فراز یہ تیری قلمرو ہے بتا پیرِ خرابات ۔۔۔اے عشق جنوں پیشہ۔۔۔احمد فراز

محمد بلال اعظم

لائبریرین
یہ تیری قلمرو ہے بتا پیرِ خرابات​
غالب سا بھی کوئی دیکھا ہے میرِ خرابات​
وہ رندِ بلا نوش و تہی دست و سدا مست​
آزاد مگر بستۂ زنجیرِ خرابات​
اشعار کہ جیسے ہو صنم خانۂ آذر​
الفاظ کہ جیسے ہوں تصاویرِ خرابات​
وہ نغمہ سرا ہو تو کریں وجد ملائک​
یہ قلقلِ مینا ہے کہ تکبیرِ خرابات​
اے شیخ یہ ڈیڑھ اینٹ کی مسجد تو نہیں ہے​
تعمیرِ خرابات ہے تعمیرِ خرابات​
ہم رند رہے مجلسِ واعظ کی بھی رونق​
جوں حجلۂصوفی میں تصاویرِ خرابات​
کس شوخ نے لکھا ہے یہ دیوارِ حرم پر​
زمزم میں کہاں نشۂ تاثیرِ خرابات​
میخانہ کسی شاہ کا دربار نہیں ہے​
ساقی کے تصرّف میں ہے زنجیرِ خرابات​
سعدیؔ ہو کہ حافظؔ ہو کہ خیامؔ کہ ہم ہوں​
یہ لوگ تو ہیں جانِ اساطیرِ خرابات​
ہیں ساغر و مینا کی طرح دل بھی شکستہ​
ملّا ہو جہاں کاتبِ تقدیرِ خرابات​
انسان کہ انساں کا لہو پینے لگا ہے​
اے چارہ گرو پھر کوئی تدبیرِ خرابات​
میخانہ پنہ گاہ تھی ہم دل زدگاں کی​
پر اب کہاں جائے کوئی دلگیرِ خرابات​
کب سے حرم و دیر ہیں بے نور، خدارا​
لے آؤ کہیں سے کوئی تنویرِ خرابات​
سرشار تو ہو جاتے ہیں سرکش نہیں ہوتے​
ساقی کی نگاہیں ہیں عناں گیرِ خرابات​
گر حور و مے و نغمہ سے جنّت ہے عبارت​
دنیا میں یہی خواب ہے تعبیرِ خرابات​
اے مفتیِ بد کیش نہ کر فتویٰ فروشی​
کیا تُو بھی نہیں لائقِ تعزیرِ خرابات​
میخوار کہ واعظ یہاں گردن زدنی ہے؟​
کچھ تُو ہی بتا صاحبِ تفسیرِ خرابات​
"ویراں شود آں شہر کہ میخانہ نہ دارد"​
اب جائیں کہاں ڈھونڈھنے اکسیرِ خرابات​
(احمد فراز)​
(اے عشق جنوں پیشہ)​
 

فاتح

لائبریرین
خوبصورت انتخاب ہے بلال۔ بہت خوب
کسی زمانے میں محب علوی، محمد وارث، امیداورمحبت ، ہم اور کچھ دیگر احباب نے بھی "اے عشق جنوں پیشہ" سے انتخاب ارسال کرنا شروع کیا تھا بلکہ ایک دھاگا بھی بنایا تھا کہ جہاں فراز کی اس کتاب سے منتخب مواد اکٹھا کیا جا سکے۔ چلیں اب آپ کی شمولیت سے اس پراجیکٹ پر دوبارہ کام شروع ہو گیا۔
 

محمد بلال اعظم

لائبریرین
خوبصورت انتخاب ہے بلال۔ بہت خوب
کسی زمانے میں محب علوی، محمد وارث، امیداورمحبت ، ہم اور کچھ دیگر احباب نے بھی "اے عشق جنوں پیشہ" سے انتخاب ارسال کرنا شروع کیا تھا بلکہ ایک دھاگا بھی بنایا تھا کہ جہاں فراز کی اس کتاب سے منتخب مواد اکٹھا کیا جا سکے۔ چلیں اب آپ کی شمولیت سے اس پراجیکٹ پر دوبارہ کام شروع ہو گیا۔

