انٹرویو گل یاسمیں سے انٹرویو

[جاسم محمد]

چند ایک سوال آپ کے نارویجن ہمسائے کی طرف سے:
سکینڈینیویا میں کتنا عرصہ سے مقیم ہیں؟ ناروے کتنی بار آنا جانا ہوا؟ کیا وہاں بھی آپ کے کوئی عزیز رشتہ دار ہیں یا سب ڈنمارک، سویڈن میں ہی رہتے ہیں؟

 

[عبدالقدیر 786]

کیا آپ یقین کریں گے کہ "اردو محفل" کی پہلی جھلک جب لیپ ٹاپ پر ظاہر ہوئی تو اس کے ساتھ ہی ہم رجسٹرڈ ہوئے بنا ایک پل سوچے۔۔ بنا ایک سے دوسرے زمرے میں گئے۔۔۔
اور وجہ "نامعلوم" ہر گز نہیں ہے۔ یقیناً اللہ پاک نے ہمیں اپنے لوگوں میں پہنچانا تھا سو پہنچا دیا۔
شاید وہ دن ہی معمول سے زیادہ نازک تھے ہمارے لئے۔۔۔ سو اردو محفل "مرہم" کی صورت مل گئی ہمیں۔
"دھماکےدار" معلوم نہیں کہ کس لحاظ سے کہہ رہے ہیں آپ کیونکہ نہ تو ہم "خودکش بم" کے ساتھ آئے تھے اور نہ دھماکے سے محفل کے کسی در و دیوار میں دراڑ آئی۔
ہاں ہمارے قہقہے چھت پھاڑنے والے ہوتے ہیں کبھی کبھی

میں بہت پہلے سے اردو محفل پر ہوں پر اتنا ایکٹیو نہیں تھا کیونکہ یہاں پر اگر کوئی مراسلہ کرو تو جواب کبھی آتا تھا اور کبھی کبھی آتا ہی نہیں تھا لیکن جب سے گل بہن آئیں ہیں میں بھی اردو محفل پر ایکٹیو ہوگیا کیونکہ جب کوئی مراسلہ کرو تو فوراًگل بہن اُس مراسلے کا جواب دیتی تھی تو اِس وجہ سے پھر اردو محفل پر ایکٹیوٹی بھڑتی گئی۔

 

[گُلِ یاسمیں]

میں بہت پہلے سے اردو محفل پر ہوں پر اتنا ایکٹیو نہیں تھا کیونکہ یہاں پر اگر کوئی مراسلہ کرو تو جواب کبھی آتا تھا اور کبھی کبھی آتا ہی نہیں تھا لیکن جب سے گل بہن آئیں ہیں میں بھی اردو محفل پر ایکٹیو ہوگیا کیونکہ جب کوئی مراسلہ کرو تو فوراًگل بہن اُس مراسلے کا جواب دیتی تھی تو اِس وجہ سے پھر اردو محفل پر ایکٹیوٹی بھڑتی گئی۔

اچھی بات کہ ہمارے آنے سے کسی کی ایکٹیویٹی تو بڑھی۔

سرگوشی

بھڑتی نہیں بڑھتی قدیر بھائی۔

 

[گُلِ یاسمیں]

چند ایک سوال آپ کے نارویجن ہمسائے کی طرف سے:
سکینڈینیویا میں کتنا عرصہ سے مقیم ہیں؟ ناروے کتنی بار آنا جانا ہوا؟ کیا وہاں بھی آپ کے کوئی عزیز رشتہ دار ہیں یا سب ڈنمارک، سویڈن میں ہی رہتے ہیں؟

اس کا تفصیلی جواب پچھلے کسی مراسلہ میں دیا ہے۔مقیم ہونے سے کیا مطلب؟ ہمارا سال کا کچھ حصہ ادھر اور کچھ پاکستان گزرتا رہا ہے۔ لیکن فروری 2020 سے مسلسل پڑاؤ یہیں ہے اب،

