حنیف اخگر ملیح آبادی ::::: پلکوں پہ دِل کا رنگ فروزاں نہیں رہا ::::: Haneef Akhgar Malihabadi

[طارق شاہ]

غزل

پلکوں پہ دِل کا رنگ فروزاں نہیں رہا
اب ایک بھی دِیا سَرِ مِژگاں نہیں رہا

قلبِ گُداز و دِیدۂ تر تو ہے اپنے پاس
میں شاد ہُوں، کہ بے سَروساماں نہیں رہا

آنکھوں میں جَل اُٹھے ہیں دِیے اِنتظار کے
احساسِ ظُلمتِ شَبِ ہجراں نہیں رہا

تُجھ سے بچھڑ کے آج بھی زندہ تو ہُوں، مگر
وہ اِرتعاشِ تارِ رَگِ جاں نہیں رہا

کیونکر نہ کُفرِ عِشق پہ ایمان لائیے
سُنتے ہیں اب وہ دُشمَنِ ایماں نہیں رہا

اب آئے ہیں وہ پُرسِشِ احوال کے لیے
جب اعتبارِ عُمرِ گُریزاں نہیں رہا

ساکت ہُوا ہے جتنا تُجھے دیکھنے کے بعد
اِتنا تو آئینہ کبھی حیراں نہیں رہا

اِمکانِ باریابئ دربارِ حُسن ہو
ہم کو دماغِ مِنّتِ درباں نہیں رہا

اخگر! وہ دن بھی دُور نہیں جب کہیں گے لوگ
محفِل میں ایک اور غزل خواں نہیں رہا

حنیف اخگر ملیح آبادی ​