داغ دل پریشان ہوا جاتا ہے

[صادق آبادی]

دل پَریشان ہوا جاتا ہے​

اور سامان ہوا جاتا ہے​

​

خدمتِ پیرِ مغاں کر زاہد​

تُو اب انسان ہوا جاتا ہے​

​

موت سے پہلے مجھے قتل کرو​

اُس کا اِحسان ہوا جاتا ہے​

​

لذتِ عشقِ اِلٰہی مِٹ جائے​

درد ارمان ہوا جاتا ہے​

​

دَم ذرا لو کہ میرا دَم تُم پر​

ابھی قُربان ہوا جاتا ہے​

​

گِریہ کیا ضَبط کروں اے نَاصح​

اَشک پَیمان ہوا جاتا ہے​

​

بے وَفائی سے بھی رَفتہ رَفتہ​

وہ میری جان ہوا جاتا ہے​

​

عرصۂ حَشر میں وہ آ پہنچے​

صاف مَیدان ہوا جاتا ہے​

​

چھائی جاتی ہے یہ وَحشت کیسی​

گھر بیابان ہوا جاتا ہے​

​

شِکوہ سُن آنکھ مِلا کر ظالم​

کیوں پشیمان ہوا جاتا ہے​

​

آتشِ شوق بجھی جاتی ہے​

خاک اَرمان ہوا جاتا ہے​

​

عُذر جانے میں نہ کر اے قاصد​

تو بھی نادان ہوا جاتا ہے​

​

مُضطرب کیوں نہ ہوں اَرماں دل میں​

قید مہمان ہوا جاتا ہے​