محاورے کی زبان میں بات کریں ۔۔!

[چھوٹاغالبؔ]

اب وہی بات ہو گئی کہ نماز بخشوانے گئے تھے روزے بھی گلے پڑے۔۔۔ ۔! میں نے شمشاد بھائی کی شکایت کی تھی تو اب وارث صاحب ہاتھ دھو کر میرے پیچھے پڑ گئے ہیں ۔۔۔ !

ابھی ان سے جان چھوٹی نہ تھی کہ چھوٹے غالبؔ نے گردن ناپ لی

اب ذیشان کہے گا آسمان سے گرا اور کھجور میں اٹکا

لیکن جو مرضی کر لو ذیشان ۔ نقار خانے میں طوطی کی کون سنتا ہے

 

[محمداحمد]

غضب ہوگیا جمعرات سے اب تک سارے بامحاورہ حضرات ۔۔۔۔۔۔ کے سر سے سینگ کی طرح غائب ہیں۔

 

[شمشاد]

جمعہ جمعہ آٹھ دن بھی نہیں ہوئے اس دھاگے کو شروع ہوئے، اور کتنے پیغام ہو جائیں۔

 

[زبیر مرزا]

شمشاد ایسے تو نہیں کہ ناچ نا جانے تو آنگن ٹیڑھا

 

[محمداحمد]

بھائی۔۔۔۔! نہ لوگ یہاں آئیں گے نہ یہ لڑی آگے بڑھے گی۔ نہ نو من تیل ہوگا نہ رادھا ناچے گی۔

 

[الف عین]

چلو میں تو آ گیا اب تیل دیکھو اور تیل کی دھار!!

 

[محمداحمد]

چشم ما روشن دلِ ماشاد۔ جم جم آئیے محترم ۔ آپ ہی کا انتظار تھا۔

 

[چھوٹاغالبؔ]

بہت خوب
محاوروں کی ایسی مار ماری ہے کہ صاحبِ دھاگہ کے دانت کھٹے ہو گئے
کہاں گم ہو ذیشان؟ (اب بندہ گدھے کا سینگ لکھتا اچھا تو نہیں لگتا نا)

 

[محمداحمد]

آ جائیں گے ذیشان بھائی بھی ۔ ہم سب ہی خمِ زلفِ روز گار کے اسیروں میں شامل ہیں۔ مصروف ہوں گے۔

 

[محمداحمد]

متلاشی

ذیشان بھائی۔۔۔۔! کون سی گنگا نہانے گئے ہوئے ہیں آج کل؟

 

[الف عین]

متلاشی اب آجاؤ، یہاں سب انتظار میں سوکھ کر کانٹا ہو رہے ہیں

 

[شارق مستقیم]

اگر مجھ پر اپنے منہ میاں مٹھو بننے کا الزام نہ لگے تو کہنے دیں کہ اپنی جان پر کھیل کر یہ دھاگہ پڑھا ہے۔

ویسے ایک پنتھ دو کاج کے مصداق پوچھتا چلوں کہ اعجاز صاحب یہ محاورے اور کہاوت میں کیا فرق ہوتا ہے؟

 

[شمشاد]

صبح کا بھولا شام کو گھر آ جائے تو اسے بھولا نہیں کہتے۔

شارق بھائی خوش آمدید۔

 

[زبیر مرزا]

شمشاد ہم تو آم کے آم گٹھلیوں کے دام پوچھتے پھر رہے کہ کھانے کو نہ سہی دیکھنے کو ہی مل جائیں ( پاکستانی آم)

 

[الف عین]

اگر مجھ پر اپنے منہ میاں مٹھو بننے کا الزام نہ لگے تو کہنے دیں کہ اپنی جان پر کھیل کر یہ دھاگہ پڑھا ہے۔

ویسے ایک پنتھ دو کاج کے مصداق پوچھتا چلوں کہ اعجاز صاحب یہ محاورے اور کہاوت میں کیا فرق ہوتا ہے؟

ایک لفظ اور جوڑا جا سکتا ہے، ضرب المثل۔ یہ سب ایک ہی تھیلی کے چٹے بٹے ہیں، فارسی۔ محاورہ، ہندی کہاوت، عربی ضرب المثل

 

[محمداحمد]

یہ تھیلیاں بھی عجیب ہوتی ہیں کہ ہوتے تو اس میں چٹے بٹے ہیں لیکن باہر ہمیشہ بلی آتی ہے، اب اس بلی کے گلے میں کون گھنٹی باندھے، کچھ سجھائی نہیں دیتا۔

 

[متلاشی]

بہت خوب
محاوروں کی ایسی مار ماری ہے کہ صاحبِ دھاگہ کے دانت کھٹے ہو گئے
کہاں گم ہو ذیشان؟ (اب بندہ گدھے کا سینگ لکھتا اچھا تو نہیں لگتا نا)

بس چھوٹے غالب صاحب کچھ دنوں کے لئے نیٹ کی سہولت میسر نہیں تھی ۔۔۔ اسی لئے یہاں قدم رنجہ نہ فرما سکا۔۔۔ خیردیر آید درست آید کے مصداق اب آ ہی گیا ہوں ۔۔۔!

 

[متلاشی]

یہ تھیلیاں بھی عجیب ہوتی ہیں کہ ہوتے تو اس میں چٹے بٹے ہیں لیکن باہر ہمیشہ بلی آتی ہے، اب اس بلی کے گلے میں کون گھنٹی باندھے، کچھ سجھائی نہیں دیتا۔

احمد بھائی میں تو بلی کے گلے میں گھنٹی باندھنے سے رہا ۔۔۔! اگر یہ کارِ خیر آپ اپنے دستِ مبارک سے فرما دیں تو بیچارے چوہوں کا بھی بھلا ہو جائے ۔۔۔!

 

[موجو]

بن بلائے مہمان کی طرح آ تو گئے ہیں مگر کوئی سِرا پکڑائی نہیں دے رہا

 

[برگ حنا]

ہم بھی " مان نہ مان میں تیرا مہمان " بن کر یہاں آگئے،اب جو چاہے آپ کا حسنِ کرشمہ ساز کرے" ان بن بلائے مہمانوں کے ساتھ۔
ویسے ہم مہمان تھوڑی ہیں یہ تو ہماری اپنی محفل ہے بالکل اپنے گھر جیسی اور " اپنا گھر اپنی جنت" ہی تو ہوتا ہے سو اپنے گھر بن بلائے ہی آتے ہیں۔