انٹرویو محمد احمد کا انٹرویو

[محمداحمد]

14۔ آپ کی کتاب حیات کے سر ورق پر عنوان کیا ہوگا؟

میں چاہتا ہوں کہ میری کتابِ حیات کے سرِ ورق کا عنوان "عبداللہ" ہو۔

البتہ پھر وہی بات کہ ایں سعادت بزورِ بازو نیست

 

[محمداحمد]

محبت کیا ہے؟ اور زندگی سے یہ نکل جائے تو کیا رہ جاتا ہے؟

محبت کی طلب اور رسد انسانی فطرت ہے۔ یہ زندگی میں نہ ہو تو زندگی غیر فطری سی ہو جائے گی۔

 

[محمداحمد]

• 16۔ شاعروں کے حلقے میں اٹھنا بیٹھنا ہوتا ہے؟ کیسے لوگ ہیں یہ؟ کیا کوئی محنت سے ان جیسا بن سکتا ہے یا یہ ودیعت شدہ ہے؟
• 17۔ محفل کا سب سے اچھا دور کون سا تھا؟ کچھ اچھے محفلین ساتھیوں کو بھی ٹیگ کیجیے جن سے سہانی یادیں وابستہ ہیں۔
• 18۔ آج کل کیا کام کر رہے ہیں اور ٹائم مینجمنٹ کے متعلق اب تک کیا سیکھ پائے ہیں؟

شاعروں کے حلقوں میں بالکل اُٹھنا بیٹھنا نہیں ہوتا۔ میرے معمولات اس بات کی اجازت نہیں دیتے کہ میں ایکسٹرا کریکلر سرگرمیوں میں مبتلا ہوں۔ میں نے بامشکل دو یا تین مشاعرے پڑھے ہوں گے، وہ بھی بہت عرصہ پہلے۔ شاعری میرے حساب سے خداداد صلاحیت ہے، البتہ اسے محنت سے جلا بخشی جا سکتی ہے۔ مشاعروں کا شاعر بننا، البتہ آرٹ سے زیادہ "سائنس" ہے۔

محفل کا سب سے اچھا دور شاید وہ تھا جب بہت زیادہ ادب سے تعلق رکھنے والے اراکین یہاں فعال تھے۔ اور سب اپنی موجودگی ، تحریروں اور تبصروں سے محفل کی رونقیں بڑھانے میں اپنا کردار کرتے تھے۔ پھر آہستہ آہستہ وہ لوگ محفل پر فعال ہوئے جو لوگوں کی ذہن سازی اپنے اپنے ایجنڈے کے تحت کرنا چاہتے تھے، دنیا کے سیاسی حالات بھی اُلٹ پُلٹ ہوتے رہے اور محفل پر ایک جنگ و جدل کا ماحول بن گیا۔ ایسے میں بہت سے سادہ لوح لیکن مخلص اراکین محفل سے رُخصت ہوگئے، یا انہوں نے اپنی آمد و رفت کو محدود کر لیا۔ اور ایک وقت آیا کہ محفل محض کچھ لوگوں کے لئے اکھاڑا بن کر رہ گئی۔ اور بہت کم لوگ اس صورتحال میں سروائیو کر سکے۔

آج کل پیشہ ورانہ مصروفیات کے علاوہ کچھ ذاتی پروجیکٹس پر کام کر رہا ہوں (لیکن بقول شخصے، کام کم اور پروکریسٹینیشن زیادہ دکھا رہا ہوں)۔ ٹائم منیجمنٹ کی جہاں تک بات ہے، تو میری یہ رائے ہے کہ اس سے زیادہ اہم یہ ہے کہ انسان پلاننگ کرنا سیکھے ( طویل مدّتی اہداف کے علاوہ قلیل مدّتی اہداف کے لئے یہ پلاننگ ماہانہ، ہفتہ وار یا روزانہ کی بنیاد پر کی جا سکتی ہے)، اور اس پلاننگ پر خود کو کاربند کرنے کے لئے ڈسپلین (یا ضبطِ نفس) سیکھے۔ ٹائم منیجمنٹ تو اُن لوگوں کے لئے ہوتی ہے جو بہت کام کرتے ہوں اور اُن کے کام پھر بھی رہ جاتے ہوں۔ ہمارے جیسے سست لوگوں کے لئے تو یہی بات ہے کہ جو بات طے ہوئی ہے اُس کے مطابق چلنے کی کوشش کریں۔

 

[محمداحمد]

19۔ کیا محفل کے بند ہونے کی کوئی معقول وجہ سمجھ میں آئی اور دل کو تسلی ہوئی؟ یا اگر بند نہیں ہونی چاہیے تو کوئی ایسی دلیل ہے جسے پاکستان سے باہر مانا جا سکے؟

