ایسا لگتا ہے کہ انجامِ سفر ہے ہی نہیں

عاطف ملک

محفلین
ایک کاوش استادِ محترم ،دیگر اساتذہ کرام اور محفلین کی خدمت میں پیش ہے۔امید ہے احباب اپنی رائے سے نوازیں گے۔

ایسا لگتا ہے کہ انجامِ سفر ہے ہی نہیں
منزلیں کیا ملیں جب راہ گزر ہے ہی نہیں

سب نے سمجھایا مگر مجھ پہ اثر ہے ہی نہیں
جز ترے کوئی مرے پیشِ نظر ہے ہی نہیں

اپنی آنکھوں میں جلا رکھے ہیں امید کے دیپ
کیسے کہہ دوں کہ شبِ غم کی سحر ہے ہی نہیں

جس میں آسائش و آرام کی ہے فکر تجھے
عارضی جائے سکونت ہے یہ گھر ہے ہی نہیں

میں اگر تجھ سے نہ مانگوں،تو کروں کس سے سوال
اک ترے در کے سوا دوسرا در ہے ہی نہیں

وہ رگِ جاں سے قریں ہے ترے، پھر بھی عاطفؔ
تو سمجھتا ہے اسے تیری خبر ہے ہی نہیں

عاطفؔ ملک
(فروری ۲۰۲۰)
 

Wajih Bukhari

محفلین
اچھا لکھا ہے آپ نے۔
میری رائے پھر یہی ہے کہ بہت سے الفاظوں کے حروف گر رہے ہیں جو کہ عروضی طور پر تو شاید جائز ہیں لیکن جمالیاتی طور پر اتنے پسندیدہ نہیں لگ رہے
 

Wajih Bukhari

محفلین
آپ یہ ہر گز نہ سمجھئے کہ آپ کا کلام مجھے اچھا نہیں لگا۔ اچھا لگا تو رائے پیش کرنے کی جسارت کی:)
 

الف عین

لائبریرین
اچھا لکھا ہے آپ نے۔
میری رائے پھر یہی ہے کہ بہت سے الفاظوں کے حروف گر رہے ہیں جو کہ عروضی طور پر تو شاید جائز ہیں لیکن جمالیاتی طور پر اتنے پسندیدہ نہیں لگ رہے
مجھے تو صرف مطلع کے دوسرے مصرعے میں ایسا محسوس ہوا کہ 'ملیں' محض مِ لِ تقطیع ہو رہا ہے
باقی اشعار تو بہت خوب ہیں
 

Wajih Bukhari

محفلین
مجھے تو صرف مطلع کے دوسرے مصرعے میں ایسا محسوس ہوا کہ 'ملیں' محض مِ لِ تقطیع ہو رہا ہے
باقی اشعار تو بہت خوب ہیں
جی، بالکل اشعار ما شااللہ واقعی بہت اچھے ہیں۔ آپ سے زیادہ تو میں نہیں جانتا۔ مجھے ان الفاظ کے حروف گرتے ہوئے لگے۔
ایسا
ملیں
سمجھایا
رکھے
اپنی
کیسے
جائے
دوسرا
ترے مقطع میں۔
 
آخری تدوین:

Wajih Bukhari

محفلین
ایک دفعہ پھر دست بستہ گزارش ہے کہ میری رائے سے بس یہ نتیجہ ہی اخذ کیجئے کہ میں آپ کے عمدہ کلام میں اتنی دلچسپی لے رہا ہوں کہ میں اس کی باریکیوں کو بھی سمجھنے کی کوشش کر رہا ہوں۔ لکھتے رہئے اور ہمیں اپنے اشعار سے نوازتے رہئے۔
 

