مجذوب اب ہائے کوئی تارِ گریباں نہیں رہا (کشکول مجذوب سے انتخاب)

اب ہائے کوئی تارِ گریباں نہیں رہا
وحشت میں جی بہلنے کا ساماں نہیں رہا

کب میری وحشتوں سے گریزاں نہیں رہا
کب مجھ سے دور دور بیاباں نہیں رہا

وارفتگیٔ شوق کا امکاں نہیں رہا
آ جا کہ دل میں اب کوئی ارماں نہیں رہا

مارا جو ایک ہاتھ گریباں نہیں رہا
کھینچی جو ایک آہ تو زنداں نہیں رہا

فیضِ بہارِ گلشنِ عارض تو دیکھیے
جنگل کو رخ کیا تو بیاباں نہیں رہا

تارِ نفس تو ہے اگر اے پنجۂ جنوں!
کوئی گلے میں تارِ گریباں نہیں رہا

قبروں میں جی کے رہ گئے مردے ارے غضب
کیوں ہوکے قصدِ گور غریباں نہیں رہا

لے چل اب اضطراب مجھے سوئے لامکاں
شایانِ وجد عالمِ امکاں نہیں رہا

 
Top