بہت بہت شکریہ فاتح بھائی انتخاب کی پسندیدگی پہ۔
"اے عشق جنوں پیشہ" آدھی کتاب مکمل ہو چکی ہے، ٹائپنگ کا کام جاری ہے محفل کی لائبریری میں۔
آپ یہاں ملاحظہ کر سکتے ہیں۔
 
خوبصورت انتخاب ہے بلال۔ بہت خوب
کسی زمانے میں محب علوی، محمد وارث، امیداورمحبت ، ہم اور کچھ دیگر احباب نے بھی "اے عشق جنوں پیشہ" سے انتخاب ارسال کرنا شروع کیا تھا بلکہ ایک دھاگا بھی بنایا تھا کہ جہاں فراز کی اس کتاب سے منتخب مواد اکٹھا کیا جا سکے۔ چلیں اب آپ کی شمولیت سے اس پراجیکٹ پر دوبارہ کام شروع ہو گیا۔

چلو فاتح ، اب تو محمد بلال احمد ہی یہ کام کر لے گا۔ :)
 
خوبصورت انتخاب ہے بلال۔ بہت خوب
کسی زمانے میں محب علوی، محمد وارث، امیداورمحبت ، ہم اور کچھ دیگر احباب نے بھی "اے عشق جنوں پیشہ" سے انتخاب ارسال کرنا شروع کیا تھا بلکہ ایک دھاگا بھی بنایا تھا کہ جہاں فراز کی اس کتاب سے منتخب مواد اکٹھا کیا جا سکے۔ چلیں اب آپ کی شمولیت سے اس پراجیکٹ پر دوبارہ کام شروع ہو گیا۔
اچھا یاد دلایا آ پ نے فاتح۔۔۔
اس پر مسلسل کام ہو ہی نہیں پایا اور اب تو نہ جنوں رہا نہ فراز ۔۔۔۔۔۔۔۔۔۔۔۔۔۔۔۔۔۔
 

محمد بلال اعظم

لائبریرین
اچھا یاد دلایا آ پ نے فاتح۔۔۔
اس پر مسلسل کام ہو ہی نہیں پایا اور اب تو نہ جنوں رہا نہ فراز ۔۔۔ ۔۔۔ ۔۔۔ ۔۔۔ ۔۔۔ ۔۔۔

جنوں کا تو علم نہیں لیکن فراز صاحب تو خیر اب بھی ہمارے دلوں میں ہیں۔
اور احمد فراز صاحب کا سارا کلام میں انشاءاللہ ضرور یونی کوڈ میں کروں گا۔
 

فاتح

لائبریرین
اچھا یاد دلایا آ پ نے فاتح۔۔۔
اس پر مسلسل کام ہو ہی نہیں پایا اور اب تو نہ جنوں رہا نہ فراز ۔۔۔ ۔۔۔ ۔۔۔ ۔۔۔ ۔۔۔ ۔۔۔
اچھی خبر یہ ہے کہ اکیلے بلال نے ہم سب کی جگہ لے لی ہے اور یہ کام بڑی رفتار سے اپنے نکتۂ انجام تک پہنچ رہا ہے۔
 
جنوں کا تو علم نہیں لیکن فراز صاحب تو خیر اب بھی ہمارے دلوں میں ہیں۔
اور احمد فراز صاحب کا سارا کلام میں انشاءاللہ ضرور یونی کوڈ میں کروں گا۔
ضرور ۔۔۔۔۔۔۔۔۔ ان کا سارا کلام ہونا بھی چاہیے یونی کوڈ میں ۔۔۔ان کا کلام اتنا خوبصورت ہے کہ اسے سب تک پہنچنا چاہئے ۔۔۔۔۔۔۔۔
 
وجد آور و کیف آگیں غزل
ہر شعر لاجواب
ہر شعر حاصل غزل
موتیوں کی یک لڑی​
اقبال کا ایک شعر یاد آ گیا​
چہروں پر جو سرخی نظر آتی ہے سرِ شام
یا غازہ ہے یا ساغر و مینا کی کرامات

بہت خوب انتخاب​
شاد و آباد رہیں​
 
Top