نظر لکھنوی غزل: منزلِ عشق میں خطراتِ بہر گام نہ دیکھ٭ نظرؔ لکھنوی

[محمد تابش صدیقی]

دادا مرحوم کی ایک غزل احباب کے ذوق کی نذر

منزلِ عشق میں خطراتِ بہر گام نہ دیکھ
حسنِ آغاز مبارک تجھے انجام نہ دیکھ

صاعقے، موجۂ صر صر، قفس و دام نہ دیکھ
عزمِ تزئینِ گلستاں ہے تو آرام نہ دیکھ

تیرگی بڑھ لے تو کچھ اور فروزاں ہوں گے
تابِ داغِ دلِ پُر درد سرِ شام نہ دیکھ

ایک ساعت بھی خوشی کی نہ میسر آئی
اس توجہ سے مجھے گردشِ ایام نہ دیکھ

صبحِ روشن ہے تعاقب میں تجھے ہو مژدہ
ہم نفس ظلمت و افسردگئ شام نہ دیکھ

داغِ دل، سوزِ جگر، رنج و الم، بیتابی
دیدنی کب ہے نظرؔ عشق کا انجام نہ دیکھ

محمد عبد الحمید صدیقی نظر لکھنوی​

 

[سعیدالرحمن سعید]

واہ تابش بھائی کیا زبردست کلام ہے۔ اب کہاں ایسے اہل علم بندگان الہی۔ اللہ رب العزت مرحوم کے درجات بلند فرمائیں

 

[محمد تابش صدیقی]

واہ تابش بھائی کیا زبردست کلام ہے۔ اب کہاں ایسے اہل علم بندگان الہی۔ اللہ رب العزت مرحوم کے درجات بلند فرمائیں

آمین، جزاک اللہ
بہت شکریہ جناب محبتوں کا۔

 

[ادب دوست]

کیا کمال غزل ہے تابش بھائی، مزہ آگیا واہ واہ ۔۔
بہت خوب بہت عمدہ

 

[محمد تابش صدیقی]

کیا کمال غزل ہے تابش بھائی، مزہ آگیا واہ واہ ۔۔
بہت خوب بہت عمدہ

محبت ہے آپ کی۔

 

[ظہیراحمدظہیر]

کیا خوبصورت کلام ہے ! فکر اور فن کا اعلیٰ امتزاج!! سبحان اللہ سبحان اللہ !
تابش بھائی ! مندرجہ ذیل مصرعوں میں اس طرح کومے لگادیں تو بہتر ہوگا ۔

صاعقے ، موجۂ صر صر ، قفس و دام نہ دیکھ
داغِ دل ، سوزِ جگر ، رنج و الم ، بیتابی​

 

[محمد تابش صدیقی]

کیا خوبصورت کلام ہے ! فکر اور فن کا اعلیٰ امتزاج!! سبحان اللہ سبحان اللہ !
تابش بھائی ! مندرجہ ذیل مصرعوں میں اس طرح کومے لگادیں تو بہتر ہوگا ۔

صاعقے ، موجۂ صر صر ، قفس و دام نہ دیکھ
داغِ دل ، سوزِ جگر ، رنج و الم ، بیتابی​

بہت شکریہ پسند فرمانے کا۔
یہاں تو تدوین اب ممکن نہیں، اپنے ریکارڈ میں درست کر لیتا ہوں۔ جزاک اللہ