دیوان سرسری: قطعہ

غصہ دلِ حزین پہ اور گھونٹ صبر کے کیوں ہجر میں پئیں یہی دو آتشہ شراب وصلِ خدا کی آؤ پئیں صبح و شام ہم یہ فجر و ظہر و عصر ، یہ مغرب ، عشا شراب

عشق کامل ہونہیں سکتا رقیبوں کے بنا خوبرو لیلیٰ و قیسِ بادیہ کافی نہیں خوب پِتّا مارنا ہوگا غزل کے واسطے سَرسَری تمرینِ وزن و قافیہ کافی نہیں

ادارے کی ایک کتاب کے شروع میں کتاب ہدیہ کرنے کی ترغیب کے طور پر یہ قطعہ لکھا ہے، اساتذۂ کرام اور جملہ احباب کی اصلاح کے بعد اب قطعے کی شکل کچھ یوں ہے: اک دوسرے کو دیتے ہیں تحفے سبھی رفیق زیور ، لباس ، خوشبو ، گھڑی یا گلاب کے عمدہ اسامہ سَرسَری! سب گفٹ ہیں مگر عمدہ ترین ہوتے ہیں ہدیے کتاب کے...

ازواجِ طاہرات ہیں امت کی امہات پہلی خدیجہ ، دوسری صدیقہ عائشہ میمونہ ، ہند ، سودہ ، صفیّہ و حفصہ ہیں ام حبیبہ ، ماریہ ، زینب ، جویریہ (رضی اللہ عنہن)

روحانی بابا صاحب کا لطیفہ یہاں دیکھا ، اچھا لگا ، قوافی چرا کر قطعہ بند کردیا: موئے انگریز ”الف ، بے ، پے“ کو ”اے ، ٹو ، زیڈ“ کہتے ہیں انھیں ”پاگل“ کہیں ہم اور یہ ہم کو ”میڈ“ کہتے ہیں بلاتے ہیں یہ جیتی جاگتی ”امی“ کو ”ممی“ ہی تو زندہ ”باپ“ کو بھی برملا یہ ”ڈیڈ“ کہتے ہیں

سنتے نہیں طبیب کی قدغن غذاؤں میں کھاتے ہیں کھانا ، ڈال کے روغن غذاؤں میں جب سبزیاں ملیں گی انھیں سَرسَری فقط اک خواب سا لگے گا مرغن غذاؤں میں

ترکی ، بنگالی ، پشتو ، پنجابی و فارسی انگریزی ، پرتگالی ، فرانسیسی ، لاطنی گجراتی ، ہندی اور عَرَبی ، سندھی ، سنسکِرِت ”اردو“ اسامہ چودہ زبانوں سے ہے بنی

اہلِ خرد کے ہونٹوں کے دو طرز یہ ملے خاموش وہ رہے یا تبسم کے گل کھلے خاموشی اس لیے کہ رہیں مسئلے سے دور اور مسکراہٹوں میں مسائل کا حل ملے

بعد ہر نیکی کے ہو اگلی عبادت کی دعا ہر گھڑی غفار سے ہو اس سعادت کی دعا استقامت اور دعا میں اے اسامہ! ہے لزوم بس ہمیشہ کرتے رہنا استقامت کی دعا

”شاید اب راضی ہیں مجھ سے یا رقیبوں سے خفا“ میرا ہر اندازہ میرا دل لبھاتا ہے بہت مت سنا اچھی خبر اب اے اسامہ سَرسَری! ”اک بشارت ہے“ کا جملہ مجھ کو بھاتا ہے بہت

مجھ سے نفرت تھی انھیں ، پر میری خلوت سے نہیں یہ پتا مجھ کو چلا ، لیکن کہاں؟ کیوں؟ اور کب؟ ان کے قدموں کی اب آہٹ سن رہا ہوں سَرسَری! جبکہ مجھ کو دفن کرکے جاچکے ہیں لوگ سب

مبارک ہو بہت اے شاعرِ کم سن ، اے مزمل! ہوئے ہیں دو ہزار اب آپ کے پیغام بھی کامل عروض و قافیہ کی خوب معلومات ہم کو دیں ہمیشہ آپ کو رکھے خدا خوشحال اے بسمل!

اردو محفل کا یہ کیا خوب ہے تانا بانا روز اس باغ کے موسم کو سہانا پانا اب تو عادت سی ہمیں ہوگئی ہے فورم کی اب تو ہر روز رہے گا مرا آنا جانا

ہر چیز پر عدم تھا مگر خود عدم نہ تھا کوئی خوشی نہیں تھی ، کسی کا بھی غم نہ تھا کوئی زمین ہی تھی ، نہ تھا کوئی آسماں رب کے علاوہ کوئی خدا کی قسم! نہ تھا

جسے پہچانے دل اور جس کو جانے من وہ ہے گلفام و دل آرام و جانِ من ضروری تو نہیں محبوب مل جائے تصور بھی بہت ہے ان کا جان اے من!

ایک دن ”بیوی“ نے ”شوہر“ سے یہ غصے میں کہا کمپیوٹر چل رہا میرے اشاروں پر نہیں!! اُس اطاعت کرنے والے ”بھولے“ شوہر نے کہا یہ تمھارا کمپیوٹر ہے ، کوئی شوہر نہیں!!

بھری بس میں صدا دی ایک لنگڑے بھیک منگے نے ہمیں ”ایکا“ دیا بس نے ہم اس سے اور کیا مانگیں مری اک ٹانگ تھی چڑھتے ہوئے یارو! وہ اب گم ہے مری ٹانگیں تری ٹانگیں ، یہاں تو ہیں نری ٹانگیں

حق کی جانب ہوگی کامل رہبری پاؤ گے دونوں جہاں میں برتری عاجزی اور انکساری سے سدا اپنی غلطی مان لو اے سرسرؔی!

بیگماتی شاعری سے آج ہلچل مچ گئی کہہ رہا ہے ہر کنوارا مجھ کو بیوی چاہیے جن کو بیوی مل گئی ہے ان کا یہ کہنا ہے اب ایک کپ چائے ہمیں اور ایک ٹی وی چاہیے

سادگی سے شادی کرنے والے ایک گھرانے کو منگنی کی مبارکباد: منگنی تمھیں مبارک شادی تمھیں مبارک شادی جو ہورہی ہے سادی تمھیں مبارک آخر تک اس کو اللہ پہنچادے عافیت سے فی الحال تو یہ شادی آدھی تمھیں مبارک