عاطف ملک

محفلین
بہت خوب! ماشاءاللہ
بہت بہت شکریہ راحل بھائی:)
زبردست
حمد کا مزا بھی آگیا ساتھ ساتھ
جزاک اللہ فاخر بھائی:)
آپ کے تبصرے ہمیشہ ہی جی خوش کر دیتے ہیں:)
اچھا لکھا ہے آپ نے۔
میری رائے پھر یہی ہے کہ بہت سے الفاظوں کے حروف گر رہے ہیں جو کہ عروضی طور پر تو شاید جائز ہیں لیکن جمالیاتی طور پر اتنے پسندیدہ نہیں لگ رہے
بہت شکریہ جناب:)
جی،آپ درست فرما رہے ہیں،حروف گر تو رہے ہیں۔لیکن مجھے ذاتی طور پر اتنا قابلِ اعتراض نہیں لگ رہا کیونکہ حروف گرانے کے حوالے سے بڑوں سے یہی سنا ہے کہ عربی فارسی الاصل الفاظ میں حروفِ علت نہ گرانے چاہیں،ہندی میں چل جاتا ہے۔
بہت اعلی! کیا بات ہے۔
بہت بہت شکریہ:)
مجھے تو صرف مطلع کے دوسرے مصرعے میں ایسا محسوس ہوا کہ 'ملیں' محض مِ لِ تقطیع ہو رہا ہے
باقی اشعار تو بہت خوب ہیں
بہت شکریہ استادِ محترم،
سند مل گئی:):):)
 

عرفان سعید

محفلین
یہ "رگِ جاں سے قریں" ہی لکھا ہے جو غالباً اللہ کی صفت ہے۔غالباً کہیں پڑھا تھا لیکن اب یاد نہیں۔
وَلَقَدْ خَلَقْنَا الْاِنْسَانَ وَنَعْلَمُ مَا تُوَسْوِسُ بِهٖ نَفْسُهٗ ښ وَنَحْنُ اَقْرَبُ اِلَيْهِ مِنْ حَبْلِ الْوَرِيْدِ
ہم نے انسان کو پیدا کیا ہے اور اُس کے دل میں اُبھرنے والے وسوسوں تک کو ، ہم جانتے ہیں۔ہم اُس کی رگِ گردن سے بھی زیادہ اس سے قریب ہیں۔(سورۃ ق: 16)
 
اچھا لکھا ہے آپ نے۔
میری رائے پھر یہی ہے کہ بہت سے الفاظوں کے حروف گر رہے ہیں جو کہ عروضی طور پر تو شاید جائز ہیں لیکن جمالیاتی طور پر اتنے پسندیدہ نہیں لگ رہے
وجیہ صاحب :
محترم لفظ کی جمع الفاظ اور جملے کی مناسبت سے لفظوں کو ہم کب تسلیم کریں گے ،کب لفظ سے لاتلالی کا یہ عذاب ہٹے گا ، کب ؟؟بھلا کب؟
عاطف ملک صاحب :بہت خوبصورت کاوش ہے ۔مطلعِ ثانی میں تو آپ نے اپنی جھنجھلاہٹ اور ضد کو شاعری کے سانچے میں یوں ڈھالا ہے کہ عیوب ،محاسن ہوگئے،واہ!
 

ظہیراحمدظہیر

لائبریرین
واہ ۔ بہت خوب عاطف بھائی ۔ اچھے اشعار ہیں ۔

میں اگر تجھ سے نہ مانگوں،تو کروں کس سے سوال
اک ترے در کے سوا دوسرا در ہے ہی نہیں

کیا بات ہے !! بہت خوب!

مقطع میں شتر گربہ ہے ۔ اسے دیکھ لیجئے ۔ مصرع ثانی میں اسے کے بجائے انہیں کردیجئے ۔
 

عاطف ملک

محفلین
اہ ۔ بہت خوب عاطف بھائی ۔ اچھے اشعار ہیں ۔

میں اگر تجھ سے نہ مانگوں،تو کروں کس سے سوال
اک ترے در کے سوا دوسرا در ہے ہی نہیں

کیا بات ہے !! بہت خوب!
بہت بہت شکریہ ظہیر صاحب
آپ کی تعریف تو خصوصی catalyst کا کام کرتی ہے
مقطع میں شتر گربہ ہے ۔ اسے دیکھ لیجئے ۔ مصرع ثانی میں اسے کے بجائے انہیں کردیجئے ۔
یہاں ٹائپو ہے۔
پہلا مصرع "وہ رگِ جاں سے قریں ہے ترے پھر بھی عاطفؔ"
ہے۔
محمد تابش صدیقی محمد خلیل الرحمٰن سے گذارش ہے کہ تدوین کر دیں۔بہت شکریہ
 
Top