محفل بند ہونے کی جو بھی وجوہات انتظامیہ نے پیش کی ہیں وہ سب کی سب معقول ہی ہیں۔

اس میں زیادہ غلطی اراکین کی ہے کہ انہوں نے محفل کو Foregranted سمجھ لیا تھا، اور یوں ناقدری کی۔ مصروفیات البتہ سب کی ہی بڑھ گئی ہیں آج کے دور میں۔ ایک کام کو ترجیح دینے کا مطلب دوسرے کئی کام کا متاثر ہونا ہوتا ہے۔ تاہم محفل کو اگر فعال اور با مقصد صارف نہیں ملتے تو محفل کو چلانے کا پھر کیا مقصد رہ جاتا ہے۔

 

[محمداحمد]

20۔ کیا آپ حساس ہیں؟ انٹروورٹ یا ایکسٹروورٹ میں سے آپ کا عمومی رویہ کیا ہے؟

آج کل ہر شخص یہ سمجھتا ہے کہ وہ حساس ہے اور دوسرے بے حس ہیں۔

محفل اور سوشل میڈیا سے ہٹ کر شدید انٹروورٹ !

انٹروورٹ لوگوں کا ایک المیہ یہ ہے کہ وہ اپنے دوستوں کا انتخاب خود نہیں کرسکتے۔

 

[محمداحمد]

• 21۔ کوئی ایسا پکوان جس کی خوشبو سے ہی آپ کھل اٹھتے ہوں؟ یا ایسا صرف شعر سن کر ہی ہوتا ہے؟ ویسے کوئی اچھے شعر بھی سنائیے جن کو سن کر کبھی آپ کھل اٹھے ہوں!

جو بھی مرغوب غذا ہو، اور اُسی وقت تازی تازی بنی ہو۔ اس کی خوشبو اچھی لگتی ہے۔

اشعار کی کیا بات ہے۔ ان کو سُن کر کھل اُٹھنا اور بجھ سا جانا دونوں ہی عام سے بات ہے۔

چلے آؤ ساون کی ضد نہ کرو ۔۔۔ بڑا لطف دے گا سفر دھوپ میں۔فرح دیبا
بس ایک گوشہ میں کُچھ دیپ جگمگاتے ہیں‌ ۔۔۔۔ وہ ایک گوشہ جہاں زُلفِ شب گھنیری ہے ۔ مصطفیٰ زیدی
خوبانِ شہر بھی نہ ہوئے مجھ پہ ملتفت ۔۔۔ میں بھی وہ بد دماغ کہ حسرت نہیں مجھے ۔ انور شعور
وہی ہوا نہ بدلتے موسم میں تم نے ہم کو بھلا دیا ہے ۔۔۔ کوئی بھی رُت ہو نہ چاہتوں کا زوال ہوگا یہ طے ہوا تھا۔ اعزاز احمد آزر
کون تھا تو کہ پھر نہ دیکھا تجھے۔۔۔مٹ گیا خواب آنکھ ملتے ہی۔ منیر نیازی

ویسے ہی کچھ اشعار جو یاد آئے۔ چھاپ دیے۔

ویسے میں نے اشعار اس طرح لکھے ہیں کہ اگر کوئی اسکمنگ یا اسکینگ کرتا ہوا گزرے تو اُسے یہ نہ لگے کہ انٹرویو میں اشعار بھر دیے گئے ہیں۔

 

[محمداحمد]

22۔ اردو محفل کا آپ کی زندگی میں کیا کردار ہے؟

بہت اہم! اور نہایت خوبصورت!

مختصر لفظوں میں یوں کہنا مناسب ہوگا کہ اگر اردو محفل نہ ہوتی تو میں آج ویسا نہ ہوتا جیسا اب ہوں۔
میں نے اردو محفل سے سیکھا بھی بہت اور محبتیں بھی مجھے یہاں بہت ملیں۔ یعنی اساتذہ اور دوست دونوں ہی بہت بہترین قسم کے ملے محفل کے توسط سے۔

 

[محمداحمد]

• 23۔ ابھی تک کتنا سفر کر چکے ہیں؟ (اردو اور انگریزی والا الگ الگ بتائیں)۔
• 24۔ کبھی رفاہ عامہ کے کاموں میں وولنٹئیر کیا؟ دور طالب علمی میں کبھی ہم نصابی سرگرمیوں میں حصۃ لیتے رہے؟

سفر کا اتفاق شاذ ہی کبھی ہوتا ہے۔ بس دفتر سے گھر اور گھر سے دفتر۔ انگریزی والا سفر تو بطور پاکستانی کہیں نہ کہیں کرتے ہی ہوں گے۔

