شاعری ، اپنی پسند کی ،

[ماوراء]

یہ چلن عام ہے اس دور کے انسانوں کا
فاصلے دل میں رکھیں اور بغل گیر ہوئے​

 

[شمشاد]

یہ آج کیسی تھکن کا احساس ہے
جیسے جاگی ہوئی برسوں کی پیاس ہے
نکل پاؤں تیرے حصار سے کیسے
دور رہ کر بھی جیسے تو بہت پاس ہے
کھڑی رہتی ہوں کیوں دہلیز پر میں
شاید اب بھی تیرے لوٹ آنے کی آس ہے
(یاسمین منیر)

 

[شمشاد]

کوئی تو میری سوچ کو فکر سے آزاد کرتا
بھول کر بھول جاتا یاد سے پھر یاد کرتا

فنا کر ڈالا جس مٹی میں خود کو
موسم اس فصل کو کیسے پھر برباد کرتا

توڑ ڈالے جو روح کی خاموشی کو
کوئی تو ایسا سخن میرے لیے ایجاد کرتا

کبھی اپنی مسکان سجا کر لب پر میرے
مجھے ہر گھڑی ہر پل شاد کرتا

روح تک گھائل ہے جس کے سبب
دل کیسے اس کے لیے فریاد کرتا
(یاسمین منیر)

 

[شمشاد]

اُس کی یاد

آج اس کی یاد نے ہمیں تڑپایا بہت
آج نہ چاہتے ہوئے بھی وہ یاد آیا بہت

اس کے بعد تو جیسے وحشتوں سے دوستی ہو گئی
پھر کیوں آج تنہایوں نے ڈرایا بہت

وہ میرا تھا، میرا ہے، میرا رہے گا
ہم نے اس خیال سے خود کو بہلایا بہت

شمع کے جلنے پر ہم افسوس کریں کیوں
ہم نے بھی مانندِ شمع خود کو جلایا بہت

ہم نے جس کسی کو بھی ہمدرد سمجھا ‘عاصم‘
وہ ہمارے دکھ پہ نہ جانے کیوں مسکرایا بہت

 

[شمشاد]

کتابوں میں میرے فسانے ڈھونڈتے ہیں
نادان ہیں گزرے زمانے ڈھونڈتے ہیں

جب وہ تھی۔۔۔ تلاشِ زندگی بھی تھی
اب تو موت کے ٹھکانے ڈھونڈتے ہیں

کل خود ہی اپنی محفل سے نکالا تھا
آج ہم سے دیوانے ڈھونڈتے ہیں

مسافر بے خبر ہیں تیری آنکھوں سے
تیرے شہر میں میخانے ڈھونڈتے ہیں

تجھے کیا پتہ اے ستم ڈھانے والے
ہم تو رونے کے بہانے ڈھونڈتے ہیں

ان کی آنکھوں کو یوں دیکھو نہ ‘کمال‘
نئے تیر ہیں۔۔۔ نشانے ڈھونڈتے ہیں

 

[F@rzana]

۔

کل میں نے آکاش پہ کوئی کونج بچھڑتے دیکھی ہے
ایک تمنا گھائل ہوکر نیچے گرتے دیکھی ہے
ٹوٹے پروں سے کوشش کر کے کوئل اڑتے دیکھی ہے
پتھر لگتے دیکھا ہے اک چڑیا مرتے دیکھی ہے

 

[ماوراء]

پہلے بھی کچھ لوگوں نے جَو بو کر گیہوں چاہا تھا
ہم بھی اس امید میں ہیں لیکن کب ایسا ہوتا ہے​

 

[محب علوی]

بہت خوب ماورا

میرے دل میں تو ہی تو ہے دل کی دوا کیا کروں
دل بھی تو ہے جاں بھی تو ہے تجھ پہ فدا کیا کروں

 

[شمشاد]

آپ بےوجہ پریشان سی کیوں ہیں مادام
لوگ کہتے ہیں تو پھر ٹھیک ہی کہتے ہوں گے
میرے احباب نے تہذیب نہ سیکھی ہو گی
میرے ماحول میں انسان نہ رہتے ہوں گے
(ساحر لدھیانوی)

 

[F@rzana]

ہر طرح کے جذبات کا اعلان ہیں آنکھیں
شبنم کبھی شعلہ کبھی طوفان ہیں‌آنکھیں

آنکھیں ہی ملاتی ہیں زمانے میں دلوں کو
انجان ہیں ہم تم اگر انجان ہیں آنکھیں

لب کچھ بھی کہیں اس سے حقیقت نہیں‌کھلتی
انسان کے سچ جھوٹ کی پہچان ہیں آنکھیں
ساحر لدھیانوی

 

[شمشاد]

گلے لگا کے جو سناتے تھے دل کی آہوں کو
ترس رہا ہوں ان کی حسین باہوں کو

قدم قدم پہ وہ آنکھیں بچھا بچھا دینا
ضرور یاد تو ہو گا تمہاری راہوں کو
(شمیم جے پوری)

 

[ماوراء]

