بابا بلھے شاہ ہن کس تھیں آپ چھپائیدا ۔ بلھے شاہ

فرخ منظور

لائبریرین
ہن کس تھیں آپ چھپائیدا

کِتے ملاں بانگ بلیندے ہو
کِتے سنت فرض دسیندے ہو
کِتے رام دہائی دیندے ہو
کِتے متھے تلک لگائیدا
ہن کس تھیں آپ چھپائیدا

میں میری ہے،کہ تیری ہے
ایہہ انت بھسم دی ڈھیری ہے
ایہہ ڈھیری پیا گھیری ہے
ڈھیری نوں ناچ نچائیدا
ہن کس تھیں آپ چھپائیدا

کِتے بینسر چوڑا پاو گے
کِتے جوڑا پا ہنڈھاو گے
کِتے آدم حوا بن آو گے
کدی میتھوں بی بھل جائیدا
ہن کس تھیں آپ چھپائیدا

باہر ظاہر ڈیرہ پایو
آپے ڈھوں ڈھوں ڈھول بجایو
جگ تے اپنا آپ جتایو
پھر عبداللہ دے گھر دھائیدا
ہن کس تھیں آپ چھپائیدا

جو بھال تساڈی کردا ہے
مویاں توں اگے مردا ہے
مویاں بھی تیتھوں ڈردا ہے
مت مویاں موڑ کوہائیدا
ہن کس تھیں آپ چھپائیدا

بندا بن میں گئواں چراوے
لنکا چڑھ کے ناد وجاوے
مکے دا بن حاجی آوے
واہوا رنگ وٹائیدا
ہن کس تھیں آپ چھپائیدا

منصور تساں تے آیا ہے
تساں سولی پگڑ چڑھایا ہے
میرا بھائی بابل جایا ہے
دیو خون بہا میرے بھائی دا
ہن کس تھیں آپ چھپائیدا

تسیں سبھنیں بھیسیں تھیندے ہو
مینوں ہر جا تسیں دسیندے ہو
مدھ آپے، آپے پیندے ہو
آپے کو آپ چھکائیدا
ہن کس تھیں آپ چھپائیدا

ہن پاس تساڈے وساں گی
نہ بے دل ہوکے نساں گی
سبھ بھیت تساڈے دساں گی
کیوں مینوں انگ نہ لائیدا
ہن کس تھیں آپ چھپائیدا

واہ جس پر کرم اویہا ہے
تحقیق اوہ بھی تیں جیہا ہے
سچ صحیح روایت ایہا ہے
تیری نظر مہر تر جائیدا
ہن کس تھیں آپ چھپائیدا

وچ بھانبڑ باغ لوائیدا
جیہڑا وچوں آپ وکھائیدا
جاں الفوں احد بنائیدا
تاں باطن کیا بتلائیدا
ہن کس تھیں آپ چھپائیدا

بلھا ہن صحیح سنبھالتے ہو
ہر صورت نال پچھاتے ہو
کِتے آتے ہو، کِتے جاتے ہو
ہن میتھوں بھل نہ جائیدا
ہن کس تھیں آپ چھپائیدا

بلھا میں شوہ ول مائل ہاں
جھب کرو عنائت سائل ہاں
ایہہ سائل کیہہ؟ میں گھائل ہاں
گھائل توں آپ چھپائیدا
ہن کس تھیں آپ چھپائیدا

(بلھے شاہ)
 
Top