ناروے جہاں تک یاد ہے شاید دو بار۔
دور کے عزیز ہیں وہاں مگر آنا جانا نہیں ہے۔ ڈنمارک سویڈن جرمنی اور اٹلی میں۔

 

[گُلِ یاسمیں]

ڈنمارک کی سیاست میں کس حد تک دلچسپی ہے؟

بالکل بھی نہیں۔۔۔۔ کوئی لاکھ سمجھاتا رہے بتاتا رہے۔۔۔ اس بارے ایک لفظ دماغ میں نہیں بیٹھتا یا ہم بٹھانا نہیں چاہتے۔ بس ایک حد تک حالات سے آگاہی رہے۔ اس کے علاوہ نہیں۔
سیاست ملکی ہو یا گھریلو۔۔۔ دلچسپ نہیں

کی محبت تو سیاست کا چلن چھوڑ دیا
ہم اگر عشق نہ کرتے تو حکومت کرتے

 

[گُلِ یاسمیں]

کیا مقامی ٹی وی شوز اور فلم پسند ہیں؟
میں نے نیٹ فلکس پر ایک دو سکینڈے نیوئن ٹی وی شوز دیکھے۔ دلچسپ تھے۔

چند ایک موویز دیکھی ہیں بس۔ ٹی وی شوز خاص طور پر نہیں کبھی دیکھے۔سوائے کچھ کھانے وغیرہ کے یا انٹیک وغیرہ کی سیل کے۔ (اگر وہ ٹی وی شوز میں شمار ہوتے ہیں)
البتہ ایک مار دھاڑ اور خون خرابے والی مووی دیکھی سینما میں۔ ہم بڑے بہادر بنے پھرتے ہیں نا تو یہ ہماری بہادری کی آزمائش تھی۔ تھری ڈی مووی تھی۔ شروع کا ایک آدھ سین دیکھا۔
اور اس کے بعد مووی ختم ہونے تک آنکھیں بند رکھیں۔ سب بڑے جوش و خروش سے کچھ نہ کچھ بول رہے تھے۔ سب میں ہمارےدو بھائی دو بھابیا ں اور کزنز بھائی بھی تھے۔ اپنا موجود ہونا جتلانے کو ہم کچھ دیر بعد کہہ دیتے کہ اتنی اچھی مووی ہے تو خاموشی سے دیکھئیے نا۔ غرضیکہ ہم نے بہت بہادری سے تمام مووی "دیکھی" اور اپنی بہادری کی دھاک بٹھائی۔ ابھی بھی ذکر ہوتا ہے کہ خون ٹپکتا دیکھ کر بھی گُل آرام سے بنا کچھ کہے مووی دیکھتی رہی۔
بس یہی ہے ہماری دلچسپی مقامی ٹی وی تک۔

 

[گُلِ یاسمیں]

کس قسم کا کھانا پکانا زیادہ پسند ہے؟ نئی ریسپیز ٹرائی کرتی ہیں یا صرف پسندیدہ کھانے ہی پکاتی ہیں؟ پاکستانی کھانوں کے علاوہ اور کن علاقوں کے کھانے پکائے ہیں؟بیکنگ اور میٹھا بنانے کا بھی شوق ہے؟

پاکستانی کھانا پکانا زیادہ پسند ہے۔ اس میں جو بھی قسم ہو۔ کچھ نہیں بھی آتے ہوں گے جو عام نہ پکتے ہوں گے گھر میں۔
ہاں نئی ریسیپیز وقتاً فوقتاً ٹرائی کرتے رہتے ہیں۔
پسندیدہ ہی پکائیں تو ہفتے میں 7 دن کسی نہ کسی صورت پالک ہی پکتی رہے۔
چائنیز ہمیں کچھ خاص پسند نہیں لیکن اچھی ریسیپی ہو تو پکانا مشکل نہیں لگا کبھی۔
چیچینیا کی کچھ سوئیٹس ٹرائی کی ہیں۔ بیکنگ بہت پسند ہے۔ محفل میں شئیر بھی کی ہیں کپ کیکس اور چاکلیٹ کوٹڈ سٹرا بیریز کی تصاویر۔
میٹھا میں جلیبیاں، گلاب جامن، رس گلے بنا لیتے ہیں۔ گاجر کا حلوہ، کھیر تو اکثر بناتے رہتے۔ کیک وغیرہ بھی۔
جیسی ضرورت ہو اس کے مطابق بے دھڑک بنا لیتے ہیں۔

