طارق شاہ
محفلین
غزل
آ ہی جائے گی سَحر مطلعِ اِمکاں تو کُھلا
نہ سہی بابِ قفس، روزنِ زِنداں تو کُھلا
لے کے آئی تو صبا اُس گُلِ چینی کا پیام
وہ سہی زخم کی صُورت، لبِ خنداں تو کُھلا
سیلِ رنگ آ ہی رہے گا، مگر اے کشتِ چمن!
ضربِ موسم تو پڑی، بند ِبہاراں تو کُھلا
دِل تلک پہنچے نہ پہنچے، مگر اے چشم ِحیات !
بعد مُدّت کے تِرا پنجۂ مِژگاں تو کُھلا
درد کا درد سے رِشتہ ہے، چلو اے مجروحؔ!
آج یاروں سے یہ اِک عُقدۂ آساں تو کُھلا
مجرُوحؔ سُلطانپوری
2002 - 1919
