نظر لکھنوی غزل:احساسِ قرب و دوری منزل نہیں رہا ٭ نظرؔ لکھنوی

[محمد تابش صدیقی]

احساسِ قرب و دوریِ منزل نہیں رہا
ہم فرض کر چکے ہیں کہ ساحل نہیں رہا

تسخیرِ کائنات کی سرگرمیاں عبث
زیرِ نگیں ترے یہ اگر دل نہیں رہا

ناکامیوں سے مجھ کو ملا عزمِ مستقل
نعم الحصول ہے کہ جو حاصل نہیں رہا

نالے فلک شگاف نہیں، آہ نا رسا
دل اب کچھ اعتبار کے قابل نہیں رہا

صحنِ چمن میں لالہ و گل ہیں تو سہی مگر
کیا بات ہے کہ شورِ عنادل نہیں رہا

تجھ کو جنونِ قیس نہیں ورنہ یہ نہیں
پردہ نشیں کوئی پسِ محمل نہیں رہا

سر مست چشمِ ساقیِ خاکِ عرب ہوں میں
بد مستِ نشۂ مئے باطل نہیں رہا

مکر و فریب و بغض وعناد و حسد نظرؔ
شائستہ اب قرینۂ محفل نہیں رہا
٭٭٭
محمد عبد الحمید صدیقی نظرؔ لکھنوی​

 

[عبید انصاری]

صحنِ چمن میں لالہ و گل ہیں تو سہی مگر

تابش بھائی "تو" غلطی سے تو نہیں لگ گیا؟ یا پھر مجھ ہی سے وزن نہیں ہورہا.

 

[عبید انصاری]

ابد الحمید

عبد

 

[محمد تابش صدیقی]

تابش بھائی "تو" غلطی سے تو نہیں لگ گیا؟ یا پھر مجھ ہی سے وزن نہیں ہورہا.

جی مجھے بھی ایسا ہی لگ رہا ہے، ابھی تو ٹائپڈ سے کاپی کیا ہے۔ گھر جا کر مسودہ میں دیکھتا ہوں