 

[گُلِ یاسمیں]

جب ہم دوسروں کے غم پڑھتے ہیں تو اپنے غم بھول جاتے ہیں۔ اللہ تعالی آپ اور اہل و عیال کو صبر و استقامت عطا کرے۔ آمین

آمین ثم آمین
جی جاسم بھائی ایسا ہی ہوتا ہے۔ غم کسی کا چھوٹا بڑا نہیں ہوتا۔۔۔ غم تو غم ہوتا ہے ، اپنی چھاپ چھوڑ دیتا ہے۔ انسان کی زندگی ہی بدل جاتی ہے۔
اللہ پاک جدائیوں کے صدمہ سے بچائے رکھے آمین۔

سلامت رہئیے۔

 

[جاسمن]

اللہ قسمت اچھی کرے۔ ڈھیروں خوشیاں اور آسانیاں عطا فرمائے۔ اپنے حفظ و امان میں رکھے۔ آمین!

 

[محمد تابش صدیقی]

ابھی تک نور وجدان بہن نے مشکل والے سوالات نہیں پوچھے۔

 

[علی وقار]

نہیں سینئیر ایکٹیوٹی سنٹر نہیں۔۔۔ 18 سے لے کر اوپر تک ہر عمر کے لوگ ہوتے ہیں۔ جو زیادہ تر اکیلے ہوتے ہیں اور کسی قسم کے کام میں یا صرف وقت گزارنے کی حد تک آتے ہیں۔
ایکٹیوٹیز مختلف قسم کی ہیں سٹچنگ، ہینڈ نٹنگ، مشین نٹنگ، بیڈ ورک، پیچ ورک، پینٹنگ، ٹیکسٹیل پینٹنگ، ککنگ۔ کمپیوٹر، میوزک، ڈانس ایکسر سائز اور decoupage وغیرہ ہیں۔
ایک گروپ میں زیادہ سے زیادہ 8 لوگ شامل ہو سکتے ہیں۔ ایک بندے کی نگرانی میں جس کا کام انھیں سکھانا ہوتا ہے یا اس سلسلہ میں مدد کرنی ہوتی ہے، اور یہی رول ہم سرانجام دیتے ہیں۔
ہفتے میں دو یا تین کلاسز ہوتی ہیں ہماری۔ جن کا ہم ذکر کر رہے ہیں یہ زیادہ تر خواتین ہیں کیونکہ جو جینٹس ہیں وہ زیادہ تر کمپیوٹر اور گارڈننگ وغیرہ میں دلچسپی لیتے ہیں۔
ہماری دلچسپی کیسے ہوئی۔۔۔ اس بارے تھوڑا بتاتے چلیں تو شاید آپ ہمارے اس جنون کو سمجھ جائیں۔
امی ابو کی وفات کے بعد ہمیں شدید ڈپریشن ہوا۔ ابو جان کی وفات پہلے ہوئی اور اتفاق ایسا ہوا کہ اس وقت وہ پاکستان تھے کچھ زمین کے معاملات نمٹانے کے لئے جو دادا جان کی وفات کے بعد ان پر آ پڑے تھے۔ ہم نہیں جا پائے۔ یا شاید یہاں بھی "لاڈ پیار" ہی آڑے آیا کہ کیسے برداشت کرے گی گُل۔ اس سے پہلے دادا جان کی بھی ڈیتھ ہوئی، جس وقت شدید بیمار تھے تو پوچھا گیا ان سے کہ گُل کو بلا دیں۔۔۔ بنا ملے چلے گئے، اپنی طرف سے سب ہمارے لئے اچھا کر رہے تھے کہ ہمارے نازک دل پہ کوئی ٹیس نہ لگے، مگر ہر بار ایک کسک سی دل میں رہ جاتی، پھر یوں ہوا کہ ہم امی جان کے ساتھ پاکستان گئے تھے۔ امی جان کو ابھی رہنا تھا وہاں جبکہ ہمیں آنا تھا واپس۔ تو ہم نے کہا کہ چار ماہ بعد آ کر آپ کو واپس لے جائیں گے۔ بیمار تو تھیں نہیں امی جان۔ چاتھا مہینہ ختم ہونے کا آخری دن تھا کہ فون کی گھنٹی بجی اور کزن نے بتایا کہ تائی اماں نہیں رہیں۔
