ہر چند زخم زخم دریدہ بدن رہے ۔ عرفانہ عزیز

فرخ منظور

لائبریرین
ہر چند زخم زخم دریدہ بدن رہے
گل رنگ تیری یاد کے سب پیرہن رہے

دیکھا تجھے تو رنگِ پسِ رنگ تھی نظر
یہ سلسلے بھی دل کے چمن در چمن رہے

پہروں تصورات کی محفل سجی رہی
پہروں ترے خیال سے محوِ سخن رہے

ذوقِ جنوں پہ تنگ رہیں دل کی وسعتیں
کس دشت کی تلاش میں شوریدہ تن رہے

ہر چند تھیں خموش مرے دل کی دھڑکنیں
دیوار و در کو یاد ترے سب سخن رہے

(عرفانہ عزیز)
 
Top