درخت،پیڑ،پودے،شجر

تمام پیڑ جلا کر خود اپنے ہاتھوں سے
عجیب شخص ہے سایہ تلاش کرتا ہے​

 

جس پیڑ کے سائے میں تھکن دور ہو میری
سُوکھا ہی سہی، پر مجھے درکار وہی ہے ​

 

کب ہیں درخت حضرتِ والا کے سامنے
قدسی کھڑے ہیں عرشِ معلّٰی کے سامنے
(اطہر ہاپوڑی، اصلاح مصرع ثانی: امام احمد رضا خان رحمۃ اللہ علیہ)

 

غموں کی دھوپ میں کاٹا ہے زندگی کا سفر
کوئی شجر مرے رستے میں سایہ دار نہ تھا

 

الٹے سیدھے گرے پڑے ہیں پیڑ
رات طوفان سے لڑے ہیں پیڑ

کون آیا تھا کس سے بات ہوئی
آنسوؤں کی طرح جھڑے ہیں پیڑ

باغباں ہو گئے لکڑہارے
حال پوچھا تو رو پڑے ہیں پیڑ

کیا خبر انتظار ہے کس کا
سال ہا سال سے کھڑے ہیں پیڑ

جس جگہ ہیں نہ ٹس سے مس ہوں گے
کون سی بات پر اڑے ہیں پیڑ

کونپلیں پھول پتیاں دیکھو
کون کہتا ہے یہ کڑے ہیں پیڑ

جیت کر کون اس زمیں کو گیا
پرچموں کی طرح گڑے ہیں پیڑ

اپنی دنیا کے لوگ لگتے ہیں
کچھ ہیں چھوٹے تو کچھ بڑے ہیں پیڑ

عمر بھر راستوں پہ رہتے ہیں
شاعری پر سبھی پڑے ہیں پیڑ

موت تک دوستی نبھاتے ہیں
آدمی سے بہت بڑے ہیں پیڑ

 

بہت خوب عباس بھائی!

یہ کس کا کلام ہے؟

 

پھل دار درختوں نے رجھایا تو مجھے بھی
آزاد پرندوں کے لیے شاخ و ثمر کیا
بدر واسطی

 

آگ بھی برسی درختوں پر وہیں
کال بستی میں جہاں پانی کا تھا

سلیم کوثر

 

وہ جنگلوں میں درختوں پہ کودتے پھرنا
برا بہت تھا مگر آج سے تو بہتر تھا

محمد علوی

 

آتے ہیں برگ و بار درختوں کے جسم پر
تم بھی اٹھاؤ ہاتھ کہ موسم دعا کا ہے

اسد بدایونی

 

اک خوف سا درختوں پہ طاری تھا رات بھر
پتے لرز رہے تھے ہوا کے بغیر بھی۔۔۔۔۔۔

فضیل جعفری

 

وہ جن درختوں کی چھاؤں میں سے مسافروں کو اٹھا دیا تھے
انہیں درختوں پہ اگلے موسم جو پھل نہ اترے تو لوگ سمجھے

احمد سلمان

 

کبھی کتابوں میں پھول رکھنا کبھی درختوں پہ نام لکھنا
ہمیں بھی ہے یاد آج تک وہ نظر سے حرف سلام لکھنا

حسن رضوی

 

جو سائے بچھاتے ہیں پھل پھول لٹاتے ہیں
اب ایسے درختوں کو انسان کہا جائے۔۔۔

اصغر مہدی ہوش

 

دیکھا نہ جائے دھوپ میں جلتا ہوا کوئی
میرا جو بس چلے کروں سایہ درخت پر

عباس تابش

 

یہ غالباً اسعد بدایونی ہیں۔