بھائیوں کو اور ہمیں جیسے جیسے فلائیٹ ملی، پہنچے ۔ وہ دن ہمارے "جھلے" اور "لاپرواہ" دکھنے کا آخری دن تھا۔ جس وقت جنازہ اٹھایا جانا تھا۔۔۔ تو سب سے بڑے بھائی ہمارے پاس کھڑے تھے، اور جیسے بالکل ٹوٹے ہوئے۔۔۔نجانے کیسا وقت اور کیسا احساس تھا کہ ہم نے ان کے سر پر شفقت سے ہاتھ رکھ دیا اور کہا "امی جان کو جانے دیں ، ابو جی انتظار میں ہوں گے۔"
پھر تو رونا جیسے ہم نے اپنے اوپر حرام کر لیا کہ بھائی لوگ نہ پریشان ہوں ۔ جو لاڈ پیار ہم ان سے لیتے آئے تھے، وہ لوٹانے کا وقت آ گیا تھا۔ بہت حساس طبیعت پائی ہے ہم نے مگر جو بھی آنسو ہوتے آنکھوں سے نہ ٹپکنے دئیے۔۔۔ بس دل میں گرتے رہے۔اور ایک دن پیمانہ لبریز ہو گیا برداشت کا، چیخنا اور دیواروں سے سر ٹکرانا ۔ واپس آنے کے بعد ظاہر ہے کہ امی جان نظر نہ آتی تھیں۔ بند کمرہ ، پردے گرائے بس یونہی وقت گزرتا، ہسپتال ایڈمٹ کئی کئی ہفتے، اینٹی ڈیپریشن صحت بگاڑنے لگے۔ اس دوران جو سب سے برا تجربہ ہمیں ہوا وہ خود کو زمین اور آسمان کے بیچ معلق محسوس کرنا تھا۔ اس میں چار سے پانچ دن گزرجاتے اور ہمیں سمجھ نہ آتی تھی کہ ہم زمین پر ہیں یا زمین اور آسمان کے بیچ لٹکے ہوئے ہیں۔ اور پھر یہ کیفیت ختم ہو جاتی آہستہ آہستہ۔ خوفناک سی تھی ۔۔ جب بندہ خود کو کہیں موجود ہی نہ پا رہا ہو۔
ہسپتال میں ہی کئی مریض ایسے نظر آئے کہ اپنی بازوکی نسیں کاٹی ہوئی ہیں۔ زندگی سے مایوس لوگ۔ دردناک حالت میں دیکھے لوگ۔خود کو ایسی جگہ ہاسپٹل میں دیکھ کر سوچا کہ گُل کیوں ہے یہاں؟ اللہ پاک نے بہت کرم کیا اور ہمارے دل میں سورت رحمٰن معہ ترجمہ سننے کی خواہش ہوئی۔ اور ہم اس حقیقت کو پا گئے کہ "تو تم اللہ کی کون کون سی نعمت کو جھٹلاؤ گے" پھر ہر کام ہر بات میں بس یہی ورد جاری رکھا اور پر توجہ مرکوز رکھی۔ ایک ہفتہ ہی گزرا ہو گا کہ واضح تبدیلی صحت میں ہوئی۔ اور ہم نے ایکٹیویٹی سینٹر میں جانا شروع کیا ۔ تا کہ دیکھ سکیں کیا کچھ ہے وہاں۔
شاید دو تین مہینے ہی گزرے، تب ہم نے پہلی بار پیچ ورک شروع کیا تھا۔ اور اندازہ ہوا تھا کہ ڈپریشن میں بہت مدد گار ہے۔ سوچوں کو ایک جگہ مرکوز کرنے میں بہت مدد دیتا ہے۔
ہمارے مشاغل تو آپ دیکھتے ہی رہتے ہیں کسی نہ کسی لڑی میں۔ تو وہاں بھی یہ حال تھا۔ کہ سب کو دیکھنا ہوتا تھا ہم نے نیا کیا بنایا ہے۔ ہمیں اچھا محسوس ہونے لگا اور پھر وہاں جو ہماری ٹیچر تھی ، اس نے پوچھا کہ میری مدد گار بن سکتی ہو؟ ہم نے ہاں کر دی۔ دو مہینے اس کے ساتھ ہی کلاس لی۔ پھر ہمارا الگ گروپ بنا دیا گیا۔ گروپ میں لوگ آتے جاتے رہتے ہیں۔ 25 سے لے کر 87 سال تک کی خواتین ہیں۔ کچھ تو معذور ہیں اور اپنی زندگی کے آخری دن یوں کسی طرف دھیان لگا کر گزار رہی ہیں۔ کچھ ویسے بیمار ہیں تو کبھی صرف دیکھنے کے لئے بیٹھی رہتی ہیں۔ دو کو کینسر ہے ۔۔ ایک کی تو ڈیتھ ہو گئی۔ جو تین چار گھنٹے ان کے ساتھ گزرتے ہیں، یہی کوشش ہوتی ہے کہ ان کو چھوٹی چھوٹی خوشیاں دے سکیں۔ کسی کو اچھے سامع کی ضرورت ہوتی ہے، کسی کو ویسے کسی کی توجہ چاہئیے ہوتی ہے۔ بس اپنائیت دینا بہت حوصلے کا کام ہوتا ہے جب کہ انسان خود بھی ٹوٹ پھوٹ کا شکار ہو۔ اسی دوران بھائی کی بھی وفات ہو گئی۔ اچانک ہی معلوم ہوا کہ انھیں کینسر ہے۔اٹلی میں تھے اس وقت جب معلوم ہوا مگر پھر بھابی کی خواہش پہ پاکستان چلے گئے اور تین ہفتوں میں وفات پا گئے۔ آخری دن انھیں ڈاکٹر نے بتا دیا تھا کہ بس آج کا دن ہے جس سے بات کرنا چاہتے ہو کر لو۔ ہمیں کال کی انھوں نے۔ اور بہت حوصلے سے بات کرتے رہے خوش خوش۔ اور ہمیں تسلی دیتے رہے کہ میں علاج کروا رہا ہوں اور بالکل ٹھیک ہوں اب۔ ہم بھی یقین کر بیٹھے کہ اب اتنے اچھے سے بات کر رہے ہیں تو ٹھیک ہی ہیں۔ چند گھنٹے ہی گزرے کہ وہ خبر آئی جس کا سوچا بھی نہ تھا۔ ابھی بھی ان کا وہ خوشگوار سا لہجہ کانوں میں گونجتا ہے اور ہم یہی سوچتے ہیں کہ معلوم ہو جانے کے بعد اتنا مطمئن کیسے رہ سکتا ہے انسان۔ بہت زندہ دل تھے، ہر وقت ہمیں ستاتے رہنا۔ اور دوسرے بھائیوں سے ڈانٹ کھانا۔
بتانے کا مقصد یہ کہ جو ہم اپنوں کے لئے نہیں کر پائے ان کی خدمت کی صورت۔۔۔ تو اب ان خواتین کے لئے اپنی خدمات پیش کر دی ہیں۔ اور سو فیصد اللہ پاک کی خوشنودی کے لئے ہے ۔ رضاکارانہ طور پر ہے۔ اس کے بدلے ہمارا صلہ اللہ پاک کے پاس محفوظ ہو رہا ہے اور وہی ہمارا آخرت سنوارنے کا ذریعہ ہے۔ باقی نماز روزہ تو فرضی عبادات ہیں وہ تو کرنی ہی کرنی ہیں حسبِ ہدایت۔ چند گھڑیوں کی خوشی دے کر اپنا دل بھی خوش ہو جاتا ہے۔ اللہ پاک توفیق دئیے رکھے اور ہمت بھی۔۔۔ آمین۔
اس ایکٹیویٹی سینٹر میں کرسمس سےتین مہینے پہلے کچھ مختلف کرافٹس بنانا شروع کرتے ہیں۔ جو دسبر میں فروخت کئے جاتے ہیں اور وہ رقم انھی پر کسی پارٹی یا کسی اور تفریح پر استعمال کی جاتی ہے۔ ایک دنیا بسی ہوئی ہے یہاں بھی۔۔۔ کئی بار جاؤ صبح تو معلوم ہوتا ہے کہ ان میں سے کوئی ایک نہیں رہا۔۔۔ ایسے ہی محسوس ہوتا ہے جیسے کوئی اپنا چلا گیا۔ بہت لگاؤ ہو گیا ہے۔ لگتا ہے کہ بس اب زندگی کا یہی ایک مقصد ہے۔ اس کے علاوہ کچھ بھی نہیں ہے۔
حقیقت یہ ہے کہ اللہ پاک کی محبت اور ہر نعمت کو محسوس نہ کر پاتے تو شاید نیک راہ نہ پاتے جو فلاح کی طرف لے جانے کا سبب بنی۔
پاگل ہو جاتے ورنہ

