طارق شاہ
محفلین
آنند نرائن مُلّا
غزل
تابِ جلوہ بھی تو ہو، وہ سُوئے بام آیا تو کیا
چشمِ مُوسیٰ لے کے عشقِ تشنہ کام آیا تو کیا
کردِیا اِک باراُس کا پیکرِ خاکی تو سُرخ
خُونِ دل گرخنجرِ قاتِل کے کام آیا تو کیا
مُدّعائے دِل سمجھ لیں گے، اگر چاہیں گے وہ
میرے ہونٹوں تک سوالِ نا تمام آیا تو کیا
گِرچُکی اِک بار جب بجلی نگاہِ شوق پر
طُور کی چوٹی سے پھر کوئی پیام آیا تو کیا
ظرفِ سائِل بھی بدل، اے رحمتِ بندہ نواز !
مے سے پُر اِن کانپتے ہاتھوں میں جام آیا تو کیا
پُر ہے تیرے ذکر سے اپنی حدیثِ زندگی
اِس میں بُھولے سے اگر دل کا بھی نام آیا تو کیا
خُونِ دل ضائع نہ ہو، مجھ کو بس اِتنی فکر ہے
اپنے کام آیا تو کیا غیروں کے کام آیا تو کیا
ہیں ابھی ، خاکسترِ مُلّا میں کچُھ چنگاریاں !
شُعلۂ ہستی قریبِ اِختمام آیا تو کیا
آنند نرائن ملّا