جون ایلیا یہ پیہم تلخ کامی سی رہی کیا

نیرنگ خیال

لائبریرین
یہ پیہم تلخ کامی سی رہی کیا
محبت زہر کھا کر آئی تھی کیا

مجھے اب تم سے ڈر لگنے لگا ہے
تمہیں مجھ سے محبت ہو گئی کیا

شکستِ اعتمادِ ذات کے وقت
قیامت آرہی تھی، آگئی کیا

مجھے شکوہ نہیں بس پوچھنا ہے
یہ تم ہنستی ہو، اپنی ہی ہنسی کیا

ہمیں شکوہ نہیں، ایک دوسرے سے
منانا چاہیے اس پر خوشی کیا

پڑے ہیں ایک گوشے میں گماں کے
بھلا ہم کیا، ہماری زندگی کیا

میں رخصت ہو رہا ہوں، پر تمہاری
اداسی ہوگئی ہے ملتوی کیا

میں اب ہر شخص سے اکتا چکا ہوں
فقط کچھ دوست ہیں، اور دوست بھی کیا

محبت میں ہمیں پاسِ انا تھا
بدن کی اشتہا صادق نہ تھی کیا

نہیں رشتہ سموچا زندگی سے
نجانے ہم میں ہے اپنی کمی کیا

ابھی ہونے کی باتیں ہیں، سو کر لو
ابھی تو کچھ نہیں ہونا، ابھی کیا

یہی پوچھا کیا میں آج دن بھر
ہر اک انسان کو روٹی ملی کیا

یہ ربطِ بےشکایت اور یہ میں
جو شے سینے میں تھی، وہ بجھ گئی کیا​
 

فاتح

لائبریرین
شکستِ اعتمادِ ذات کے وقت
قیامت آرہی تھی، آگئی کیا

جون کا ہی حصہ تھا اور اس طرح کا کلام وہ ہی کہ سکتے تھے
بہت خوب شراکت
سلامت رہیں
سچ کہا۔۔۔ یہ سہل ممتنع واقعتاً جون ہی کا خاصہ تھا۔
نہ ہُوا، پر نہ ہُوا "جون" کا انداز نصیب
ذوق یاروں نے بہت زور غزل میں مارا
 

نیرنگ خیال

لائبریرین
سچ کہا۔۔۔ یہ سہل ممتنع واقعتاً جون ہی کا خاصہ تھا۔
نہ ہُوا، پر نہ ہُوا "جون" کا انداز نصیب
ذوق یاروں نے بہت زور غزل میں مارا
سچ کہا فاتح بھائی :)

نیرنگ خیال جون کی یہ خیالی رنگ بازی شیئر کرنے پر ممنون ہوں :)
ہاہاہاہااااا۔۔۔۔۔ رنگ بازی خیالی ہی ہوتی ہے فاتح بھائی۔۔۔ :p
شکریہ :)
 
Top