رفاہِ عامہ کے کاموں میں بہت ہی کم ہی کام کیا ہے، بمشکل ایک دو ایونٹس، یعنی نہ ہونے کے برابر۔ البتہ تحریروں کے ذریعے اپنی پسند کی آگاہی پھیلانے کی کوشش ضرور کرتا ہوں۔

 

[یاز]

محبت کی طلب اور رسد انسانی فطرت ہے۔ یہ زندگی میں نہ ہو تو زندگی غیر فطری سی ہو جائے گی۔

اس کی کچھ مزید وضاحت کیجئے، تا کہ ہم بھی کچھ سمجھ پائیں۔

 

[محمداحمد]

25۔ آپ کہتے ہیں کہ آپ خشک مزاج ہیں، حالانکہ اصیل خشک مزاج لوگ ایسے اعترافات سے باز رہتے ہیں۔ کبھی اپنے سے زیادہ خشک مزاج سے پالا پڑا؟ پھر کیسے اس کا مزاج تر کیا؟

آپ نے اس بات کا سورس نقل نہیں کیا؟

ویسے میں نے یہ نہیں کہا تھا کہ میں خشک مزاج ہوں، بلکہ یہ کہا تھا کہ میرا قریبی حلقہ مجھے خشک مزاج سمجھتا ہے۔ اپنے سے زیادہ خشک مزاج لوگ مجھے اچھے لگتے ہیں بشرط یہ کہ علم والے ہوں۔ اُن سے سیکھنے کی کوشش کرتا ہوں۔

 

[اے خان]

دس کتابیں!

اگر ویسے دس کتابیں بتاؤں تو شاید یہ ایک مشکل کام ہو۔ اصناف کے اعتبار سے جو یاد آتی ہیں۔ ویسے عمومی تصور کے برخلاف، میرا مطالعہ زیادہ نہیں ہے۔

ادب:

- مختار مسعود کی آوازِ دوست اور سفر نصیب
- اشفاق احمد کی سفر در سفر اور زاویہ
- راجہ گدھ، حاصل گھاٹ، ایک دن ، بانو قدسیہ
- تمام ممتاز ادیبوں کے افسانے
- فائر ایریا۔ الیاس احمد گدی
- قلع جنگی ۔ مستنصر حسین تارڑ
- اینیمل فارم - جارج اورویل
- کائیٹ رننر - خالد حسینی
- ماں - میکسم گورکی (اردو ترجمہ )

مزاح:
- ابنِ انشاء کی سب کتابیں
- یوسفی صاحب کی کتابیں
- کرنل محمد خان کی کتابیں
- شفیق الرحمٰن کی کچھ کتابیں


نان فکشن:
- البدیع - عابد علی عابد
- بت خانہ شکستم من - امیر حسنین جلیسی
- ہدایت نامہء شاعر - ساقی فاروقی
- پہلا پتھر - نذیر حسین
- ڈاکٹر مبارک علی کی کتابیں
- اور کئی ایک تکنیکی کتابیں

شاعری:
شاعری کی کتابیں لکھنے بیٹھا تو ہو سکتا ہے کہ شام ہو جائے۔

سیلف ہیلپ کتابیں:
- Atomic Habits
- Mindset
- The Psychology of Money
- The Barefoot Investor

ویسے سیکھا کچھ نہیں۔

دینی کتب:
- توحید اور ہم ۔ بشیر صدیقی
- الرحیق المختوم - صفی الرحمٰن مبارکپوری
-محسنِ انسانیت - نعیم صدیقی
-مسلمانوں پر قرانِ مجید کے حقوق۔ ڈاکٹر اسرار احمد

دس کتابوں کی حد عبور کرنے پر معذرت!


-

احمد بھیا ایک چھوٹا سا سوال.
اگر آپ نے پانچ چھ سال پہلے کوئی کتاب پڑھی ہو اور اب حال میں اس کتاب کا تذکرہ ہو تو آپ کو اس کتاب میں کردار یا واقعات یا کوئی مضمون کتنا یاد رہتا ہے؟
مثال کے طور پر پر قلعہ جنگی ناول میں نے بہت پہلے پڑھا تھا، اب اس کا ذکر آیا تو مجھے صرف اس ناول کے آخری صفحات صرف اتنے یاد آرہے ہیں، کہ ناول کے کردار ایک تہہ خانے میں ہیں، بھوک سے مر رہے ہیں، ایک انگریز بھی ہوتا ہے شاید گھوڑےٖ کا بھی ذکر ہوتا ہے، کردار کا بھوک کی حالت میں خواب میں کھانا ، بس اتنا یاد آرہا ہے.
اب جتنا ذہن پر زور دے رہا ہوں تو تھوڑا تھوڑا یاد آرہا ہے.