غزل: جلیں گے کتنے چراغ تم سے ، چراغ اک تم جلا کے دیکھو

[نوید رزاق بٹ]

السلام علیکم و رحمۃ اللہ احباب۔ اِس سال مارچ میں لکھے کچھ اشعار پیشِ خدمت ہیں، اِس درخواست کے ساتھ کہ جہاں کہیں کمی بیشی نظر آئے تو ضرور نشاندہی فرمائیں تاکہ بہتری کی کوشش کی جا سکے۔ جزاکم اللہ خیر ۔

جلیں گے کتنے چراغ تم سے ، چراغ اک تم جلا کے دیکھو
نئی سحر کا پتہ ملے گا، پرانے چہرے ہٹا کے دیکھو

فضا میں نغموں کی گونج ہو گی ، تمام خاکوں میں رنگ ہوگا
کِھلیں گے تازہ گلاب پھر سے ، چمن سے ظلمت مٹا کے دیکھو

سبھی مسافر ہیں اس نگر میں ، سبھی کو چاہت کی آرزو ہے
دلوں کے نغمے سنو کبھی تم ، نطر نظر سے ملا کے دیکھو

کہا قلندر نے راز مجھ سے ، کہ خود کو کھونا ہے خود کو پانا
متاعِ دنیا ہوس ہے بابا! متاع یہ اک دن لٹا کے دیکھو

غریب ماں نے سلا دیا ہے بلکتے بچوں کو پھر سے بھوکا
میرے خلیفہ، محل سے نکلو ، خدا کی بستی میں جا کے دیکھو

۔نوید رزاق بٹ​

 

[محمد خلیل الرحمٰن]

متاعِ دنیا ہوس ہے بابا! متاع یہ اک دن لٹا کے دیکھو​

​

زیر نظر مصرع پر نظرِ ثانی فرمائیے۔

 

[نوید رزاق بٹ]

بہت شکریہ سر، آپ نے بالکل ٹھیک نشاندہی کی ہے۔ میں تبدیلی پر غور کرتا ہوں۔

 

[مہدی نقوی حجاز]

حضور بہت اچھی غزل ہے۔ واہ۔ آپ تو اچھے بھلے شاعر از آب در آئے!
جناب خلیل صاحب نے ٹھیک نشاندہی فرمائی ہے۔ ع حروف اصلی میں سے ہے، اس کا گرانا یوں جائز نہیں۔
آخری شعر کے مصرعِ اولی کو اگر یوں کر دیں تو مصرعے کی الجھن شاید کم ہوجائے، یوں بھی طویل بحروں میں یہ مشکلات اکثر آ جاتی ہیں:
غریب ماں نے بلکتے بچوں کو پھر سے بھوکا سلا دیا ہے

 

[نوید رزاق بٹ]

بے حد شکریہ سر ۔ میں انشاءاللہ اِس مصرعے پر بھی غور کرتا ہوں۔ جزاک اللہ خیرا۔

 

[ماہی احمد]

زبردست بہت اچهی ہے....

 

[فلک شیر]

عمدہ اشعار بٹ بہادر
تکنیکی باتیں عروض والے جانیں ۔
سانوں کیہ پتا!!!

 

[مہدی نقوی حجاز]

عمدہ اشعار بٹ بہادر
تکنیکی باتیں عروض والے جانیں ۔
سانوں کیہ پتا!!!

 

[الف عین]

جلیں گے کتنے چراغ تم سے ، چراغ اک تم جلا کے دیکھو
نئی سحر کا پتہ ملے گا، پرانے چہرے ہٹا کے دیکھو
پرانے چہرے ہٹانا کا تعلق چراغ جلانے سے سمجھ میں نہیں آیا۔ پہلا مصرع رواں نہیں، یوں بہتر ہو سکتا ہے
جلیں گے کتنے چراغ تم سے، بس اک دیا تو جلا کے دیکھو
باقی اشعار میں بھی دو لخت محسوس ہو رہے ہیں۔ متاع اور آخری شعر، جو حاصل غزل ہے، کی اصلاح ضروری ہے، جو مشورے دئے جا چکے ہیں۔
یہ پونجی اک دن لتا کے دیکھو
یا
یہ دولت اک دن۔۔۔

 

[فلک شیر]

یہ ہوئی بحر مسکان برابر،بالا و زیریں غیر منقوط اشد مطلوب

 

[مہدی نقوی حجاز]

یہ ہوئی بحر مسکان برابر،بالا و زیریں غیر منقوط اشد مطلوب

اچھا سیکھ گئے ہیں آپ بھی!

 

[فلک شیر]

اچھا سیکھ گئے ہیں آپ بھی!

اجی ایسی ویسی

 

[نوید رزاق بٹ]

بہت بہت شکریہ فلک شیر بھائی اور ماہی احمد صاحبہ

 

[نوید رزاق بٹ]

جلیں گے کتنے چراغ تم سے ، چراغ اک تم جلا کے دیکھو
نئی سحر کا پتہ ملے گا، پرانے چہرے ہٹا کے دیکھو
پرانے چہرے ہٹانا کا تعلق چراغ جلانے سے سمجھ میں نہیں آیا۔ پہلا مصرع رواں نہیں، یوں بہتر ہو سکتا ہے
جلیں گے کتنے چراغ تم سے، بس اک دیا تو جلا کے دیکھو
باقی اشعار میں بھی دو لخت محسوس ہو رہے ہیں۔ متاع اور آخری شعر، جو حاصل غزل ہے، کی اصلاح ضروری ہے، جو مشورے دئے جا چکے ہیں۔
یہ پونجی اک دن لتا کے دیکھو
یا
یہ دولت اک دن۔۔۔

بہت شکریہ سر۔ متاع کے شعر میں اِس طرح کچھ سوچ رہا ہوں

متاعِ دنیا ہوس ہے بابا، ہوس کی پونجی لُٹا کے دیکھو

یا

متاعِ دنیا ہوس ہے بابا، متاعِ دنیا لُٹا کے دیکھو

مگر آپ کی تجویز بھی خوب لگ رہی ہے اور اِس میں 'اک دن' کی برقراری بہتر لگ رہی ہے

متاعِ دنیا ہوس ہے بابا، یہ پونجی اِک دن لُٹا کے دیکھو۔

باقی پہلووں پر بھی غور کرتا ہوں۔ جزاک اللہ خیرا۔

 

[ندیم مراد]

اسلام ُ علیکم
بہت خوب
صرف لفظ خلیفہ سماعت پر اچھا تاثر نہیں چھوڑ رہا
خلافت کو ملوکیت میں تبدیل ہوئے صدیاں گرریں،
اور اب تو جمہوریت کے نام پر لٹیروں کا راج ہے،
خوش رہیں ہنستے کھیلتے رہیں
وسلام