خورشید رضوی گُل کھلاتی ہے ، کبھی خاک اڑ اتی ہے یہ خاک ۔۔۔۔۔ (خورشید رضوی)

نوید صادق

محفلین
غزل

گُل کھلاتی ہے ، کبھی خاک اڑ اتی ہے یہ خاک
شعبدے کرتی ہے ، نیرنگ دکھاتی ہے یہ خاک

میں تو خود خاک ہوں میرا تو بھلا کیا مذکور
آسمانوں سے ستاروں کو بلاتی ہے یہ خاک

سال ہا سال کِھلاتی ہے جسے رزق اپنا
آخرِ کار اُس انسان کو کھاتی ہے یہ خاک

سب سے آخر میں اُبھارے تھے جو رفتہ رفتہ
سب سے پہلے وہ خد و خال مٹاتی ہے یہ خاک

ہے کبھی جسم، کبھی قبر کی مٹی خورشید
جس طرف جاؤں ، مری راہ میں آتی ہے یہ خاک
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(خورشید رضوی)
 
Top