۔ اس ملک میں ہونے والے تجربے ابھی بھی جاری ہیں ۔ حالات کشیدہ ہیں ، ان کے پیچھے پوشیدہ حقائق چند دنوں میں منکشف ہو جائیں گے ۔ اس کے بعد کیا ہو گا ، اس کی فکر کسی کو نہیں ہے ۔ فی الحال معاملہ اس حکومت کو گرانے اور اس کے بدلے نظام لانے کا ہے ۔ جس کے لیے کی جانے والی کوشش بتدریج مضبوط ہو رہی ہے ۔ کم از کم وہ صاحب تو مجھے یہی بتا رہے تھے ۔
