مومن تم بھی رہنے لگے خفا صاحب - حکیم مومن خان مومن

[پیاسا صحرا]

تم بھی رہنے لگے خفا صاحب!
کہیں سایہ مرا پڑا صاحب!

ستم ۔آزار ۔ظلم ۔جور۔ جفا
جو کیا سو بھلا کیا صاحب!

کیوں الجھتے ہو جنبش لب سے
خیر ہے میں نے کیا کہا؟ صاحب!

کیوں لگے دینے خط آزادی
کچھ گناہ بھی غلام کا؟ صاحب!

نام عشق بتاں نہ لو مومن!
کیجئے بس خدا خدا ۔ صاحب!

حکیم مومن خان مومن

 

[محمد وارث]

واہ، بہت خوبصورت غزل ہے!

 

[شاہ حسین]

بہت خوب جناب چن چن کر لا رہے ہیں

 

[فرخ منظور]

یہ غزل کلیاتِ مومن سے مکمل کر کے دوبارہ لکھ رہا ہوں۔

تم بھی رہنے لگے خفا صاحب
کہیں سایہ مرا پڑا صاحب

ہے یہ بندہ ہی بے وفا صاحب
غیر اور تم بھلے بھلا صاحب

کیوں الجھتے ہو جنبش لب سے
خیر ہے میں نے کیا کہا صاحب؟

کیوں لگے دینے خط آزادی
کچھ گنہ بھی غلام کا صاحب

ہائے ری چھیڑ رات سن سن کر
حال میرا کہا کہ کیا صاحب

دمِ آخر بھی تم نہیں آتے
بندگی اب کہ میں چلا صاحب

ستم آزار و ظلم و جور و جفا
جو کیا سو بھلا کیا صاحب

ق

کس سے بگڑے تھے، کس پہ غصہ تھا
رات تم کس پہ تھے خفا صاحب

کس کو دیتے تھے گالیاں لاکھوں
کس کا شب ذکرِ خیر تھا صاحب

نام عشق بتاں نہ لو مومن
کیجیے بس خدا خدا صاحب

حکیم مومن خان مومن

 

[محمد وارث]

بہت شکریہ حضور اس کو دو آتشہ کرنے کیلیے!

 

[فرخ منظور]

بہت شکریہ حضور اس کو دو آتشہ کرنے کیلیے!

شکریہ وارث صاحب۔ پیاسا صحرا کی پوسٹ میں کچھ غلطیاں بھی تھیں۔ انہیں بھی درست کردیا ہے۔

 

[کاشفی]

خوبصورت غزل شیئر کرنے کے لیئے شکریہ پیاسا صحرا صاحب۔۔
اور مکمل غزل شیئر کرنے کے لیئے آپ کا تو بیحد شکریہ سخنور فرخ منظور صاحب!