اصغر گونڈوی پھر میں نظر آیا، نہ تماشا نظر آیا ۔ اصغر گونڈوی

[فرخ منظور]

پھر میں نظر آیا، نہ تماشا نظر آیا
جب تُو نظر آیا مجھے تنہا نظر آیا

اللہ رے دیوانگئ شوق کا عالم
اک رقص میں ہر ذرّہ صحرا نظر آیا

اُٹھّے عجب انداز سے وہ جوشِ غضب میں
چڑھتا ہوا اک حُسن کا دریا نظر آیا

کس درجہ ترا حسن بھی آشوبِ جہاں ہے
جس ذرّے کو دیکھا وہ تڑپتا نظر آیا

اب خود ترا جلوہ جو دکھا دے، وہ دکھا دے
یہ دیدہء بینا تو تماشا نظر آیا

تھا لطفِ جنوں دیدہء خوں نابہ فشاں سے
پھولوں سے بھرا دامنِ صحرا نظر آیا

 

[محمد وارث]

واہ واہ واہ، کیا خوبصورت اشعار ہیں تمام کے تمام، کیا 'استادانہ' غزل ہے، لا جواب

شکریہ فرخ صاحب خوبصورت کلام شیئر کرنے کیلیے!

 

[فرخ منظور]

واہ واہ واہ، کیا خوبصورت اشعار ہیں تمام کے تمام، کیا 'استادانہ' غزل ہے، لا جواب

شکریہ فرخ صاحب خوبصورت کلام شیئر کرنے کیلیے!

واقعی بہت استادانہ غزل ہے وارث صاحب۔ لیکن اصغر اساتذہ میں اس غزل کی وجہ سے شمار ہونے سے رہے قبلہ!

 

[جیہ]

بہت مبالغہ آمیز غزل ہے۔۔۔۔ مبالغہ ایک حد تک ہی اچھا لگتا ہے

 

[فرخ منظور]

بہت مبالغہ آمیز غزل ہے۔۔۔۔ مبالغہ ایک حد تک ہی اچھا لگتا ہے

بہت شکریہ جویریہ! ویسے مجھے اس غزل میں مبالغہ کہیں نظر نہیں آیا۔ کیونکہ غزل پڑھنے کے بعد
پھر میں نظر آیا، نہ تماشا نطر آیا

 

[جیہ]

مبالغہ کیا ہے؟ ہر ذرہء صحرا کو نچوانا، پھر اسی ذرے کو تڑپانا مبالغہ نہیں کیا؟

پھر میں نظر آیا نہ، نہ تماشا نطر آیا

اور ایک نقطہ بھی نظر نہیں آ رہا

 

[فرخ منظور]

مبالغہ کیا ہے؟ ہر ذرہء صحرا کو نچوانا، پھر اسی ذرے کو تڑپانا مبالغہ نہیں کیا؟



اور ایک نقطہ بھی نظر نہیں آ رہا

اگر شاعری میں مبالغہ نہ ہو تو شاعری، شاعری نہیں‌ رہتی فقط حقیقت نگاری بن جاتی ہے۔