کتنا مشکل ہے زندگی کرنا




کتنا مشکل ہے زندگی کرنا
جس طرح تجھ سے دوستی کرنا

اِک کہانی نہ اور بن جائے
تم بات سرسری کرنا

ڈوب جاؤں نہ میں اندھیروں میں
اپنی آنکھوں کی روشنی کرنا

کس قدر دل نشیں لگتا ہے
بے ارادہ تجھے دُکھی کرنا

خون ِ دل صرف کرنا پڑتا ہے
دیکھنا!تم نہ شاعری کرنا

کتنا دُشوار ہے انا کے لیئے
سارے ماحول کی نفی کرنا

نوشی گیلانی​

 

[شمشاد]

برسوں کے بعد دیکھا ای شخص دلربا سا
اب ذہن میں نہیں ہے پر نام تھا بھلا سا

ابرو کھنچی کھنچی سی آنکھیں جھکی جھکی سی
باتیں رکی رکی سی لحجہ تھکا تھکا سا

الفاظ تھے کہ جگنو آواز کے سفر میں
بن جائے جنگلوں میں جس طرح راستہ سا

خوابوں میں خواب اس کے یادوں میں یاد اس کی
نیندوں میں گھل گیا ہو جیسے کہ رت جگا سا

پہلے بھی لوگ آئے کتنے ہی زندگی میں
وہ ہر طرح سے لیکن اوروں سے تھا جدا سا

اگلی محبتوں نے وہ نامرادیاں دیں
تازہ رفاقتوں سے دل تھا ڈرا ڈرا سا

کچھ یہ کہ مدتوں سے ہم بھی نہیں تھے روئے
کچھ ظاہر میں بجھا تھا احباب کا دلاسا

پھر یوں ہوا کہ ساون آنکھوں میں آ بسا تھا
پھر یوں ہوا کہ جیسے دل بھی تھا آبلہ سا

اب سچ کہنا تو یارو ہم کو خبر نہیں تھی
بن جائے گا قیامت اک واقعہ ذرا سا

تیور تھے بے رُخی کے انداز دوستی کے
وہ اجنبی تھا لیکن لگتا تھا آشنا سا

ہم نے بھی اس کو دیکھا کل شام اتفاقاً
اپنا بھی حال ہے اب لوگو ‘فراز‘ کا سا
(احمد فراز)

 

[F@rzana]

روشنی سے شبیں چراتی ہوں
روز دکھ کے دیئے بجھاتی ہوں

چاند چاہت کے لکھتی رہتی ہوں
خواہشیں لفظ سے بناتی ہوں

عشق ہے شکوہ سنج ویسے بھی
میں کہاں تم کو آزماتی ہوں

پاگلوں کی طرح نہیں روتی
کھل کے آنسو کہاں بہاتی ہوں

بات رہ جاتی ہے ادھوری سی
اس کے لہجے میں ڈوب جاتی ہوں

دھیرے دھیرے اترتی ہیں یادیں
دھیرے دھیرے مکاں سجاتی ہوں

گہری گہری سی کالی آنکھوں میں
اجلے سپنوں کو میں چھپاتی ہوں

جاگنے والے چاند کو نیناں
دور سے لوریاں سناتی ہوں
۔۔۔
۔۔۔
۔۔۔

 

[شمشاد]

بہت خوبصورت غزل ہے

جاگنے والے چاند کو نیناں
دور سے لوریاں سناتی ہوں

بہت خوب۔

شاعر ؟

 

[F@rzana]

نیناں​

 

[فرذوق احمد]

راستوں میں رہے نہ گھر میں رہے
عمر بھر حالتِ سفر میں رہے

لفظ سارے چراغ بن جائیں
وصف ایسا میرے ہنر میں رہے

زہر سارا شجر میں آجائے
اے خدا زندگی ثمر میں رہے

نوشی گیلانی
---------------------------------
ویسے آپی فرزانہ آپ کی پسند بہت اچھی ہے

 

[شمشاد]

یار فرذوق جب تم شعر لکھتے ہو تو اس میں املا کی غلطیاں نہیں ہوتیں اور جب ویسے کوئی خط لکھتے ہو تو وہ بھرا ہوتا ہے املا کی غلطیوں سے۔

یہ کیا چکر ہے ؟

 

[شمشاد]

آج پھر ان کا سامنا ہو گا
کیا پتہ اس کے بعد کیا ہو گا

آسماں رو رہا ہے دو دن سے
آپ نے کچھ کہا سنا ہو گا

دو قدم پر سہی تیرا کوچہ
یہ بھی صدیوں کا فاصلہ ہو گا

گھر جلتا ہے روشنی کے لیے
کوئی مجھ سا بھی دل جلا ہو گا
(صبا سکری)

 

[فرذوق احمد]

بات یہ ہے کہ غزل میں جب یاد کرتا ہوں نہ تو اس کے الفاظ میرے ذہن میں بیٹھ جاتے ہیں

اور جب میں ایسے لکھتا ہوں تو تب پتا نہیں کیا ہوتا ہے

ویسے شمشاد بھائی اب مجھے لگتا ہے کہ میں اِملا میں بہت کم غلطیاں کرتا ہوں