نظر لکھنوی غزل: دامنِ دل میں ترے اخگرِ ایماں ہے ابھی ٭ نظرؔ لکھنوی

[محمد تابش صدیقی]

دامنِ دل میں ترے اخگرِ ایماں ہے ابھی
پھونک دے خرمنِ باطل کہ یہ امکاں ہے ابھی

دیکھنے کا مجھے انسان کو ارماں ہے ابھی
آدمیت سے بہت دور یہ انساں ہے ابھی

دم میں کافر ہے ابھی دم میں مسلماں ہے ابھی
دل یہ سر گشتۂ و حیران و پریشاں ہے ابھی

ہم سنبھل جائیں تو تقدیر بدل سکتی ہے
وہی یزداں ہے وہی رحمتِ یزداں ہے ابھی

وہ تو آمادۂ فیضان و کرم ہیں لیکن
ہم کو مجبوریِ کوتاہیِ داماں ہے ابھی

وہی طوفاں، وہی موجیں، وہی بادِ صرصر
وائے غرقابیِ کشتی کا ہر عنواں ہے ابھی

اپنی منزل کی طرف ہم سفر و تیز قدم
داغ ناکامیِ منزل کا فروزاں ہے ابھی

شانۂ حکمت و تدبیر سے سلجھائیں اسے
زلفِ ہستی کا ہر اک بال پریشاں ہے ابھی

زندگی اور بھی ہے ایک نظرؔ بعدِ فنا
وائے تقدیر کہ طوفاں پسِ طوفاں ہے ابھی
٭٭٭
محمد عبد الحمید صدیقی نظرؔ لکھنوی​