تن من میرا پرزے پرزے جیویں درزی دیاں لیراں ھُو
ایناں لیراں دی یارو گل کفنی پا کے رل ساں سنگ فقیراں ھُو

اور اب محفل ہے ساتھ میں تو یہاں ہنس بول کر کافی انرجی مل جاتی ہے ۔

آہ!

غم ہستی کا اسد کس سے ہو جز مرگ علاج
شمع ہر رنگ میں جلتی ہے سحر ہوتے تک

 

[نور وجدان]

ابھی تک نور وجدان بہن نے مشکل والے سوالات نہیں پوچھے۔

پہلے اتنی لمبی لڑی پڑھوں؟
گل کے دھاگے اس لیے نہیں پڑھ سکتی کہ کافی لمبے ہوتے ہیں اور اک صفحہ پڑھ کے محفل بند ہو جاتی. اور کوئ دھاگہ چل نہیں رہا ہوتا تو میں اب کرتی ہوں سوال پہلا صفحہ پڑھ کے. باقی اللہ والا کوئ اگلے صفحات کا خلاصہ دے دے تو بڑی بات ہوگی

 

[محمد عبدالرؤوف]

پہلے اتنی لمبی لڑی پڑھوں؟
گل کے دھاگے اس لیے نہیں پڑھ سکتی کہ کافی لمبے ہوتے ہیں اور اک صفحہ پڑھ کے محفل بند ہو جاتی. اور کوئ دھاگہ چل نہیں رہا ہوتا تو میں اب کرتی ہوں سوال پہلا صفحہ پڑھ کے. باقی اللہ والا کوئ اگلے صفحات کا خلاصہ دے دے تو بڑی بات ہوگی

آپ سوال داغیں، باقی کا دیکھا جائے گا

 

[محمد تابش صدیقی]

پہلے اتنی لمبی لڑی پڑھوں؟
گل کے دھاگے اس لیے نہیں پڑھ سکتی کہ کافی لمبے ہوتے ہیں اور اک صفحہ پڑھ کے محفل بند ہو جاتی. اور کوئ دھاگہ چل نہیں رہا ہوتا تو میں اب کرتی ہوں سوال پہلا صفحہ پڑھ کے. باقی اللہ والا کوئ اگلے صفحات کا خلاصہ دے دے تو بڑی بات ہوگی

