فراق گورکھپُوری:::: یُوں تو نہ چارہ کار تھا جان دِیے بغیر بھی ::::Firaq -Gorakhpuri

[طارق شاہ]

غزل
فراقؔ گورکھپُوری

یُوں تو نہ چارہ کار تھا جان دِیے بغیر بھی
عُہدہ بَرا نہ ہوسکا عِشق جیے بغیر بھی

دیکھ یہ شامِ ہجر ہے، دیکھ یہ ہے سکُونِ یاس
کاٹتے ہیں شَبِ فِراق صُبح کیے بغیر بھی

گو کہ زباں نہیں رُکی، پِھر بھی نہ کُچھ کہا گیا
دیکھ سکُوتِ عِشق آج، ہونٹ سیے بغیر بھی

تیرے نِثار ساقیا! بادَہ کشوں میں رات دِن
عالَمِ نشّہ و خُمار، دیکھ پیے بغیر بھی

عِشق کی زندگی کو کیوں، موت سے بڑھ کے کردِیا
اُف یہ سَزا، خطا مُعاف، جان دیے بغیر بھی

دیکھ، نِگاہ پھیر کے، دِل میں نہ رکھ کدُورَتیں
کرگئی کام یہ ادا جان لِیے بغیر بھی

یُوں تو، ہزار کوشِشیں لازمۂ حیات تھیں
کام نہ چل سکا فِراقؔ! کُچھ نہ کیے بغیر بھی

فِراقؔ گورکھپوری
(رگھوپتی سہائے)​