فراق فِراق گورکھپُوری ::::: لُطف نہیں کرَم نہیں ::::: Firaq Gorakhpuri

[طارق شاہ]

غزلِ

فِراق گورکھپُوری

لُطف نہیں کرَم نہیں
جور نہیں سِتم نہیں

اب نہیں رُوئے مہ چَکاں
گیسُوئے خم بہ خم نہیں

برسرِ عالمِ وجُود
کون سی شے عدم نہیں

یُوں ہی نِکل گئی اِک آہ
رنج نہیں، الَم نہیں

قائلِ حُسنِ دِلفریب
آپ نہیں کہ ہم نہیں

میں تِرا موردِ عتاب
اِس سے بڑا کرَم نہیں

عالمِ حُسنِ محضِ یار
عالمِ کیف و کم نہیں

جس کے لیے غزل کہُوں
ایسا کوئی صنم نہیں

کب کوئی آہُوئے جَمِیل
مائلِ عزمِ رَم نہیں

مظہرِ دو جہاں ہُوں میں
عِشق ہُوں جامِ جم نہیں

رقصِ شرر سے دیرپا
زندگیِ اُمم نہیں

ہاں کوئی اور ہی قسم
کھائی ہُوئی قسم نہیں

آج بہت اُداس ہُوں
یُوں کوئی خاص غم نہیں

ہائے یہ بیخودیِ غم
آئے جو وہ، تو ہم نہیں

غالب و مِیر و مصحفی
ہم بھی فِراق کم نہیں

فراق گورکھپوری​