بے فکر رہیں۔ آپ والے سوالات کسی نے نہیں پوچھے ہوں گے۔

 

[نور وجدان]

قلم کار: جیسا کہ آپ کہانی کو دہرا رہی ہیں تو کبھی ایسے واقعات بھی گزرے جس سے آپ کو لگا ہے یہ "جگہ " دیکھی دیکھی ہے؟ یہ لوگ؟ حالانکہ جگہ انجان ہو

* دیوار سے ٹکر مارنے سے دماغ پر چوٹ آسکتی ہے، ایسا کچھ ہوا ہے؟

بچپن میں ایسی مووی جو یادگار رہی ہو، جس کو دیکھ کے سوچا ہو، یہ کردار میرا ہو!


میاں محمد بخش کے کلام کی ایسی خصوصیت جو سب دنیا والے بھی جانتے ہوں مگر آپ کی "تن بیتی " ہو؟

اکثر پاکستانی جادو، تعویز ٹونے، جنات کے چکر میں رہتے. ان کو لگتا ان کے تمام مسائل کسی تعویز، کسی جن کے بدولت ہیں. آپ دو ثقافتوں کے ساتھ رہ رہی ہیں. آپ کا یہ سفر کیسا رہا؟ کیسے تبدیل ہوئ؟ تبدیلی آئی یا وہ بھی نہیں آئی؟

آپ جتنی سطح پر ہیں، اتنی گہرائی میں ہیں. گہرائی میں آپ کو جو ملا، کیا سطح آب پر وہی تلاش رہی ہیں؟


آپ نے لکھا، آپ نے "راز حیات " پالیا ہے. آپ کا "اکٹیوٹی سینٹر " اس "رمز " کو پالینے بعد شروع ہوا. تو آپ اس سفر پر کچھ روشنی ڈالنا پسند کریں گی؟ روشنی "ٹارچ لائٹ والی " نہ ہو


زندگی کا مقصد "آخرت " کے ساتھ مشروط کردیا، کیا آپ کو لگتا نہیں یہ خدا کے ساتھ تجارت ہے؟

میں نے کوشش کی ہے ذاتی سوال نہ ہو مگر جو آپ کو اچھا نہ لگے، آپ اسکو "نظر انداز " کر دیجیے گا ... باقی سوال ان جوابات کے بعد پوچھوں گی، اگر مناسب لگا آپکو تو ..

 

[سیما علی]

ہم سادہ دل لوگ۔۔۔ سادہ دلی سے ہر بات کا جواب دئیے جاتے ہیں۔ جس کے بس میں ہو کیچ کرے جس کے بس میں نہ ہو۔۔۔ گزر جانے دے۔

ہارن دے کر پاس کرے ورنہ برداشت کرے ۔۔۔۔۔۔۔

 

[محمد عبدالرؤوف]

ہارن دے کر پاس کرے ورنہ برداشت کرے ۔۔۔۔۔۔۔

یعنی کہ آپ نے ٹرکوں والی شاعری بھی پڑھ رکھی ہے

 

[سیما علی]

مستقبل کے کیا اردے ہیں ۔

The most important

 

[سیما علی]

یعنی کہ آپ نے ٹرکوں والی شاعری بھی پڑھ رکھی ہے

سوزوکی تجھے قسم ہے ہمت نہ ہارنا جتنے بھی جمپ آئیں ہنس کر گذارنا

 

[سیما علی]

ورنہ تو ہم بھی ابھی کم سنی میں ہیں ماشااللہ

اسکی گواہ ہماری سماعتیں ہیں ۔۔۔۔۔
ہم سماعت کو ہتھیلی پہ لئے پھرتے ہیں
تیری آواز میں کوئی تو پکارے ہم۔ کو!!!