زیرک کے پسندیدہ اشعار

جا چکا شہر سے وہ اپنی اداسی لے کر
عمر بھر اب در و دیوار سجایا کیجئے
عدیم ہاشمی​

 

آبِ محیطِ عشق کا بحر عجیب بحر ہے
تَیرے تو غرق ہو گئے، ڈوبے تو پار اتر گئے
عدیم ہاشمی​

 

ہم ہیں منصور لبِ دار نے چوما ہم کو
ہم ہیں سقراط ملے زہر کے ساغر کتنے​

 

تم ہمیں کیا نئی منزل کی بشارت دو گے
تم تو رستہ نہیں دیتے ہمیں چلنے کے لیے​

 

سر پہ کتنے ہی لڑھکتے ہوئے سنگ آہ، گرے
ہم جو چوٹی پہ تھے کس کھائی میں ناگاہ گرے​

 

یہ بت کدہ ہے، ادھر آئیے ذرا بسملؔ
بتوں کی یاد میں بندے خدا کے بیٹھے ہیں
بسمل عظیم آبادی​

 

اگل نہ سنگِ ملامت، خدا سے ڈر ناصح
ملے گا کیا تجھے شیشوں کے ٹوٹ جانے سے
بسمل عظیم آبادی​

 

ہجوم لاکھ سہی زندگی کے میلے میں
مِرے وجود میں ایک آدمی اکیلا ہے ​

 

مِرے مزاج میں حُر سی وفائیں شامل ہیں
تیرے وجود میں بستا ہے جا بہ جا کوفہ​

 

میں اس وجود میں اس کو پسند آیا نہیں
خدائے کُن یہ گزارش ہے پھر بنا مجھ کو​

 

جانے کیا حادثہ ہوا، کیوں لوگ
اپنے اندر نہیں رہے آباد​

 

سجدے میں ذرا عجز و ندامت بھی تو لاؤ
یوں ناک رگڑنے کو عبادت نہیں کہتے​

 

ماہر تھا وه سیاستِ ہجر و وصال میں
اس نے کبھی رقیب کو چاہا کبھی ہمیں​

 

ابھی اڑتے نہیں تو فاختہ کے ساتھ ہیں بچے
اکیلا چھوڑ دیں گے ماں کو جس دن پر نکل آئے​

 

آج پھر ماں مجھے مارے گی بہت رونے پر
آج پھر گاؤں میں آیا ہے کھلونے والا​

 

دیکھ لے ہم نے گِلہ کوئی نہیں تجھ سے کِیا
دیکھ لے ہم نے تِرے ساتھ رعایت کی ہے ​

 

تمہارے بعد کسی کم سخن نے وحشت میں
بُجھا کے سارے دِیے آئینوں سے باتیں کیں ​

 

پہلے آ جاتی تھی قابو میں اداسی،۔۔۔۔ پر اب
ایسی وحشت ہے کہ لوں سانس تو دل دُکھتا ہے​

 

بال نوچوں کہ میں دیوار پہ سر دے ماروں
وحشتِ ہجر! کوئی راہ دِکھا،۔۔۔۔ روشنی کر​

 

کتنی وحشت ہے درمیانِ ہجوم
جس کو دیکھو، گیا ہوا ہے کہیں
جون ایلیا​