یارسول اللہ ﷺ (نعت )

[ڈاکٹر مشاہد رضوی]

یارسول اللہ ﷺ​

​

​

کلام: محمد حسین مشاہدرضوی​

​

بحرِغم میں ہوا غرق میں سر بسر ، مصطفیٰ مصطفیٰ یارسولِ خدا​

مجھ گنہگار پر ہو کرم کی نظر ، مصطفیٰ مصطفیٰ یارسولِ خدا​

ﷺ​

میں نے مانا خطاوں سے معمورہوں ، بادۂ جرم پی پی کے مخمور ہوں​

ہے بھروسہ شفیع الوریٰ آپ پر ، مصطفیٰ مصطفیٰ یارسولِ خدا​

ﷺ​

فوجِ غم بڑھ رہی ہے اِدھر جوش پر ، دافعِ غم خدارا کرم کی نظر​

طاقتِ صبر دیں وقت ہے پُر خطر ، مصطفیٰ مصطفیٰ یارسولِ خدا​

ﷺ​

حالِ دل کس کو جاکر سناوں شہا ، کوئی ہمدم نہ دمساز ہی ہے مرا​

ماسوا آپ کے اے شہ بحرو بر ، مصطفیٰ مصطفیٰ یارسولِ خدا​

ﷺ​

کثرتِ جرم سے میں تباہ ہوگیا ، نامہ عصیاں سے میرا سیاہ ہوگیا​

کر علاجِ گنہ اے مرے چارہ گر ، مصطفیٰ مصطفیٰ یارسولِ خدا​

ﷺ​

در پہ آیا ہوں میں چاک سیٖنہ لیے ، دل کا ٹوٹا ہوا آبگینہ لیے​

دُور کردیجیے رنج وغم کا اثر ، مصطفیٰ مصطفیٰ یارسولِ خدا​

ﷺ​

خلق کے داد رس ، سب کے فریادرس ، بے بسوں کے ہیںبس بے کسوں کے ہیں کس​

آپ خیرالوریٰ آپ خیرالبشر ، مصطفیٰ مصطفیٰ یارسولِ خدا​

ﷺ​

توہے فرماں روا ساری مخلوق کا ، دونوں عالم پہ چلتا ہے سکّہ ترا​

میرا سویا مقدّر بھی بیدار کر ، مصطفیٰ مصطفیٰ یارسولِ خدا​

ﷺ​

عشق وعرفاں بھری زندگی بخشدیں ، قلب تاریک ہے روشنی بخشدیں​

نُورِ ربُّ العلا، مالکِ خشک وتر ، مصطفیٰ مصطفیٰ یارسولِ خدا​

ﷺ​

صدق و عدل و صفا ، حلم و صبر و حیا ، خُلق و زُہد و ورع ، عجزدیں اور غنا​

دور کردیں مُشاہدؔ سے ہر ایک شر ، مصطفیٰ مصطفیٰ یارسولِ خدا​

ﷺ​

٭​

​