مجاز مجاؔز لکھنوی :::::: کمالِ عشق ہے دیوانہ ہوگیا ہُوں میں::::::Majaz Lakhnawi

[طارق شاہ]

غزل
کمالِ عشق ہے دِیوانہ ہوگیا ہُوں مَیں
یہ کِس کے ہاتھ سے دامن چُھڑا رہا ہُوں مَیں

تمھیں تو ہو، جِسے کہتی ہے ناخُدا دُنیا
بچا سکو تو بچا لو، کہ ڈُوبتا ہُوں مَیں

یہ میرے عِشق کی مجبُورِیاں، معاذاللہ!
تمھارا راز، تمھیں سے چُھپا رہا ہُوں مَیں

اِس اِک حجاب پہ سَو بے حجابیاں صدقے !
جہاں سے چاہتا ہُوں ،تم کو دیکھتا ہُوں مَیں

بتانے والے وہیں پر بتاتے ہیں منزِل!
ہزار بار ،جہاں سے گُزر چُکاہُوں مَیں

مجھے سُنے نہ کوئی مستِ بادۂ عشرت!
مجاؔز ٹُوٹے ہُوئے دِل کی ، اِک صدا ہُوں مَیں

مجاؔز لکھنوی
​