یوں

[عیشل]

لوگ ٹکرا کے در و بام سے مرتے نہ اگر
دیکھ لیتے وہ تیری سمندر آنکھیں
یہ شرارت بھرا لہجہ تو میری عادت ہے
تُو ہر بات پہ یوں نم نہ کیا کر آنکھیں

 

[شمشاد]

ہمارا حال کچھ یوں ہے ترے دربان کے آگے
کہ یخ بستہ مسافر جیسے آتشدان کے آگے
(اعتبار ساجد)

 

[نوید صادق]

تم یوں ہی شریکِ غمِ ہستی نہیں ٹھہرے
سچ بات تو یہ ہے تمہیں چاہا بھی بہت ہے

شاعر: سید آلِ احمد

 

[شمشاد]

’فراز‘ اب کوئی سودا کوئی جنوں بھی نہیں
مگر قرار سے دن کٹ رہے ہوں یوں بھی نہیں
(احمد فراز)

 

[عیشل]

یوں بھی نہیں کہ شہر کو ویران چھوڑ آئے
لوگوں میں اس کے عشق کے امکان چھوڑ آئے
لہجے کے بعد اب وہ بدلتا نگاہ بھی
رستہ بدل کے ہم اسے حیران چھوڑ آئے

 

[شمشاد]

یوں تو کہنے کو ہمارا ساتھ ہے اک عمر کا
لیکن اپنا ساتھ بھی جیسے کوئی زنجیر ہے؟
(ناہید ورک)

 

[عمر سیف]

یوں ہی شاید کوئی تسکین کی صورت نکلے
آؤ افسانہِ آغازِ وفا دہرائیں

 

[شمشاد]

تعارف یوں ہے سرور دیکھئے اس شام محفل میں
وطن اندور ہے ان کا تخلص ان کا راحت ہے
(سرور)

 

[عمر سیف]

یوں تیری رہگذر سے دیوانہ وار گزرے
کاندھے پہ اپنے رکھ کے اپنا مزار گزرے

 

[شمشاد]

فریبِ آرزو رہا قدم قدم یوں ہم سفر
نہ اپنی ہی خبر رہی، نہ تیرا ہی پتا رہا
(سرور)

 

[عمر سیف]

یوں حوصلہ دل نے ہارا کب تھا
سرطان میرا ستارا کب تھا
لازم تھا گزرنا زندگی سے
بِن زہر پیئے گزارا کب تھا

 

[شمشاد]

دوستو دل نے کوئی بات تو سوچی ہوگی
ہارتا ہے کوئی یوں عشق میں بیکار کہیں
(سرور)

 

[عمر سیف]

کسی کو یوں تو ہوا کون عمر پھر بھی
یہ حسن وعشق تو دھوکہ ہے سب مگر پھر بھی

 

[شمشاد]

ضبط یہ پہلا مصرعہ کچھ گڑبڑ لگ رہا ہے۔

 

[عمر سیف]

میرے وجود سے یوں بے خبر ہے وہ جیسے
وہ ایک دھوپ گھڑی ہے میں رات کا پل ہوں

 

[شمشاد]

ماتمِ قیس کریں، نوحۂ فرہاد کریں
آؤ یوں اس دلِ برباد کو آباد کریں
(سرور)

 

[خرم]

رات یوں‌دل میں تری کھوئی ہوئی یاد آئی
جیسے ویرانے میں چپکے سے بہار آجائے
جیسے صحراؤں میں‌چلے ہولے سے بادِنسیم
جیسے بیمار کو بے وجہ قرار آجائے

 

[شمشاد]

فریبِ آرزو رہا قدم قدم یوں ہم سفر
نہ اپنی ہی خبر رہی، نہ تیرا ہی پتا رہا
(سرور)

 

[عمر سیف]

خندہ لب رہتا ہوں یوں انکے سامنے حاصل
دل میں وہ یہ نہ سمجھ لیں کہ خفا ہوں میں بھی

 

[شمشاد]

سدِّ اسکندر ہو از بہرِ نگاہِ گُل رخاں
گر کرے یوں امر نہئیِ بو تراب آئینے پر
(چچا)