ن م راشد اندھا کباڑی -- از ن م راشد

فرخ منظور

لائبریرین
اندھا کباڑی -- از ن م راشد

شہر کے گوشوں میں ھیں بکھرے ھوئے
پا شکستہ سر بریدہ خواب
جن سے شہر والے بے خبر!

گھومتا ھوں شہر کے گوشوں میں روز و شب
کہ ان کو جمع کر لوں
دل کی بھٹی میں تپاؤں
جس سے چھٹ جائے پرانا میل
ان کے دست و پا پھر سے ابھر آئیں
چمک اٹھیں لب و رخسار و گردن
جیسے نو آراستہ دولھوں کے دل کی حسرتیں
!پھر سے ان خوابوں کو سمت رہ ملے

"خواب لے لو خواب ۔۔۔۔۔۔۔۔۔۔۔ "
صبح ھوتے ہی چوک میں جا کر لگاتا ھوں صدا ۔۔۔۔۔۔۔۔۔
"خواب اصلی ہیں کہ نقلی"
یوں پرکھتے ہیں کہ جیسے ان سے بڑھ کر
خواب داں کوئی نہ ھو!

خواب گر میں بھی نہیں
صورت گر ثانی ھوں بس ۔۔۔۔۔۔۔
ہاں مگر میری معیشت کا سہارا خواب ہیں!

شام ھو جاتی ھے
میں پھر سے لگاتا ھوں صدا ۔۔۔۔۔۔۔
"مفت لے لو مفت، یہ سونے کے خواب ۔۔۔۔۔۔۔۔۔"
"مفت" سن کر اور ڈر جاتے ہیں لوگ
اور چپکے سے سرک جاتے ہیں لوگ ۔۔۔۔۔۔۔۔۔۔
"دیکھنا یہ "مفت" کہتا ھے
کوئی دھوکا نہ ھو!
ایسا کوئی شعبدہ پنہاں نہ ھو
گھر پہنچ کر ٹوٹ جائیں
یا پگھل جائیں یہ خواب
بھک سے اڑ جائیں کہیں
یا ھم پہ کوئی سحر کر ڈالیں یہ خواب ۔۔۔۔۔۔۔۔۔
جی نہیں کس کام کے؟
ایسے کباڑی کے یہ خواب
ایسے نابینا کباڑی کے یہ خواب!"

رات ھو جاتی ھے
خوابوں کے پلندے سر پہ رکھ کر
منہ بسورے لوٹتا ھوں
رات بھر پھر بڑبڑاتا ھوں
"یہ لے لو خواب ۔۔۔۔۔۔۔۔"
اور لے لو مجھ سے ان کے دام بھی
خواب لے لو، خواب ۔۔۔۔۔۔۔۔۔۔
میرے خواب ۔۔۔۔۔۔۔۔۔۔۔
خواب ۔۔۔۔۔۔۔۔۔ میرے خواب ۔۔۔۔۔۔۔۔۔
خو ا ا ا ا ب ۔۔۔۔۔۔۔۔۔۔۔۔
ان کے د ا ا ا ا م بھی ی ی ی ۔۔۔۔۔۔۔۔۔۔۔۔۔"
 

فرخ منظور

لائبریرین
بہت شکریہ پسندیدگی کا اگر آپ اسی طرح پسند کرتے رہے تو میں شائد راشد کا پورا کلام پوسٹ کر ڈالوں-
 

فرخ منظور

لائبریرین
شکریہ فاتح! ضیا کا کافی ذخیرہ ہے میرے پاس لکین کیسٹس میں اگر اور بھی عنائت کر سکیں تو نوازش ہوگی- کسی وقت آپ کو اپنا تحت اللفظ بھی اپ لوڈ کر کے سناؤں گا-
 

فاتح

لائبریرین
شکریہ فاتح! ضیا کا کافی ذخیرہ ہے میرے پاس لکین کیسٹس میں اگر اور بھی عنائت کر سکیں تو نوازش ہوگی- کسی وقت آپ کو اپنا تحت اللفظ بھی اپ لوڈ کر کے سناؤں گا-

ضرور جناب کیوں نہیں۔ میرے پاس ضیا محی الدین کی چند کیسٹس تھیں جیسے خطوط غالب وغیرہ لیکن میرے پاکستان چھوڑنے پر وہ تمام ورثہ چھوٹے بھائی کے خزانہ کا حصہ بن گیا۔ اگر ممکن ہو تو آپ اس ذخیرہ کو کیسٹس سے ایم پی 3 شکل میں لائیے۔ احسان ہو گا۔ اور اپنی آواز میں بھی ضرور اپلوڈ کیجیے، ایک بار پھر کہوں گا کہ "نیکی اور پوچھ پوچھ"۔
 
نظم : خواب
شاعر: جمیل اختر
۔

خواب بیچنے نکلے ہیں۔۔۔۔
ایسے انمول خواب ۔۔۔۔
کہ انکامول ہونہیں سکتا۔۔۔
جو , انہیں آنکھوں میں رکھے
وہ سو نہیں سکتا۔۔۔۔
،
کہ ہم نے آزما کے دیکھا ہے
رتجگوں کو اٹھا کے دیکھاہے۔۔۔
انکی خوبیاں عیاں ہیں
انکی خوبیاں بیاں ہیں ۔۔
یہ اجلے..........
، یہ دلکش،.....
یہ دلنشیں،.......
یہ رنگین خواب ۔......
،
یہ پھول.....
یہ خوشبو......
، یہ بادل..........
یہ گھٹا..............
یہ حسین خواب ۔.........
.
لیکن افسوس۔۔۔۔۔۔۔۔۔
کوئی ہمارا طرفدار نہیں
کوئی انکا خریدار نہیں
،
، کوئی خریدے گا۔۔۔؟؟؟
پھر آواز لگاتا ہوں۔۔۔
کوئی خریدے گا؟؟؟؟
لیکن یہ خواب کون خریدے گا۔۔۔۔۔
شاید کوئی نہیں۔۔۔۔
ہاں شاید کوئی نہیں۔۔۔
کہ یہ دنیا بہت ظلمت پسند ہے۔۔۔۔
کہ یہ دنیابہت حقیقت پسند ہے۔۔۔۔
 
Top