آج کا شعر

[زونی]

نہ رہنماؤں کی مجلس میں لے چلو مجھکو
میں بے ادب ہوں ہنسی آ گئی تو کیا ہو گا
شبابِ لالہ و گل کو پکارنے والو
خزاں سرشت بہار آ گئی تو کیا ہو گا

(احسان دانش)

 

[شمشاد]

مرے ساغر میں مے ہے اور ترے ہاتھوں میں بربط ہے
وطن کی سرزمیں میں بھوک سے کہرام ہے ساقی

 

[محمد وارث]

اگرچہ سعد رستے میں بڑے دلکش جزیرے تھے
مجھے ہر حال میں لیکن سمندر پار جانا تھا

(سعد اللہ شاہ)

 

[شمشاد]

کتاب عمر کا ایک اور باب ختم ہوا
شباب ختم ہوا اک عذاب ختم ہوا

 

[زونی]

شہرِ احساس میں پتھراؤ بہت ھے محسن
دل کو شیشے کے جھرونکوں میں سجایا نہ کرو

 

[یونس رضا]

حیات گریہ شبنم حیات رقص شرر
تیرے پیام سے پہلے تیرے پیام کے بعد
یہ طرز فکر یہ رنگ سخن کہاں قابل
تیرے کلام سے پہلے تیرے کلام کے بعد

 

[شمشاد]

یونہی ہم منیر پڑے رہے کسی اک مکاں کی پناہ میں
کہ نکل کے ایک پناہ سے کہیں اور جانے کا دم نہ تھا
(منیر نیازی)

 

[فرخ منظور]

بھرم کھل جائے ظالم تیرے قامت کی درازی کا
اگر اس طرہء پر پیچ و خم کا، پیچ وخم نکلے
(غالب)

 

[شمشاد]

وہ جو اپنا یار تھا دیر کا کسی اور شہر میں جا بسا
کوئی شخص اس کے مکان میں کسی اور شہر کا آبسا

 

[فرخ منظور]

وہ دوستی تو خیر اب نصیبِ دشمناں ہوئی
وہ چھوٹی چھوٹی رنجشوں کا لطف بھی چلا گیا

(ناصر کاظمی)

 

[محمد وارث]

فریب خوردۂ منزل ہے کارواں ورنہ
زیادہ راحتِ منزل سے ہے نشاطِ رحیل

(اقبال)

 

[شمشاد]

اک خیال خام میں مسحور کر رکھا مجھے
خود پرستی نے جہاں سے دور کر رکھا مجھے
بے سبب تھا اس جگہ پر وہ قیام سرسری
پر تھکن نے اس جگہ مجبور کر رکھا مجھے

 

[فرخ منظور]

بیٹھ جاتا ہوں جہاں چھاؤں گھنی ہوتی ہے
ہائے کیا چیز غریب الوطنی ہوتی ہے

(شاعر کا نام ذہن سے نکل گیا)

 

[محمد وارث]

بیٹھ جاتا ہوں جہاں چھاؤں گھنی ہوتی ہے
ہائے کیا چیز غریب الوطنی ہوتی ہے

(شاعر کا نام ذہن سے نکل گیا)

فرخ صاحب یہ شعر حفیظ جونپوری کا ہے، اپنے یارِ طرحدار فاتح الدین بشیر صاحب کی یہ پوسٹ دیکھیئے گا۔

 

[شمشاد]

آج دیکھو زمیں کے سینے پر
اُس کے چہرے کی دُھوپ پھیلی ہے

 

[محمد وارث]

گرمیٔ محفل فقط اک نعرۂ مستانہ ہے
اور وہ خوش ہیں کہ اس محفل سے دیوانے گئے

(خاطر غزنوی)

 

[شمشاد]

قریب تھا تو کسے فُرصت محبّت تھی
ہُوا ہے دُور تو اُس کی وفائیں یاد آئیں

 

[یونس رضا]

نظیر سیکھے سے علم رسمی بشر کی ہوتی ہیں چار آنکھیں
پڑھے سے جس کے لاکھ آنکھیں وہ علم دل کی کتاب میں ھے

 

[شمشاد]

ہم تو سمجھے تھے کہ اک زخم ہے بھر جائے گا
کیا خبر تھی کہ رگِ جاں میں اُتر جائے گا

 

[شعیب خالق]

ایک بس تو ہی نہیں،جو خود کوبھی ہم بھول گئے
اور اب تیرے سبب اپنے طلب گار ہیں ہم
اپنی آوارہ خرامی کی خبر کب ہے ہمیں
رات تو ڈھل بھی چکی کس لئے بیدار ہیں ہم