جوش نظم - ابر اُٹھا وہ ناگہاں - جوش ملیح‌ آبادی

محمد وارث

لائبریرین
ابر اُٹھا وہ ناگہاں
(جوش ملیح آبادی)



ابر اٹھا وہ ناگہاں
نغمہ زناں، ترانہ خواں
تُند عناں، رواں دواں
رقص کناں و پر فشاں
ساقیٔ بادہ فام ہاں

ابر اٹھا وہ ناگہاں
مُژدہ ہو خیلِ مے کشاں
ابر اٹھا وہ ناگہاں


سرخ و سیاہ روز و شب
غرقِ تلاطمِ عَنَب
ارض و سما بہ صد طرَب
سینہ بہ سینہ، لب بہ لب
چشم بہ چشم، جاں بہ جاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


ہمہمہ، ہاؤ ہو، ہُمک
دھوم، دھمک، دہل، دمک
جھوم، جھڑی، جھلک، جھمک
گونج، گرج، گھمر، گمک
کوہ و کمر کشاں کشاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


گنگ و جمن میں کھلبلی
دشت و جبل پہ تیرگی
طاق و رواق اگرَئی
پست و بلند سرمئی
ارض و سما دھواں دھواں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


ابرِ سیہ جھکا، رکا
عمرِ رواں رسن بہ پا
ظلمت و نور ہم رِدا
نصب ہے خیمہ وقت کا
شام و سحر کے درمیاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


چرخِ ترانہ بار پر
چادرِ زرنگار پر
جادۂ لالہ کار پر
مینہ کے ہر ایک تار پر
دُھنکی ہوئی دھنک دواں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


غرقِ نشاط بحر و بر
آبِ غنا کمر کمر
تھاپ کی گونج الحذر
جھوم گئے شجر و حجر
کُوک اٹھیں جوانیاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


کھول رہی ہے بال، نے
گھول رہی ہے سُر میں لے
تول رہی ہے رُخ کو مے
ڈول رہا ہے فرِّ کَے
بول رہی ہیں انکھڑیاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


سانولیاں مہک گئیں
نشہ چڑھا، دہک گئیں
مست ہوئیں، بہک گئیں
چوڑیاں سب کھنک گئیں
تن میں کڑک اٹھی کماں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


رقص کے پھر عَلَم گڑے
لَے نے ہوا پہ رنگ جڑے
بجنے لگے کڑے چھڑے
کیف میں پاؤں یوں پڑے
فرش ہوا رواں دواں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


گائے نرَت میں ولولے
بھاؤ میں بول جاگ اٹھے
تال کے بال کُھل گئے
ہاتھ اٹھے جُڑے جُڑے
قوسِ قزح کا سائباں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


جھول رہے ہیں سیم تن
جُھوم رہا ہے بانکپن
زیر و زبر ہے پھول بن
چیخ رہے ہیں یوں بدن
گونج رہی ہیں چولیاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


با ہمہ شوخی و فسوں
زیرِ نوائے ارغنوں
شرم کی جھلکیاں ہیں یوں
جیسے کھڑی ہیں سرنگوں
بیاہیوں میں کنواریاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


اُف یہ رقیق اوڑھنی
بوندیوں کی بنی ہوئی
مے میں سموئی سر خوشی
نَے میں ڈھلی شگفتگی
لے میں پروئی بوندیاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


سوئے زمیں گھٹا چلی
چھائی گھٹا، فضا چلی
گائی فضا، ہوا چلی
آئی ہوا، نوا چلی
زیرِ نوا چھنن چھناں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


آبِ رواں شَرَر شَرَر
اولتیاں جَھرَر جَھرَر
برقِ تپاں کَرَر کَرَر
جام و سبو جَگر جَگر
چرخِ کہن گھنن گھناں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


کاگ اُڑے، جلا اگر
پردہ ہلا، اٹھی نظر
آئی وہ دخترِ قمر
شیشے جھکے، بجا گجر
قلقلِ مے نے دی اذاں

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


اُف یہ غزالہ خُو سفر
اُف یہ خروشِ بال و پر
بہرِ خدا، ٹھہر، ٹھہر
فرشِ زمیں کدھر؟ کدھر؟
چرخِ بریں، کہاں کہاں؟

ابر اٹھا وہ ناگہاں
مژدہ ہو خیلِ مے کشاں
ابر اٹھا وہ ناگہاں


"فنون، جولائی 1963ء"
 

فرخ منظور

لائبریرین
وارث صاحب بہت خوبصورت نظم ہے۔ لیکن حیرت ہے نظم اور آپ؟ :eek: خیر بہت ہی موسیقیت اور روانی ہے نظم میں۔ واقعی پتہ چلتا ہے کہ اردو جوش کی باندی تھی۔ :) بہت شکریہ پوسٹ کے لئے
 

محمد وارث

لائبریرین
شکریہ فرخ صاحب اور مغل صاحب!

فرخ صاحب، بجا کہا آپ نے کہ اس نظم سے جوش کی قادر الکلامی ظاہر ہوتی ہے، اور یہ نظم تغزل سے بھرپور ہے سو مجھے بھی اچھی لگی :)
 

الف نظامی

لائبریرین
بہت خوب۔
ہمہمہ، ہاؤ ہو، ہُمک
دھوم، دھمک، دہل، دمک
جھوم، جھڑی، جھلک، جھمک
گونج، گرج، گھمر، گمک
کوہ و کمر کشاں کشاںہمہمہ، ہاؤ ہو، ہُمک
دھوم، دھمک، دہل، دمک
جھوم، جھڑی، جھلک، جھمک
گونج، گرج، گھمر، گمک
کوہ و کمر کشاں کشاں

آبِ رواں شَرَر شَرَر
اولتیاں جَھرَر جَھرَر
برقِ تپاں کَرَر کَرَر
جام و سبو جَگر جَگر
چرخِ کہن گھنن گھناں

وارث صاحب یہ تغزل کیا ہوتا ہے؟
 

محمد وارث

لائبریرین
شکریہ امید اور نظامی صاحب!

تغزل، رنگِ غزل، اور اسکی چاشنی، اور شعروں کا حسن جس سے سماں بندھ جاتا ہے، اور قاری لطف و نشاط و کیف و وارفتگی سی محسوس کرتا ہے!
 
Top